«كەلەشەك مەكتەپتەرىندەگى» وقىتۋ ۇدەرىسى – تەوريا مەن پراكتيكانىڭ تىعىز بايلانىسىنا نەگىزدەلگەن. جوبالىق جانە تاجىريبەلىك ساباقتار ارقىلى وقۋشىلار ومىرلىك ماسەلەلەرگە ناقتى شەشىمدەر ۇسىنىپ, ءوز يدەيالارىن جۇزەگە اسىرۋ مۇمكىندىگىنە يە. ولاردىڭ سىني ويلاۋ قابىلەتىن, شىعارماشىلىق الەۋەتىن, سونداي-اق توپپەن جۇمىس ىستەۋ داعدىلارىن دامىتادى. وقۋ باعدارلاماسىندا روبوتتەحنيكا, باعدارلامالاۋ, 3D-مودەلدەۋ, تسيفرلىق تەحنولوگيالار سەكىلدى پاندەر ەرەكشە ورىن الادى. وقۋشىلار زاماناۋي يننوۆاتسيالىق قۇرىلعىلارمەن جۇمىس ىستەۋدى ۇيرەنەدى.
كوكشەتاۋ قالاسىنىڭ تەحنيكالىق مەكتەپ-ليتسەيى «كەلەشەك مەكتەپتەرى» جوباسى اياسىندا 2025 جىلدىڭ قاڭتار ايىنان باستاپ اشىلدى. ءبىلىم وشاعىنىڭ ماتەريالدىق-تەحنيكالىق بازاسى جوعارى دەڭگەيدە جابدىقتالعان. زەرتحانالار مەن STEM كابينەتتەردە وقۋشىلاردىڭ ءوز جوبالارىن جاساۋىنا قولايلى جاعداي جاسالعان. بالالار ءوز يدەيالارىن ناقتى ونىمگە اينالدىرىپ, ونەرتاپقىشتىق داعدىلارىن دامىتا الادى. قازىر مەكتەبىمىزدە روبوتتەحنيكا, اۆيامودەلدەۋ ۇيىرمەلەرى جۇمىس جاساپ جاتىر. روبوتتەحنيكا كابينەتىندە ينتەراكتيۆتى پانەلدەر, LEGO Education كونسترۋكتورلارى, Arduino پلاتفورمالارى, 3D پرينتەرلەر, سەنسورلار جانە بالالارعا ناقتى ينجەنەرلىك جوبالاردى جاساۋعا مۇمكىندىك بەرەتىن ەڭ زاماناۋي جابدىقتار جيناقتالعان. اۆيامودەلدەۋ ۇيىرمەسىندە وقۋشىلار ۇشۋ اپپاراتتارىنىڭ (ۇشاق, پلانەر, درون, ت.ب.) جۇمىس ۇلگىلەرىن قۇراستىرىپ, ولاردى اۋەدە ۇشىرۋ ارقىلى اەروديناميكا, تەحنيكالىق قۇرىلىم جانە باسقارۋ جۇيەلەرىن زەرتتەۋ ىسىمەن اينالىسىپ, تاجىريبەلىك ءبىلىم الىپ جاتىر. سونداي-اق ەلىمىزدە وسى جىل «جۇمىسشى ماماندىقتارى جىلى» بولىپ جاريالانۋىنا وراي مەكتەبىمىزدە وقۋشىلارمەن كاسىپتىك باعدار بەرۋ جانە قولدانبالى جۇمىستى دامىتۋعا باسا نازار اۋدارۋ ماقساتىندا تىگىن ۇيىرمەسى اشىلدى. ۇيىرمە قىسقا ۋاقىت ىشىندە ءسان, ديزاين جانە قول ەڭبەگى الەمىنە قىزىعۋشىلىق تانىتاتىن پايدالى الاڭعا اينالدى. ساباقتاردا وقۋشىلار تىگىن ءىسىنىڭ نەگىزدەرىمەن تانىسىپ, ءار بالا ءوزىن قولدانبالى ماماندىقتا سىناپ كورە الادى, شىعارماشىلىعىن تانىتىپ, كاسىبي بولاشاعىنا جول اشادى.
