فوتو: اشىق دەرەككوزدەن
ءىس-شاراعا يندۋستريا جانە قۇرىلىس ءمينيسترى ەرسايىن ناعاسپاەۆ, قالا اكىمدەرى, ءتيىستى ۆەدومستۆولاردىڭ باسشىلارى, سونداي-اق بارلىق وبلىس ورتالىقتارى اكىمدەرىنىڭ ورىنباسارلارى, اۋدان باسشىلارى, ساۋلەتشىلەر مەن قالالىق ورتانى كوگالداندىرۋ جانە جارىقتاندىرۋ جونىندەگى ماماندار, ەلىمىزدىڭ بارلىق وڭىرىنەن 100-دەن استام ادام قاتىستى.
استانا اكىمى جەڭىس قاسىمبەك ەلوردانى دامىتۋدىڭ ستراتەگيالىق باعىتتارى جونىندە باياندادى. اكىم اتاپ وتكەندەي, ەلوردا تۇرعىندارىنىڭ سانى 1,5 ميلليون ادامعا جەتىپ, جىل سايىن شامامەن 7%-عا ءوسىپ كەلەدى. وسىعان وراي قالانىڭ جاڭا باس جوسپارى قابىلداندى. وندا 2030 جىلعا قاراي حالىق سانى 2,3-2,5 ميلليون ادامعا دەيىن ارتادى دەپ بولجانعان. سونداي-اق سەميناردا ەسكى تۇرعىن ۇيلەردى جاڭارتۋ باعدارلاماسى تالقىلاندى. 2030 جىلعا دەيىن 206 اپاتتى ءۇيدىڭ تۇرعىندارى جاڭا باسپاناعا كوشىرىلەدى. قالانىڭ قۇرىلىس ساياساتىندا الەۋمەتتىك ينفراقۇرىلىمدى دامىتۋعا, اباتتاندىرۋعا, جاسىل ايماقتار قۇرۋعا باسىمدىق بەرىلەدى. بارلىق جۇمىس «ادامدارعا ارنالعان قالا» قاعيداتىنا نەگىزدەلىپ وتىر.
استانادا كولىك جۇيەسىن دامىتۋ دا – باستى باعىتتاردىڭ ءبىرى. قوعامدىق كولىكتىڭ ۇلەسىن قازىرگى 41%-دان 71%-عا دەيىن ارتتىرۋ كوزدەلىپ وتىر. بۇل رەتتە اۆتوبۋس پاركى جاڭارتىلىپ, جاڭا جولايىرىقتار سالىنادى. سونىمەن قاتار LRT جوباسىن ىسكە اسىرۋ جالعاسىپ جاتىر. العاشقى جەلىنىڭ سىناق رەجىمىندە ىسكە قوسىلۋى بيىلعى قىركۇيەككە جوسپارلانعان.
ەكولوگيا جانە كوگالداندىرۋ ماسەلەسى دە – ەرەكشە نازاردا. كەيىنگى ءۇش جىل ىشىندە استانادا 2,5 ميلليوننان استام اعاش وتىرعىزىلدى. قالادا كوگالداندىرۋ ەرەجەلەرى قابىلدانىپ, اعاشتاردى تسيفرلاندىرۋ جۇيەسى ەنگىزىلدى. كىشى تالدىكول اۋماعىندا ەكوپارك سالىنادى, سونداي-اق Green Line جاياۋ جۇرگىنشىلەر جولى مەن Damu پاركى قولعا الىنادى. ەلوردادا كرەاتيۆتى يندۋستريا مەن وقيعالى تۋريزم دە دامىپ كەلەدى.
سەميناردىڭ باستى تاقىرىبى وڭىرلەر اراسىنداعى ءوزارا ءىس-قيمىلدى نىعايتۋ, قالالاردى تۇراقتى دامىتۋ سالاسىندا تاجىريبە الماسۋ بولدى. شاقىرىلعان ساراپشىلار قاتارىندا Lda Design بريتاندىق ساۋلەت بيۋروسىنىڭ باسشىسى اندرەي ەلباەۆ لاندشافتتىق شەبەرلىك جوسپارلاۋ تاسىلدەرىن, تۇراقتى دامۋدىڭ حالىقارالىق مىسالدارىن ۇسىندى. اباتتاندىرۋ جونىندەگى ساراپشى تاتيانا ناگ قالالاردا كوگالداندىرۋ ساپاسىنىڭ ستاندارتتارىن ەنگىزۋ تۋرالى اڭگىمەلەدى. ساۋلەتتىك جارىقتاندىرۋ جونىندەگى مامان اندرەي ناۋموۆ قالانىڭ اتموسفەراسىن قالىپتاستىرۋ قۇرالى رەتىندە جارىقتىڭ ماڭىزدىلىعىن اتاپ ءوتتى.
سەمينارعا قاتىسۋشىلار قالانىڭ نەگىزگى نىساندارىن, بەيبىتشىلىك, ساتباەۆ كوشەلەرىن, اتاتۇرىك ساياباعى, بەيبىتشىلىك جانە كەلىسىم سارايى, ۇلىتاۋ اللەياسى, اۋەجاي جانىنداعى LRT ستانساسى, GreenLine بۋلۆارى, باسقا دا بىرقاتار قوعامدىق كەڭىستىكتەردى ارالاپ كوردى. تانىسۋ بارىسىندا جايلى قالالىق ورتانى قالىپتاستىرۋدىڭ پراكتيكالىق تاسىلدەرى – اعاش وتىرعىزۋ, جاسىل ايماقتاردى ۇيىمداستىرۋدان باستاپ, اباتتاندىرۋدا زاماناۋي ماتەريالدار مەن شەشىمدەردى قولدانۋعا دەيىنگى ادىستەر جان-جاقتى ءسوز بولدى.
