فوتو: ۇكىمەت
پرەزيدەنتتىڭ جىلۋ كوزدەرىن جاڭعىرتۋ جونىندەگى تاپسىرمالارىن ىسكە اسىرۋ شەڭبەرىندە جەزقازعان جەو 2024 جىلى «قىزىل ايماقتان» شىعارىلعان بولاتىن. وندا 2023-2024 جىلدارى قازاندىق پەن تۋربينالىق تسەحتاردى كۇردەلى جوندەۋ ناتيجەسىندە جابدىقتاردىڭ توزۋى تومەندەتىلدى.
بەلگىلەنگەن قۋاتى 252 مۆت جانە جىلۋ قۋاتى 564 گكال/ساعات بولاتىن ەلەكتر ستانساسى قازىرگى ۋاقىتتا 175 مۆت ەلەكتر ەنەرگياسى مەن 363 گكال/ساعات جىلۋ بەرىپ تۇر. ونەركاسىپ كاسىپورىندارى دا, تۇرعىندار دا ەلەكترمەن جانە جىلۋمەن قامتىلعان.
«قازاقمىس ەنەردجيس» جشس باس ديرەكتورى تەمىرلان وتەگەنوۆ تەحنيكالىق توزۋدى ازايتۋ ءۇشىن نەگىزگى جابدىقتارعا, ونىڭ ىشىندە ەكى قازاندىق پەن ەكى تۋربيناعا كۇردەلى جانە اعىمداعى جوندەۋ جۇرگىزىلگەنىن حابارلادى. قازىرگى ۋاقىتتا №7 قازاندىق پەن №7 تۋربينادا جۇمىستار جالعاسىپ جاتىر. جوندەۋ جۇمىستارى, سونىڭ ىشىندە, تاريفتەردىڭ كەزەڭ-كەزەڭىمەن ءوسۋىنىڭ ارقاسىندا دا جۇرگىزىلىپ جاتقانى اتاپ ءوتىلدى.
«مەملەكەت باسشىسىنىڭ تاپسىرماسىن جۇزەگە اسىرۋ اياسىندا ءبىز جەزقازعان جەو-دا اۋقىمدى جاڭعىرتۋ جۇمىستارىن جۇزەگە اسىرىپ جاتىرمىز. ء«تاريفتى ينۆەستيتسياعا ايىرباستاۋ» باعدارلاماسىن جۇزەگە اسىرۋ اياسىندا دا جۇمىستار اتقارىلۋدا. بۇگىنگى تاڭدا تاريفتەر ءوزىن-ءوزى اقتاپ وتىر, ستانسامىزداعى بىردە-ءبىر ۋچاسكەدە شىعىنعا باتىراتىن تاريفتەر جوق, بيىل قىزمەتكەرلەردىڭ جالاقىسى 10-15%-عا ءوستى. ءبىز جەزقازعان ۋچاسكەسىندە كادر تۇراقسىزدىعىن ازايتۋ ماقساتىندا جاس وتباسىلار ءۇشىن تۇرعىن ءۇي سالماقپىز. 2026 جىلى 80 پاتەرلى تۇرعىن ءۇي قۇرىلىسىن باستاۋدى جوسپارلاپ وتىرمىز», دەدى تەمىرلان وتەگەنوۆ.
پرەمەر-مينيستر تۇراقتى ەنەرگيامەن قامتاماسىز ەتۋ ماسەلەلەرىندە جۇيەلى جۇمىس جۇرگىزۋدىڭ ماڭىزدىلىعىنا دا توقتالدى. ەلەكتر تۇتىنۋ قاجەتتىلىگىن جابۋ جانە ەنەرگيا جۇيەسىنىڭ مانەۆرلىگىن ارتتىرۋ ءۇشىن جەو اۋماعىندا قۋاتى 75 مۆت بولاتىن بۋ-گاز قوندىرعىسىنىڭ قۇرىلىسى باستالدى. جوبا اياسىندا 80 جاڭا جۇمىس ورنى اشىلادى.
جۇمىس ساپارى بارىسىندا ولجاس بەكتەنوۆ جەزقازعاننىڭ شارۋاشىلىق جانە اۋىز سۋ تازارتۋ نىساندارىن جاڭعىرتۋ بارىسىمەن تانىستى.