سونىمەن قاتار مەكتەبىمىزدە ءبىلىم باعدارلامالارىمەن قاتار حالىقارالىق سەرىكتەستىكتى دامىتۋ باعىتىندا دا اۋقىمدى جۇمىستار اتقارىلىپ جاتىر. جوعارى وقۋ ورىندارىمەن, عىلىمي زەرتتەۋ ورتالىقتارىمەن جانە تەحنولوگيالىق كومپانيالارمەن بايلانىس ورناتۋ ارقىلى وقۋشىلار مەن مۇعالىمدەر كاسىبي تاجىريبەگە ءبىر تابان جاقىنداي ءتۇستى. ماسەلەن, جاقىندا تۇركيا ەلىنىڭ «Bahtili Mesleki ve Tehnik Anadoly Lisesi» مەكتەبىمەن ونلاين كەزدەسۋ ءوتتى. «باۋىرلاس مەكتەپتەر» جوباسى اياسىنداعى جيىن ءبىلىم وردالارى اراسىنداعى مادەني جانە ءبىلىم تاجىريبەسىن ءبولىسۋدىڭ ءتيىمدى الاڭىنا اينالدى. الماتى قالاسىنداعى حالىقارالىق ينجەنەرلىك-تەحنولوگيالىق ۋنيۆەرسيتەتىمەن ءوزارا ىنتىماقتاستىق تۋرالى مەموراندۋمعا قول قويىلدى. بۇل كەلىسىم اياسىندا بىرلەسكەن عىلىمي جوبالار, شەبەرلىك ساعاتتارى, كاسىبي باعدارلاۋ شارالارىن قولداۋ كوزدەلىپ وتىر. ج.مۋسين اتىنداعى كوكشەتاۋ جوعارى قازاق پەداگوگيكالىق كوللەدجىمەن دە بىرلەسىپ جۇمىس اتقارىلىپ جاتىر. بۇل ارىپتەستىك – تسيفرلاندىرۋ مەن اقپاراتتىق-كوممۋنيكاتسيالىق تەحنولوگيالار اياسىندا ءبىلىم سالاسىن يننوۆاتسيالىق تۇرعىدان دامىتۋدا ماڭىزدى ءرول اتقارادى. سونىمەن قاتار ءساۋىر ايىندا جوعارى تەحنيكالىق كوللەدجى اراسىندا ىنتىماقتاستىق تۋرالى مەموراندۋمعا قول قويىلدى. كەلىسىم بىرلەسكەن جوبالاردى جۇزەگە اسىرۋعا, وقۋشىلار مەن ستۋدەنتتەردىڭ كاسىبي باعدارىن قالىپتاستىرۋعا, ءبىلىم ساپاسىن كوتەرۋگە باعىتتالعان. سوعان سايكەس قىركۇيەكتەن باستاپ مەكتەبىمىزدە ماشينا جاساۋ جانە ونەركاسىپتىك روبوتتەحنيكا باعىتى بويىنشا ۇيىرمەلەر اشۋ جوسپارلانىپ وتىر. بۇل ءبىلىم ساپاسىن ارتتىرىپ قانا قويماي, وقۋشىلار مەن مۇعالىمدەردىڭ كاسىبي دەڭگەيىن جاڭا ساتىعا كوتەرەدى.
وقۋشىلاردىڭ جەتىستىكتەرى دە ءبىلىم بەرۋ مودەلىنىڭ ناتيجەلى ەكەنىن كورسەتىپ وتىر. رەسپۋبليكالىق جانە حالىقارالىق دەڭگەيدەگى عىلىمي جوبالار مەن وليمپيادالاردا مەكتەبىمىزدىڭ وقۋشىلارى جۇلدەلى ورىندارعا يە بولىپ ءجۇر. ءبىزدىڭ وقۋشىلار تەحنيكالىق ءبىلىمدى عانا ەمەس, سونىمەن قاتار كرەاتيۆتى ويلاۋدى, كوماندالىق جۇمىستى جانە عىلىمعا دەگەن قۇشتارلىقتى كورسەتىپ وتىر. اتاپ ايتساق, وقۋشىلار ش.ءۋاليحانوۆ ۋنيۆەرسيتەتىنىڭ ۇيىمداستىرعان «مەكتەپ جانە ۋنيۆەرسيتەت: عىلىمي ىنتىماقتاستىق قىرلارى» اتتى كونفەرەنتسيادا 1,2,3 جۇلدەلى ورىندارعا, ماتەماتيكا جانە ورىس ءتىلى پاندەرىنەن رەسپۋبليكالىق ءپان وليمپياداسىنان جۇلدەلى 3-ورىنعا, ماتەماتيكا پانىنەن لوس-اندجەلەس (اقش) قالاسىندا وتكەن حالىقارالىق «حسەL» وليمپياداسىنان جۇلدەلى 3-ورىنعا يە بولدى.
كوكشەتاۋ قالاسىنداعى تەحنيكالىق مەكتەپ-ليتسەي – ينجەنەرلىك ءبىلىم بەرۋدىڭ زاماناۋي ۇلگىسى. مۇندا وقۋشىلاردىڭ شىعارماشىلىق جانە تەحنيكالىق قابىلەتتەرى دامىپ, ەرتە كاسىبي باعدار الۋعا مۇمكىندىك جاسالعان. حالىقارالىق سەرىكتەستىك پەن زاماناۋي تەحنولوگيالاردى ءتيىمدى قولدانۋ ارقىلى تەوريا مەن پراكتيكانى ۇشتاستىرعان ساپالى ءبىلىم بەرىلەدى. مۇنداعى ءاربىر جوبا, ءاربىر باستاما – ەلىمىزدىڭ بولاشاعىن قۇراتىن جاس ۇرپاقتىڭ جان-جاقتى, ساۋاتتى ءارى تەحنولوگيالىق تۇرعىدان دامىعان تۇلعا بولىپ قالىپتاسۋىنا باعىتتالعان ناقتى قادام.
تىلەگەن امانگەلدى ۇلى,
تەحنيكالىق مەكتەپ-ليتسەي ديرەكتورى
كوكشەتاۋ
