فوتو: ۇكىمەت
تاۋ-كەن مەتاللۋرگيا كەشەنى - ونەركاسىپتى دامىتۋدىڭ نەگىزى. تاۋەلسىزدىك جىلدارىندا بۇل سالا تۇراقتى ەكونوميكالىق وسىمگە جانە الەۋمەتتىك ءال-اۋقاتتىڭ نىعايۋىنا ىقپال ەتتى. 2024 جىلدىڭ قورىتىندىسى بويىنشا ەل ەكونوميكاسىنا قوسقان ۇلەسى 6,9%-دى قۇرادى. بۇگىندە سالادا 110 مىڭنان استام ادام جۇمىس ىستەيدى. ولاردىڭ كۇندەلىكتى جۇمىسى ماشينا جاساۋ, قۇرىلىس, مۇناي-گاز جانە ەنەرگەتيكا سالاسىنىڭ دامۋىنا سەرپىن بەرەدى.
ولجاس بەكتەنوۆ مەتاللۋرگيا سالاسىن دامىتۋ ۇكىمەتتىڭ باسىمدىقتارىنىڭ ءبىرى بولىپ قالا بەرەتىنىن اتاپ ءوتتى. ءوندىرىستى جاڭعىرتۋ, جاڭا كەن ورىندارىن يگەرۋ جانە زاماناۋي تەحنولوگيالاردى ەنگىزۋ بويىنشا جۇرگىزىلىپ جاتقان جۇمىستار جالعاسادى.
پرەزيدەنت جاريالاعان «جۇمىسشى ماماندىقتار جىلى» اياسىندا تاۋ-كەن مەتاللۋرگيا كەشەنىنىڭ ەڭبەككەرلەرىنە, ونىڭ ىشىندە مەتاللۋرگتەرگە ەرەكشە كوڭىل بولىنەدى. بيىل مەملەكەت باسشىسى العاش رەت ەكى جاڭا مەملەكەتتىك ناگرادا – «قازاقستاننىڭ ەڭبەك سىڭىرگەن كەنشىسى» جانە «قازاقستاننىڭ ەڭبەك سىڭىرگەن ونەركاسىپ قايراتكەرى» قۇرمەتتى اتاقتارىن تاعايىندادى.
وسى جىلى تاۋ-كەن مەتاللۋرگيا ونەركاسىبىنىڭ 600-گە جۋىق جۇمىسشىسىنىڭ ەڭبەگى اتاپ ءوتىلدى. ولار – بۇكىل ەل بويىنشا ءوندىرىس وزاتتارى مەن ەڭبەك ارداگەرلەرى.
مەملەكەتتىك ناگرادالاردى مەتاللۋرگتەرگە ونەركاسىپ جانە قۇرىلىس ءمينيسترى, استانا جانە الماتى قالالارىنداعى, ۇلىتاۋ جانە اباي وبلىستارىنداعى, قاراعاندى, پاۆلودار, شىعىس قازاقستان, قىزىلوردا, اقتوبە جانە قوستاناي وبلىستارىنداعى ءوڭىر اكىمدەرى تابىس ەتتى.
سالا وكىلدەرى مەملەكەت باسشىسىنا ەڭبەكتەرىن جوعارى باعالاعانى ءۇشىن العىس ءبىلدىردى. «Kazakhmys Smelting» جشس جەزقازعان مىس بالقىتۋ زاۋىتىنىڭ بالقىتۋشىسى بولات ايدابولوۆ بۇل ماراپات ەل ەكونوميكاسىنىڭ نەگىزى بولىپ سانالاتىن بارلىق سالانىڭ ۇلەسىن باعالاۋ ەكەنىن اتاپ ءوتتى. «قازاقمىس كورپوراتسياسى» جشس فلوتاتورى گۇلبانۋ ءجۇمادىلدينا ماراپات – ۇجىمنىڭ بىرلەسكەن جۇمىسىنىڭ ناتيجەسى ەكەنىن ايتىپ, پرەزيدەنتكە مەتاللۋرگتەردىڭ ەڭبەگىنە كوڭىل بولگەنى ءۇشىن العىسىن ءبىلدىردى.
