بۇگىنگى وتىرىستا مەملەكەتتىك ايىپتاۋشى ارمان كەزەكەن سوتقا قاتىسا الماعان 11 كۋاگەردەن الىنعان جاۋاپتاردى جاريا ەتتى. ايتۋىنشا, كۇدىكتى پەريزات قايرات بەلگىلى ءانشى ديماش قۇدايبەرگەننىڭ قاتىسۋىمەن وتەتىن فەستيۆالگە 10 ميلليون تەڭگە كولەمىندە دەمەۋشىلىك قولداۋ تارتۋعا تىرىسقان.
«سكيف ترەيد» جشس-ءنىڭ وكىلى ماكسيم ابدۋرازاكوۆتىڭ كۋا بولۋ جايتىنا سۇيەنسەك, ايىپتالۋشى ونى ەرەكشە قاجەتتىلىگى بار بالالاردى قولداۋعا ارنالعان فەستيۆالگە شاقىرىپ, قارجىلاي كومەك كورسەتۋدى ۇسىنعان. اڭگىمە 10 ميلليون تەڭگە جايىندا بولعان جانە ءىس-شارانىڭ حەدلاينەرى رەتىندە ديماش قۇدايبەرگەن بولاتىنى حابارلانعان», – دەدى پروكۋرور ارمان كەزەكەن.
پروكۋرور كۋاگەرلەردىڭ جاۋابىن وقىعان سوڭ, سوتتا تاعى بىرنەشە ادامنان جاۋاپ الىندى. پەريزات قايرات ءىسى بويىنشا كۋاگەر رەتىندە جاۋاپ بەرگەن ءادىلحان مۋسين قايىرىمدىلىققا جينالعان قاراجاتتىڭ قالاي قولما-قول اقشاعا اينالعانىن ايتىپ بەردى. سوزىنشە, بىلتىر كوكتەمدە پەريزات قايرات سۋ تاسقىنىنان زارداپ شەككەندەرگە كومەكتەسۋ ءۇشىن قىتاي شەكاراسىنان كيىز ءۇي مەن باسقا دا تاۋارلار الۋعا قولما-قول اقشا كەرەك ەكەنىن ايتقان. مۋسين وعان بىرنەشە جەكە كاسىپكەرمەن بايلانىس ورناتۋعا كومەكتەسكەن. قوردان سول كاسىپكەرلەردىڭ ەسەپشوتتارىنا اقشا اۋدارىلىپ, كەيىن ولار قاراجاتتى بانكتەن شەشىپ, قولما-قول كۇيدە پەريزات قايراتقا بەرىپ وتىرعان.
«ول شۇعىل تۇردە كيىز ۇيلەر, بيودارەتحانالار جانە باسقا دا تاۋارلاردى ايماقتارعا جونەلتۋ قاجەت ەكەنىن ايتتى. ء«بىر بولىگى ساتىپ الىنعان, بىراق قىتايداعى جەتكىزۋشىلەر اقشا اۋدارىمىن قابىلداماي قويعان». بۇل – پەريزاتتىڭ ءسوزى. جاعدايدى تەزىرەك شەشىپ, كومەكتى جەتكىزۋ كەرەك بولدى. مەن كەلىستىم. سودان كەيىن ءوز تانىستارىما, تۋىستارىما جۇگىندىم. سول كەزدە ءبارى زاڭ اياسىندا جۇرەدى دەپ ويلادىق, ويتكەنى قور كەلىسىمشارت جاسالادى دەپ سەندىردى», – دەدى كۋاگەر ءادىلحان مۋسين.
