بۇرناعى كۇنى «استانا ەكسپو-2017» ۇك» اق اتسالىسۋىمەن قازاقستانداعى فرانتسيا ەلشىلىگى Alstom كومپانياسىمەن بىرلەسە وتىرىپ, «SunTrip – From Expo to Expo» يميدجدىك ۆەلوجارىسىنىڭ قاتىسۋشىسى پاۋليندە لا مارنەمەن سالتاناتتى كەزدەسۋ ءراسىمىن ۇيىمداستىردى. فرانتسۋز ۆەلوسيپەدشىسى ەكسپو-نىڭ ءۇش استاناسى – ميلان (2015), انتاليا (2016) جانە استاناعا (2017) ساياحات جاسادى.
پاۋلين 9 مىڭ شاقىرىمدىق جولدى ءجۇرىپ ءوتىپ, «بايتەرەك» مونۋمەنتى جانىنداعى الاڭعا ۆەلوسيپەدىمەن جەتتى. سالتاناتتى كەزدەسۋدى فرانتسيانىڭ قازاقستانداعى توتەنشە جانە وكىلەتتى ەلشىسى فرانسيس ەتەن سالەمدەسۋ سوزىمەن باستادى.
بۇل ساياحاتتىڭ ماقساتى ەۋروپا مەن قازاقستان اراسىنداعى جاقىندىقتى كورسەتۋ. سونىمەن قاتار, ءپاۋليننىڭ ۆەلوسيپەدى كۇن ەنەرگياسى كومەگىمەن قوزعالاتىندىقتان, ۆەلوجارىس «تازا» ەنەرگيا يدەياسىن ىلگەرىلەتۋدى كوزدەيدى. مۇنداي ۆەلوسيپەدپەن كۇنىنە شامامەن 200 شاقىرىم جولدى ساعاتىنا 40-60 شاقىرىم جىلدامدىقپەن ءجۇرىپ وتۋگە بولادى. فرانتسۋز قىزىنىڭ ءسوزىنە سۇيەنسەك, ەڭ باستىسى, ۆەلوسيپەدشى ءتوزىمدى بولۋى كەرەك. «ءسىز تابيعاتقا جانە ەنەرگيا كوزدەرىنە ۇقىپتى قاراۋدىڭ جارقىن ۇلگىسىن كورسەتتىڭىز. «بولاشاق ەنەرگياسى» تاقىرىبىنا ارنالعان استاناداعى ەكسپو-2017 كورمەسىن وتكىزۋ قارساڭىندا بۇل ماسەلە وتە وزەكتى», – دەدى ءوز سوزىندە «استانا ەكسپو-2017» ۇك كەڭەسشىسى روزا اسانباەۆا. قازىرگى تاڭدا ۇلتتىق كومپانيا ەلوردانىڭ تۋريستىك جولباعدارىن جەتىلدىرۋ جانە «RecommendedbyEXPO» بەلگىسى قويىلعان تۋريستەرگە ارنالعان ەڭ ۇزدىك باعىتتاردىڭ ءتىزىمىن قۇرۋ بويىنشا جۇمىس جۇرگىزۋدە. سولاردىڭ ءبىرى «تۇنگى استانا شىراقتارى» ساياحاتتىق باعدارى پاۋلينگە سىيلىق رەتىندە تابىستالدى. قايسار ۆەلوسيپەدشى جينالعاندارعا العىسىن ءبىلدىرىپ, قازاقستاننىڭ ەلورداسى وتە سۇلۋ ەكەندىگىن اتاپ ءوتتى. ول «مىندەتتى تۇردە ەكسپو-2017 كورمەسىنە كەلەمىن» دەپ ۋادە بەردى. «مەنىڭ ساياحاتىمنىڭ ماقساتى – كەز كەلگەن ادام تابيعاتتى بۇلدىرمەستەن ەلدەردى ارالاي الاتىنىن كورسەتۋ. سونداي-اق, تەحنيكالىق يننوۆاتسيالاردى «گاراجدا» وتىرىپ-اق ءوز قولىڭمەن جاساۋعا بولاتىنىن كورسەتۋگە باعىتتالدى», – دەدى پاۋلين. ايتا كەتەيىك, «Sun Trip» جوباسى 2013 جىلى ەكولوگيالىق كولىك تۇرلەرىن ىلگەرىلەتۋگە باعىتتالعان تىڭ باستاما رەتىندە ىسكە قوسىلدى. سونىڭ شەڭبەرىندەگى ۆەلوجارىس بارىسىندا بىرنەشە ونداعان ادام كۇن ەنەرگياسىمەن جۇرەتىن ۆەلوسيپەدپەن الەمدى شارلاۋدا. جول-جونەكەي سپورتشىلار ءارتۇرلى قالالاردا اياڭداپ, جەرگىلىكتى حالىقپەن تىلدەسىپ, «تازا» ەنەرگەتيكانىڭ ءداۋىرى باستالعانىن ءوزىنىڭ ءىسى ارقىلى ۇلگى رەتىندە ناسيحاتتاپ كورسەتەدى. بيىلعى جارىسقا كوپتەگەن ادام قاتىسىپ, ميلاننان انتالياعا قاراي ساياحاتقا شىقتى. الايدا, انتاليادان استاناعا دەيىن جەتۋگە تەك پاۋلين عانا بەل بۋعان كورىنەدى.
ەلامان قوڭىر, «ەگەمەن قازاقستان».
