تابيعاتى تامىلجىعان زەرەندىنىڭ كوركەم ءبىر پۇشپاعىندا كوز جاۋىن الاتىن ەتنواۋىل پايدا بولدى. قۇتتى ءبىر قايماعى بۇزىلماعان كوشپەلى زاماننىڭ كوركەم كورىنىسى ىسپەتتى. اۋدانداعى بىرنەشە اۋىلدان سابا-سابا قىمىز اكەلىپ, مول داستارقان جايىلعان. كوك شالعىنى ۇيىسقان سايىن دالا دومبىرانىڭ كۇمبىرلەگەن ۇنىمەن تەربەلە تەبىرەنىپ تۇرعانداي. ايتپاقشى, بەرەكەلى اۋداننىڭ مەرەكەلى 90 جىلدىعى بيىل اتالىپ ءوتىپ جاتىر. قىمىز فەستيۆالى وسى ءبىر ايتۋلى داتامەن ورايلاستىرىلعان.
جانعا جايلى سالقىن سامال ەسىپ تۇر. جينالعان جۇرت ىلتيپاتپەن ۇسىنعان بال قىمىز, دونەن قىمىز, بەستى قىمىز ءتارىزدى ءارتۇرلى ادىسپەن دايىندالعان استان ءدام تاتتى.
«قىمىز دايىنداۋ ءتاسىلىن انامنان ۇيرەنىپ ەدىم, – دەيدى بال قىمىزدى باپتاعانداردىڭ ءبىرى گۇلجيان داۋلەتحانقىزى. – قازىر قىزدارىمدى ۇيرەتىپ ءجۇرمىن. «سۇڭقار» بالالاردى ساۋىقتىرۋ كەشەنىنە دايىنداپ بەرەمىن. دەمالۋشى بالالار دەنساۋلىعىن تۇزەسە, نۇر ۇستىنە نۇر ەمەس پە؟»
كەلەسى ءبىر كيىز ۇيدە بۇلاق, سادوۆىي, سارىوزەك اۋىلدارىنىڭ تۇرعىندارى داستارقانعا ساپىرىلعان سارى قىمىزبەن بىرگە ەل ىشىندە ىلۋدە ءبىر كەزدەسەتىن ەشكى ءسۇتى مەن قايماق, قازى-قارتا قويىپتى. قىمىزدى ءسانيا مەن باقىتجان مۇحانبەتوۆتەر دايىنداعان ەكەن. بۇل داستارقانداعى قىمىز قازىلار القاسىنىڭ كوڭىلىنەن شىقتى. قىمىز فەستيۆالىن وتكىزۋ يدەياسىن قولداعان جىلقى فەرماسىنىڭ يەسى مۇراتحان ونەر: «وسى تاماشا ءداستۇردى جىل سايىن ادەمىلەپ وتكىزىپ وتىرسا, بۇل كۇندە كەي وڭىردە كوزدەن بۇلبۇل ۇشقان ۇلتتىق تاعامعا كەيىنگى جاستاردىڭ نازارى اۋار ەدى», دەيدى.
«كەلەسى فەستيۆالدى وتكىزگەن كەزدە مەيماندارعا ىڭعايلى بولۋ ءۇشىن ورىندىقتار جاساپ قويامىن», دەيدى زەرەندى اۋىلىنىڭ تۇرعىنى نينا ليننيك. – وسى ءىس-شارادان-اق قازاق حالقىنىڭ مەيىرىم شاپاعاتى كورىنىپ تۇر ەمەس پە؟»
اق داستارقان باسىندا ەل تاريحىن ەكشەگەن اجارلى اڭگىمە ايتىلدى. كونە تاريحتىڭ كومبەسى عانا اقتارىلعان جوق, كەلەشەكتىڭ مەجەسى دە تىلگە تيەك بولدى. اتام قازاق ء«بىر كۇن دامدەس بولعانعا قىرىق كۇن سالەم» دەمەي مە, ءبىر داستارقاننان ءدام تاتقان سان الۋان ۇلت وكىلى ءبىر-بىرىمەن قيماي قوشتاستى.
اقمولا وبلىسى,
زەرەندى اۋدانى
