ەستە بولسا, وتكەن جىلى عىلىم جانە جوعارى ءبىلىم ءمينيسترى ساياسات نۇربەك مەملەكەت باسشىسى قاسىم-جومارت توقاەۆقا جاساندى ينتەللەكت بويىنشا «AI-Sana» باعدارلاماسىن ەنگىزۋدى ۇسىنعان ەدى. كەيىن ۇكىمەت جاساندى ينتەللەكت سالاسىنداعى مامانداردى دايارلاۋعا باعىتتالعان يننوۆاتسيالىق AI-Sana باعدارلاماسىن ىسكە اسىرۋدى باستادى.
عىلىم جانە جوعارى ءبىلىم مينيسترلىگى تاراتقان اقپارات بويىنشا وسىنىڭ ناتيجەسىندە بۇگىندە AI-قابىلداۋ كوميسسياسى – تالاپكەرلەرگە ماماندىق تاڭداۋدا ءتيىمدى ۇسىنىستار بەرىپ, شەشىم قابىلداۋ ۋاقىتىن 50%-عا قىسقارتتى. بۇعان قوسىمشا ۋنيۆەرسيتەت قىزمەتكەرلەرىنىڭ جۇمىس جۇكتەمەسى 70 پايىزعا جەڭىلدەتىلدى. قازىرگى تاڭدا بۇل باستاما 30 جوو-دا ىسكە اسىرىلىپ جاتىر.
AI-Proctoring – ۇبت جانە ەمتيحانداردى قاداعالاۋدا ادام فاكتورىن ازايتىپ, بۇزۋشىلىقتاردى 90%-عا دەيىن تومەندەتتى. سونداي-اق باقىلاۋ پروتسەسى 80%-عا وڭتايلانىپ, تەستىلەۋ ناتيجەسىنە دەگەن سەنىم ارتتى. قازىرگى ۋاقىتتا اتالعان شەشىمدى 5 ۋنيۆەرسيتەت قولدانىپ كەلەدى.
ال, AI-Check – جازباشا جۇمىستاردى تەكسەرۋدى اۆتوماتتاندىرىپ, تەكسەرۋ ۋاقىتىن 70 پايىزعا, ال شىعىنداردى 65 پايىزعا دەيىن قىسقارتۋعا مۇمكىندىك بەردى.
AI-Lector – وقىتۋشىلارعا بەينەدارىس دايىنداۋ ۋاقىتىن 10 ساعاتتان 2 ساعاتقا دەيىن قىسقارتىپ, ولاردىڭ بەلسەندىلىگىن ەكى ەسە ارتتىردى.
AI-Library – تسيفرلىق كىتاپحانا جۇيەسى كىتاپحاناشىلاردىڭ جۇكتەمەسىن 70%-عا, ال پايدالانۋشىلاردىڭ ۋاقىتىن 50%-عا ازايتتى. بۇگىندە بۇل باعدارلامانى 8 ۋنيۆەرسيتەت پايدالانىپ وتىر.
سونىمەن قاتار AI-پسيحولوگ – ستۋدەنتتەر مەن وقىتۋشىلارعا پسيحولوگيالىق قولداۋ كورسەتۋ جۇمىستارىن 100%-عا ورىنداپ, اكىمشىلىك پروتسەستەردى 65 پايىزعا وڭتايلاندىرۋعا جول اشتى.
جوعارىدا اتالعان كورسەتكىشتەر «AI-Sana» باعدارلاماسىنىڭ تيىمدىلىگىن كورسەتۋدە. جاساندى ينتەللەكت تەحنولوگيالارىن ەنگىزۋ ارقىلى ۋنيۆەرسيتەتتەر ءبىلىم بەرۋ ساپاسىن ارتتىرىپ قانا قويماي, وقىتۋشىلار مەن اكىمشىلىك قىزمەتكەرلەردىڭ جۇمىسىن جەڭىلدەتىپ, ستۋدەنتتەردىڭ وقۋ پروتسەسىنە بەلسەندى قاتىسۋىنا ىقپال ەتەدى.
