فوتو :سەنات
سەناتور ولگا بۋلاۆكينا شىعىس قازاقستان وبلىسىنداعى التاي جانە كاتونقاراعاي اۋداندارىندا سالىنىپ جاتقان نىسانداردىڭ ساپاسى مەن مەملەكەتتىك باعدارلامالار اياسىنداعى قارجىلاندىرۋ ماسەلەسىنە زەر سالدى. ول ۇلكەن نارىن اۋىلىندا قۇرىلىسى اياقتالماعان دەنە شىنىقتىرۋ-ساۋىقتىرۋ كەشەنىندە بولدى. مۇندا جۇمىس 2021 جىلى باستالعان. الايدا قازىر قۇرىلىس جۇمىستارى تولىعىمەن توقتاپ تۇر. جۇمىستىڭ جالپى كولەمنىڭ تەك 35 پايىزى عانا ورىندالعان.
سونداي-اق سەناتور وسى جەردە سالىنىپ جاتقان جاڭا مۋزىكا مەكتەبىنە دە ات باسىن بۇردى. قۇرىلىس بارىسىمەن تانىسقان سوڭ ول مەكتەپتى ۋاقتىلى اياقتاۋ جانە زاماناۋي جابدىقتارمەن قامتاماسىز ەتۋ قاجەتتىگىن ايتتى.
دەپۋتات پوليانسكوە اۋىلىنداعى ءسۇت فەرماسىندا بولىپ, «التاي حامير» جاڭا تۋريستىك بازاسىنىڭ قۇرىلىس الاڭىن دا ارالادى. جوبا «اۋىل اماناتى» باعدارلاماسىمەن جۇزەگە اسىپ جاتىر. كەلەشەكتە نىسان تۇرعىنداردىڭ وتباسىلىق دەمالىس ورنىنا اينالۋعا ءتيىس.
ء«اربىر مەملەكەتتىك باعدارلاما قاعاز جۇزىندە قالماي, ناقتى ىسكە اسۋى كەرەك. قۇرىلىستار مەرزىمىندە اياقتالىپ, مەكتەپتەر بالالارعا ەسىگىن ايقارا اشۋعا ءتيىس. اۋىلداعى بيزنەستى وركەندەتۋگە دە مۇمكىندىك بار. مۇنداي جوبالار – وڭىردە بولاشاقتىڭ نەگىزى», دەپ اتاپ ءوتتى و.بۋلاۆكينا.
سەناتورلار نۇرلان بەكنازاروۆ پەن ايگۇل قاپباروۆا دا شىمكەنت قالاسىنداعى اباي اۋدانىنىڭ تۇرعىندارىمەن كەزدەسۋدە حالىقتىڭ ءومىر ءسۇرۋ ساپاسىن ارتتىرۋ, ازاماتتاردىڭ قۇقىعىن قورعاۋ جانە سوت تورەلىگى جۇيەسىن جەتىلدىرۋدە زاڭدا ورىن العان وزگەرىستەردى ايتىپ بەردى. ال مەگاپوليس تۇرعىندارىن قالالىق ينفراقۇرىلىم, الەۋمەتتىك نىساندار قۇرىلىسى, كوممۋنالدىق قىزمەت, اباتتاندىرۋ, بيزنەستى دامىتۋ, ءبىلىم بەرۋ جانە دەنساۋلىق ساقتاۋ ماسەلەلەرى تولعاندىردى.
دەپۋتاتتار جەڭىل ونەركاسىپ جانە قىزمەت كورسەتۋ كوللەدجىندە دە بولدى.
«2025 جىل – جۇمىسشى ماماندىقتارى جىلى. تەحنيكالىق جانە كاسىپتىك ءبىلىم جۇيەسىن رەفورمالاۋ قاجەتتىگىنە بايلانىستى ءبىز ونى جاڭعىرتۋ جونىندەگى زاڭ جوباسىنا باستاماشى بولدىق. وندا وقۋ ۇدەرىسىن تسيفرلاندىرۋ, كوللەدجدەردىڭ دەربەستىگىن كەڭەيتۋ, ءبىلىم باعدارلامالارىن جاڭارتۋ جانە تەوريانى وندىرىستەگى پراكتيكامەن ۇشتاستىرا وتىرىپ, دۋالدى وقىتۋدى دامىتۋ كوزدەلگەن», دەدى ا.قاپباروۆا.
ال دەپۋتاتتار ارمان وتەعۇلوۆ پەن ءلاززات رىسبەكوۆا ورال قالاسىندا سۋ شارۋاشىلىعىن دامىتۋ ماسەلەلەرى بويىنشا كەڭەيتىلگەن كەڭەس وتكىزدى. سۋارۋ ينفراقۇرىلىمىنىڭ جاي-كۇيى, سۋ تاپشىلىعى, سۋ رەسۋرستارىن باسقارۋدىڭ زاماناۋي تاسىلدەرىن ەنگىزۋ, سۋ شارۋاشىلىعى نىساندارىن قارجىلاندىرۋ جانە جاڭعىرتۋ ماسەلەلەرىن تالقىلاعان سەناتورلار اگرارلىق سەكتوردى سۋمەن تۇراقتى قامتاماسىز ەتۋ جۇيەلى ءتاسىلدى, مەكەمەارالىق ءوزارا ءىس-قيمىلدى جانە زاڭنامالىق دەڭگەيدە قولداۋدى تالاپ ەتەتىنىن اتاپ ءوتتى.
«سۋمەن جابدىقتاۋ قازىر وڭىرلەردىڭ باستى پروبلەماسى بولىپ وتىر. سوندىقتان مەملەكەتتىك باعدارلامالاردى ازىرلەۋ كەزىندە اۋىل شارۋاشىلىعى وندىرۋشىلەرىنىڭ پىكىرىن تىڭداپ, ەسكەرۋ قاجەت», دەدى ل.رىسبەكوۆا.
الىبەك ناۋتيەۆ اتىراۋ وبلىسىنداعى دەنساۋلىق ساقتاۋ سالاسىنىڭ جاي-كۇيىمەن تانىستى. سەناتور ساپارى اتىراۋ وبلىستىق پەريناتالدىق ورتالىقتان باستالدى. وندا ورتالىق قىزمەتكەرلەرى ماماندارمەن قامتاماسىز ەتۋ, تەحنيكالىق جاراقتاندىرۋ سەكىلدى ماسەلەلەردى قوزعادى, سەناتور كورسەتىلەتىن پەريناتالدىق كومەكتىڭ ساپاسىنا نازار سالدى. ول سالىنىپ جاتقان قالالىق ەمحانا كەشەنى مەن ونىڭ فيليالىندا دا بولدى.
قازىر وبلىس ورتالىعىندا قوسالقى ءۇش ستانساسى بار جەدەل مەديتسينالىق جاردەم ستانساسى, ونكوديسپانسەر جانىنداعى راديولوگيالىق كورپۋستىڭ قۇرىلىسى باستالعان. سونداي-اق المالى جانە بەرەكە اۋىلدارىندا امبۋلاتوريالار سالىنىپ جاتىر. كەلەشەكتە ستراتەگيالىق ماڭىزى بار نىسانداردى – كوپسالالى بالالار ستاتسيونارىن, وبلىستىق جاڭا پەريناتالدىق ورتالىق پەن وڭالتۋ ورتالىعىن سالۋ دا جوسپارلانعان.