قالا اكىمى قايرات شايجانوۆ قازىرگى ۋاقىتتا ونىمدىلىگى تاۋلىگىنە 66 مىڭ تەكشە مەتر بولاتىن كەرى وسموستى مەمبرانالىق تەحنولوگيانى ەنگىزۋ كوزدەلگەن ەكىنشى كەزەڭ اياقتالىپ جاتقانىن باياندادى. جوبانىڭ جالپى دايىندىعى 47%-دى قۇرايدى, قۇرىلىس 2026 جىلدىڭ سوڭىندا اياقتالادى دەپ كۇتىلۋدە. ونى جۇزەگە اسىرۋ جەزقازعاندى تۇراقتى جانە ساپالى سۋمەن قامتاماسىز ەتۋگە, سونداي-اق تازارتۋ نىساندارىنىڭ توزۋىن 90%-دان 37%-عا دەيىن تومەندەتۋگە مۇمكىندىك بەرەدى. جالپى ءوڭىردى سۋمەن جابدىقتاۋ جەرۇستى جانە جەراستى سۋ كوزدەرى – كەڭگىر سۋ قويماسى مەن ءۇيتاس-ايدوس كەن ورنى ەسەبىنەن جۇزەگە اسىرىلاتىنى اتاپ ءوتىلدى. تازارتۋ نىسانىنىڭ وندىرىستىك قۋاتى تاۋلىگىنە 124 مىڭ تەكشە مەتردى قۇرايدى.
سونداي-اق پرەمەر-ءمينيستردىڭ نازارىنا سورعى ستانتسيالارىن, ەسقۇلا سۋ قۇبىرى مەن سۋ تارتۋ قۇرىلىستارىن قايتا جاڭارتۋدى قوسا العاندا, بارلىق سۋمەن جابدىقتاۋدىڭ جۇيەسىن جاڭعىرتۋعا باعىتتالعان ىلەسپە جوبالار ۇسىنىلدى.
اكىمدىكتىڭ اقپاراتى بويىنشا, شارۋاشىلىق جانە اۋىز سۋ نىساندارىن جاڭعىرتۋ جوباسى كەستەدەن 125 كۇن كەشىككەن جانە جۇمىسشىلار سانىنىڭ جەتپەۋىنە بايلانىستى جوندەۋ قارقىنى تومەن ەكەنىن اتاپ ءوتىلدى. ماسەلەن, بۇعان دەيىن جاريا ەتىلگەن 300-دەن استام ادامنىڭ ورىنىنا 30-عا جۋىق ادام جۇمىس ىستەپ جاتىر. پرەمەر-مينيستر شۇعىل تۇردە مەردىگەرگە قاتىستى شارا قابىلداۋدى جانە جوبانى كورسەتىلگەن ساپالىق كورسەتكىشتەرىنە ساي ەتىپ مەرزىمىندە اياقتاۋدى تاپسىردى.
«سەنىمدى جىلۋ جانە ەلەكترمەن جابدىقتاۋ, ساپالى اۋىز سۋ – پرەزيدەنتتىڭ تىرشىلىكتى قامتاماسىز ەتۋ جانە وڭىرلەردى ورنىقتى دامىتۋ ماسەلەلەرىن شەشۋدە قويعان نەگىزگى مىندەتتەرى. بارلىق ينفراقۇرىلىمدىق جوبالار بەلگىلەنگەن مەرزىمدە اياقتالۋى ءتيىس. بۇل ءۇشىن جاۋاپكەرشىلىك ءار كەزەڭدە ءتيىستى قاداعالاۋدى قامتاماسىز ەتۋگە مىندەتتى اكىمدىكتەرگە دە, سالالىق مەملەكەتتىك ورگاندارعا دا جۇكتەلەدى», دەدى ولجاس بەكتەنوۆ.
جۇمىس ساپارىنىڭ قورىتىندىسىندا پرەمەر-مينيستر بارلىق ينفراقۇرىلىمدىق جوبالاردى ۋاقتىلى اياقتاۋ, سونداي-اق رەكونسترۋكتسيالاۋدىڭ جاڭا كەزەڭدەرىن قارجىلاندىرۋ ماسەلەسىن پىسىقتاۋ جونىندە بىرقاتار تاپسىرما بەردى.
