بيىل تابىلدى دوسىموۆتىڭ مەرەيجاسى. وسىعان وراي تۇڭعىش بارد اقىننىڭ ەلىمىزدىڭ ءار تۇكپىرىندەگى تىڭدارماندارى, ىزەت تۇتۋشىلارى وزىنشە قام-قارەكەت ەتۋگە كىرىسكەن. ال 2012 جىلى تابىلدى دوسىموۆ اتىنداعى رەسپۋبليكالىق قوعامدىق قور قۇرىپ, ونەر ءدۇلد ۇلىنىڭ مۇرالارىن ەل ەسىندە قالدىرۋعا كۇش سالىپ جۇرگەن بيجان قالماعانبەتوۆتىڭ ورنى بولەك.
– تابىلدى دوسىموۆ سان قىرلى ازامات قوي. كوپ قازاق ولەڭ جازىپ, وعان ءان شىعارىپ, ءوزى ورىنداۋشى بارد اقىن دەپ بىلەدى. تابىلدى دەگەن سەگىز قىرلى, ءبىر سىرلى تۇلعا. اتاپ ايتساق, ماحامبەت وتەمىس ۇلى اتىنداعى قوردى باسقارعان تاريحشى, ەتنوگراف, ادەبيەتشى, سۋرەتشى, كۇرەس شەبەرى بولعان بالۋان, ايتا بەرسەك وسىنداي قىرلارى كوپ. جەلتوقسان كوتەرىلىسىندە جانى شىرقىراپ «مەن قازاقپىن» دەگەن ءان جازعان اتپال تۇلعا. وسىنداي ازاماتتى ناسيحاتتاۋ بارىسىندا ءبىزدىڭ قور ءبىرشاما جۇمىس اتقارىپ كەلە جاتىر. 2015 جىلى كەشىن قىتايدا وتكىزسەك, 2019 جىلى ماسكەۋدەگى شاراسىنا دياسپورا وكىلدەرى مەن ءبىر شوعىر زيالى قاۋىم قاتىستى. 2022 جىلى بايان ولگەيدەگى قانداستارىمىزعا كونتسەرت قويىپ قايتتىق, قوردىڭ ۇيىمداستىرۋىمەن تۇركيانىڭ انكارا قالاسىندا كەش بەردىك. مۇنداعى ماقساتىمىز تابىلدىنىڭ اندەرىن كەڭىنەن ناسيحاتتاۋ, شىعارماشىلىعىن ەلگە جەتكىزۋ. الدىڭعى جىلى بارد اقىننىڭ «سامالا سازدار ساعىمى» اتتى نوتالىق جيناعىن شىعاردىق. بۇكىل ونەر مەكتەپتەرىنە, كوللەدجدەرگە, جوعارى وقۋ ورىندارىنا تاراتتىق, – دەيدى ت.دوسىموۆ قورىنىڭ ديرەكتورى بيجان قالماعانبەتوۆ.
مەرەيتوي قارساڭىندا ءازىربايجان مامبەتوۆ اتىنداعى مەملەكەتتىك دراما جانە كومەديا تەاترىندا تابىلدى دوسىموۆتىڭ بولمىسىن ارقاۋ ەتكەن «سايگ ۇلىك» مۋزىكالىق دراماسى قويىلدى. قويىلىمدا ستۋدەنت تابىلدىدان ازامات, اقىن رەتىندە شىڭدالعان تۇلعانىڭ سوم بەينەسى شىنايى كەستەلەنگەن. نامىس پەن جىگەردى تۋ ەتكەن, دوستىق پارىزعا ادال, ازاماتتىق ۇستانىمى بەرىك اقىن بولمىسى جارقىراي اشىلدى. «قازاق ەدىم دەگەنشە», «بيىكتىك», «اناعا حات» سىندى اندەرى جانعا جارىعىن توكتى. سپەكتاكلدە جەلتوقسان كۇندەرىنىڭ زوبالاڭى اسەرلى بەرىلىپ, ونداعى اقىننىڭ ءور بولمىسى ادىپتەلگەن.
– بيىل اقىننىڭ 60 جىلدىعىنا وراي مەرەكەلىك شارالار ءوزىنىڭ تۋعان جەرى اتىراۋدان باستالدى. تابىلدىنىڭ اندەرىنە بايلانىستى سۋرەتشىلەر كورمەسىن وتكىزدىك. وسى ايدا تۋعان جەرى دەندەردە تابىلدى دوسىموۆ شىعارماشىلىعىنىڭ ايماقتىق بايقاۋى وتەدى. 2021 جىلدان باستاپ رەسپۋبليكالىق بايقاۋىن اقتوبە قالاسىندا وتكىزىپ كەلەمىز, قىركۇيەك ايىنىڭ باسىندا سول شىعارماشىلىق بايقاۋ قايتا جوسپارلانىپ وتىر. تابىلدىنىڭ تۋعان جەرىنە ەسكەرتكىش ورناتساق, دەرەكتى فيلم تۇسىرسەك دەگەن جوسپارىمىز بار. سونىمەن قاتار تۇڭعىش بارد اقىن مۇراجايىن اشسام دەگەن ارمان. استانادا قىركۇيەك-قازان ايلارىندا ۇلكەن مەرەيتويلىق كەش بەرسەك دەپ وتىرمىز, – دەيدى ب.قالماعانبەتوۆ.
كۇرەسكەر ەر, شىعارماشىل تۇلعانىڭ سيپاتى كەيىنگىگە ۇلگى. ءبىز تابىلدى دوسىموۆ بولمىسى ارقىلى بولاشاق كەمەسىن ەنجارلىقتان ساقتاپ, بىرەگەي رۋحپەن بەتتەستىرەمىز. ول – ۇلتتىق رۋح دانەگى.
