فوتو: Farabi University
بۇعان دەيىن پرەزيدەنت توراعالىعىمەن وتكەن ۇكىمەتتىڭ كەڭەيتىلگەن وتىرىسىندا ققس-نى 12-دەن 20 پايىزعا كوتەرۋ جوسپارلانىپ وتىرعانى ايتىلعان. الايدا مەملەكەت باسشىسى بيزنەس وكىلدەرىمەن كەزدەسۋىندە بۇل مولشەردىڭ تىم جوعارى ەكەنىن ايتىپ, ۇكىمەتكە قايتا پىسىقتاۋدى تاپسىرعان ەدى. وسى تاپسىرمادان كەيىن ۇكىمەت ققس مولشەرىن 16 پايىزعا تومەندەتۋدى ۇسىندى. جاڭا سالىق كودەكسىندە وسى ۇسىنىس قولداۋ تاپتى. جاڭا سالىق كودەكسى ازاماتتار مەن بيزنەس ءۇشىن وڭتايلاندىرىلىپ, ادىلەتتى سالىق تولەۋگە ىنتالاندىرۋدى كوزدەيدى. پرەزيدەنت قول قويعان سالىق جۇيەسىنىڭ وزگە دە جاڭاشىلدىقتارىن ۇلتتىق ەكونوميكا مينيسترلىگى سالىق جانە كەدەن ساياساتى دەپارتامەنتىنىڭ ديرەكتورى ەرلان ساعناەۆ ءتۇسىندىرىپ بەردى.
«جاڭا سالىق كودەكسىنىڭ نەگىزگى جاڭالىعى سالىق ەسەپتىلىگىنىڭ كولەمىن 30 پايىزعا قىسقارتىپ, سالىق سانىنىڭ 20 پايىزعا ازايۋى, كتس پەن ققس ديففەرەنتسياتسياسى, قولدانىستاعى ارناۋلى سالىق رەجيمدەرىن وڭتايلاندىرۋ, ءسان-سالتانات سالىعىن ەنگىزۋ. ماسەلەن, بىرىڭعاي جەر سالىعى قىسقارتىلىپ, جەكە تولەماقىلار بويىنشا مولشەرلەمەلەر مەن الىمداردىڭ سانى كەمىتىلدى. كورپوراتيۆتىك تابىس سالىعىنا جەكە توقتالسام, 20 پايىز دەڭگەيىندە ساقتالادى. دەسە دە سارالانعان سالىقتىق مولشەرلەمە تۇسىنىگى دە بار. ماسەلەن ەڭ جوعارعى مولشەر ويىن بيزنەسى مەن بانكتەرگە (بيزنەس سۋبەكتىلەرىن كرەديتتەۋدى قوسپاعاندا) – 25 پايىز قويىلعان. ال الەۋمەتتىك سالالار, ءبىلىم بەرۋ, مەديتسينا, مادەنيەت جانە سپورت سالالارى ءۇشىن 2026 جىلى 5 پايىز مولشەرىندە بەلگىلەنىپ, 2027 جىلى 10 پايىزعا دەيىن ۇلعايادى. اۋىل شارۋاشىلىعى تاۋارىن وندىرۋشىلەرگە 3 پايىز جەڭىلدەتىلگەن مولشەرلەمە قالادى», دەدى ەرلان ساعناەۆ.
سونداي-اق, ۇلتتىق ەكونوميكا مينيسترلىگى سالىق جانە كەدەن ساياساتى دەپارتامەنتىنىڭ ديرەكتورى ققس-تان بوساتىلعان سالالار تۋرالى دا ايتىپ بەردى.
«جاڭا سالىق كودەكسىندەگى وزگەرىسكە ساي ققس-ءتىڭ بازالىق مولشەرى 12 پايىزدان -16 پايىزعا وسەدى. دەنساۋلىق ساقتاۋ سالاسى ءۇشىن تومەندەتىلگەن مولشەر قويىلدى. ققس اتالعان سالا ءۇشىن 2026 جىلدان باستاپ - 5 پايىز, 2027 جىلدان باستاپ – 10 پايىز دەڭگەيىندە بولادى. ۇكىمەت ايقىندايتىن تىزبە بويىنشا ورفاندىق جانە الەۋمەتتىك ءمانى بار اۋرۋلاردى ەمدەۋ مولشەرلەمەسى 0 پايىز بولادى», دەدى ەرلان ەرمەك ۇلى.
ايتا كەتەيىك, جاڭا سالىق كودەكسى 2026 جىلدىڭ 1 قاڭتارىنان باستاپ كۇشىنە ەنەدى.
