دەگەنمەن باتىس قازاقستان وبلىسىنداعى ەپيدەميولوگيالىق جاعداي تۇراقتى دەۋگە بولادى. جىل باسىنان بەرى وڭىردە وبا, تىرىسقاق, قۇتىرۋ, تۋليارەميا, ءسىبىر جاراسى, بۇيرەك سيندرومدى گەمورراگيالىق قىزبا, سونداي-اق ءىش سۇزەگى, ديفتەريا, قىزامىق, سىرەسپە, بەزگەك سياقتى قاۋىپتى جۇقپالى اۋرۋلار تىركەلگەن جوق. «بۇل ناتيجەگە سالا ماماندارىنىڭ تۇراقتى باقىلاۋى مەن پروفيلاكتيكالىق شارالارى ارقاسىندا جەتىپ وتىرمىز» دەيدى باتىس قازاقستان وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسى دينارا جاڭابەرگەنوۆا.
سالىستىرا قاراساق, 2024 جىلدىڭ سايكەس كەزەڭىمەن سالىستىرعاندا ىشەك ينفەكتسياسى, قىزىلشا, مەنينگوكوك, ا ءۆيرۋستى گەپاتيت, كوكجوتەل, برۋتسەللەز, تۋبەركۋلەز سىندى جۇقپالى اۋرۋلار ازايعان. اسىرەسە تۋبەركۋلەز دەرتىنىڭ 1,4 ەسەگە تومەندەگەنى قۋانتادى.
- 6 اي ىشىندە وبلىس اۋماعىندا 110 بەلسەندى تۋبەركۋلەز جاعدايى تىركەلدى. بۇل 100 مىڭ حالىققا شاققاندا 15,8 كورسەتكىشىن قۇرايدى. 2024 جىلى بۇل كورسەتكىش – 158 جاعداي بولىپ ەدى. اۋرۋدىڭ اسقىنعان ءتۇرى كەزدەسپەدى, - دەيدى دينارا ولجابايقىزى.
ايتا كەتەر ءجايت, وڭىردە جانۋاردان العان جاراقات سانى وسكەن ەكەن. بىلتىر العاشقى 6 اي ىشىندە وسىنداي 1296 وقيعا تىركەلسە, بيىل 1333 ادام دارىگەرگە قارالعان. ونىڭ ىشىندە 942 ادام - يتتەن, 341 ادام – مىسىقتان, 4 ادام – جىلقىدان, 10 ادام – ءىرى قارادان, 35 ادام – باسقا دا جانۋارلاردان جاراقات الىپتى. بىراق ابىروي بولعاندا مۇنىڭ اراسىندا قۇتىرۋ سەكىلدى قاۋىپتى دەرتتىڭ قاتىسى جوق بولىپ شىقتى.
مال باققان ەلدىڭ ءبىر قاۋپى – برۋتسەللەز اۋرۋى. بيىل بۇل دەرت اقجايىق, بايتەرەك, قاراتوبە جانە تاسقالا اۋداندارىندا ءبىر-بىردەن عانا تىركەلگەن. ال نەگىزىنەن كەمىرگىشتەر ارقىلى تارايتىن بۇيرەك سيندرومدى گەمورراگيالىق قىزبا دەرتى جىل باسىنان بەرى 12 ادامعا جۇعىپتى. اتاپ ايتساق, بايتەرەك اۋدانىندا – 2, ءبورلى اۋدانىندا – 7, ورال قالاسىندا – 3 ادام وسىنداي دياگنوزبەن دارىگەرگە جۇگىنگەن. ماماندار ىقتيمال اۋرۋ وشاقتارىن انىقتاپ, دەراتيزاتسيا جانە دەزينسەكتسيا جۇمىسىن جۇيەلى جۇرگىزىپ كەلەدى. تۇرعىنداردىڭ سانيتاريالىق ساۋاتىن ارتتىرۋ, جۇقپالى اۋرۋدىڭ تارالۋىنا جول بەرمەۋ, الدىن الۋ شارالارىن ءتۇسىندىرۋ ءىسى دە قاتار ءجۇرىپ جاتىر.
- ءبىزدىڭ دەپارتامەنت بارلىق بۇقارالىق اقپارات قۇرالى ارقىلى بەلسەندى ناسيحات جۇرگىزەمىز. جىل باسىنان بەرى 9 بريفينگ وتكىزدىك. 81 بەينەروليك ءتۇسىرىپ, 187 ينفوگرافيكا, 59 جادىناما مەن پلاكات ازىرلەدىك. ولار حالىققا بارىنشا تاراتىلدى. سونىمەن قاتار ءبىزدىڭ ماماندار تەلەارنادا – 29, راديودا – 17 مارتە شىعىپ, باسپاسوزدە – ونداعان ماقالا جاريالادىق. قوعامدىق ورىنداردا سانيتاريالىق تالاپتار تۋرالى اقپاراتتىق بۇرىشتار ورناتىلدى. ءبىلىم بەرۋ ۇيىمدارىندا, ەڭبەك ۇجىمدارىندا جانە حالىق كوپ شوعىرلانعان جەرلەردە 258 سەمينار, 189 ءدارىس ۇيىمداستىردىق. ويتكەنى حالىقتىڭ سانيتاريالىق-ەپيدەميولوگيالىق سالاماتتىعى – مەديتسينا قىزمەتىنىڭ عانا ەمەس, بۇكىل قوعامنىڭ ورتاق مىندەتى. ساۋاتتى ادام ساۋ بولادى, - دەيدى باتىس قازاقستان وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسى.
باتىس قازاقستان وبلىسى
