اعايىندى جاۋىنگەرلەردىڭ ەرلىگى تۋرالى ەستەلىكتەردى استانا قالاسىنىڭ تۇرعىنى پاناسۇلۋ تەتەعۇلوۆا قازىرگى ۇرپاققا جەتكىزۋدى مۇرات ەتتى. ول – مايداننان امان-ەسەن ورالعان اعايىندى تورتەۋدىڭ ءبىرى جاكەن قۇرمانوۆتىڭ قىزى. جاكەن اكەسىنىڭ ۇلكەن اعاسىنىڭ تاربيەسىندە بولعاندىقتان فاميلياسى قۇرمانوۆ بولعان ەكەن.
پ.تەتەعۇلوۆانىڭ ايتۋىنشا, ەزىن اعاسى 1914 جىلى تۋعان. ول ەرتە ەسەيىپ, ەل قامىن ويلاعان ەر بولعان. ەزىن ۇرىمباەۆ ازامات جانە فين سوعىستارىنا قاتىسىپ, ءومىرىنىڭ كوپ جىلدارىن ەل قىزمەتىنە ارناعان. اقتوبەدە ۆەتەرينار ماماندىعىن يگەرىپ, ەڭبەك ەتىپ جۇرگەن تۇستا فاشيستىك گەرمانيا كەڭەس وداعىنا باسىپ كىرەدى. وسىلايشا, 1941 جىلى سوعىس باستالعاندا ول بىردەن اسكەري كوميسسارياتقا بارىپ, مايدانعا اتتانۋعا ءوتىنىش بەرەدى. الايدا دەنساۋلىعىنا بايلانىستى اسكەرگە بىردەن الىنباي, اۋىلدا جۇمىسىن جالعاستىرا بەرەدى. سول جىلى ول وتباسىن قۇرادى.
«ەزىن اعام شاڭىراق كوتەرگەن سوڭ كوپ كەشىكپەي وعان اسكەرگە شاقىرتۋ قاعازى كەلىپ, اسكەري مىندەتىن وتەۋگە ەستونياعا اتتانادى. مايداندا ەرلىگىمەن كوزگە تۇسكەن ونىڭ جانكەشتىلىگى 1945 جىلدىڭ قاڭتارىندا پولشانىڭ كراكوۆ قالاسى ماڭىنداعى شايقاستا ەرەكشە تانىلعان. جاۋىنگەرلىك ەرلىگى ءۇشىن بىرقاتار وردەنمەن ماراپاتتالعان. الايدا كوپ ۇزاماي 26 قاڭتار كۇنى اۋىر جاراقاتتان وسى پولشا جەرىندە كوز جۇمعان», دەيدى پ.تەتەعۇلوۆا.
ال قادەن ۇرىمباەۆ 1916 جىلى دۇنيەگە كەلگەن. ول 1942 جىلى ستالينگراد شايقاسىنا قاتىسىپ, سول جاقتا ءىز-ءتۇزسىز جوعالىپ كەتكەندەردىڭ تىزىمىنە ەنەدى.
«قادەن اعام ءىز-ءتۇزسىز جوعالعانداردىڭ قاتارىندا بولعانمەن وتباسىمىز ونىڭ ءتىرى ەكەنىنە سەنىپ, ۇمىتتەنگەن, دەرەكتەر جيناعان. ءبىز دە ەسەيدىك. ەتەك-جەڭىمىز كەڭەيگەن سوڭ ءوزىم نەمەرەمدى الىپ 2015 جىلى ستالينگرادقا باردىم. ارحيۆ دەرەكتەرىنەن قادەن اعامنىڭ ۆارشاۆا تۇبىندەگى شايقاستا 1942 جىلى اۋىر جاراقاتتان قايتىس بولعانىن ءبىلىپ كەلدىم», دەيدى ول.
سوعىسقا اتتانعان قازىرجان تىلەمىسوۆ – وتباسىنىڭ كەنجە ۇلى, 1925 جىلى ومىرگە كەلگەن. ەزىن اعاسى سەكىلدى 1944 جىلى اۋىر جاراقاتتان پولشا جەرىندە قايتىس بولعان. بۇل كىسى تۋرالى قولدا بار دەرەكتەر – وسى عانا.
وسىلايشا, اعايىندىلاردىڭ ۇشەۋى جەڭىستى كۇندە جولىعا الماي, مايدان دالاسىنان ورالمادى. ۇلدارىن ۇمىتپەن اسكەرگە شىعارىپ سالعان ۇرىمباەۆتار وتباسى جاكەن ۇلىنىڭ مايداننان امان-ەسەن كەلگەنىنە شۇكىرشىلىك ايتىپ, تىرشىلىگىن جالعاستىرا بەردى. جاكەننىڭ قىزى پاناسۇلۋدىڭ ايتۋىنشا, ول ءوز زامانىندا ەرلىگىمەن دە, ونەرىمەن دە كوپتىڭ ەسىندە قالعان ازامات بولعان. سوعىس جىلدارىندا بەرلينگە دەيىن جەتىپ, تالاي اۋىر شايقاستاردى باسىنان وتكەرگەن. «جاۋىنگەرلىك ەرلىگى ءۇشىن» مەدالىمەن ماراپاتتالىپ, ءستاليننىڭ اتىنان العىسحات العان. ءبىر شايقاستا بەس بىردەي نەمىس سولداتىن تۇتقىنعا الىپ, كومانديرلەرىنىڭ ماقتاۋىنا يە بولعان.
«سوعىستان كەيىن 1946 جىلعا دەيىن اكەم گەرمانيادا قىزمەت اتقارعان. اقتوبەدەگى ەت كومبيناتىندا جۇمىس ىستەدى. وسى جىلى وتباسىن قۇرىپ, 1947 جىلى تۇڭعىشى دۇنيەگە كەلدى. اكەم ومىردەن وتكەنگە دەيىن قولىنان دومبىراسىن تاستامادى. وتە ەڭبەكقور كىسى ەدى. 1988 جىلى دۇنيەدەن ءوتتى», دەيدى قىزى پاناسۇلۋ.
مايدان دالاسى قانشاما ءۇيدىڭ اسىراۋشىسىنان, جالعىزىنان ايىردى. ال ءتورت بىردەي ۇلىن سوعىسقا شىعارىپ سالۋ قانداي قيىن بولعانىن ەلەستەتۋدىڭ ءوزى اۋىر. الايدا مۇنى سول كەزدەگى ءار وتباسى باسىنان وتكەردى. سوندىقتان پاناسۇلۋ سەكىلدى ەل ءۇشىن جانىن پيدا ەتكەن باتىرلاردىڭ تۇياعى اتالارىنىڭ ەرلىگى ۇمىتىلماي ۇرپاق ساناسىندا ساقتالسا ەكەن دەيدى. سوعىس جاي عانا تاريحي وقيعا ەمەس, ول ادام تاعدىرى. بۇل ءار جۇرەكتە جازىلعان اۋىر ەستەلىك. سول سەبەپتى ءبىز ءاربىر جاۋىنگەردى, ءاربىر مايدانگەردى ەسكە الىپ, ۇلىقتاپ وتىرۋعا مىندەتتىمىز.
