بيىل حيميا ءپانى بويىنشا 57-ءشى حالىقارالىق وليمپيادا بىرىككەن اراب امىرلىكتەرىندە ءوتتى. الەمنىڭ 93 ەلىنەن 360-تان استام وقۋشى قاتىسقان بۇل زياتكەرلىك دودا – دۇنيەجۇزىندەگى ەڭ بەدەلدى پاندىك جارىستاردىڭ ءبىرى. ايتا كەتەرلىگى, وسىناۋ ءبىلىم بايگەسىنە ء ار مەملەكەتتەن ءارى كەتسە ءتورت وقۋشى عانا قاتىسا الادى. ال قازاقستان ۇلتتىق قۇراماسىنداعى ءتورت وقۋشىنىڭ تورتەۋى دە تاماشا ناتيجە كورسەتىپ, ەكى التىن, ەكى كۇمىس مەدالعا قول جەتكىزدى.
«IChO حالىقارالىق حيميا وليمپياداسىنا قازاقستان قۇراما كومانداسى العاش رەت 1998 جىلى قاتىستى. سودان بەرى جۇلدە قورجىنىمىز 12 التىن, 37 كۇمىس, 48 قولا جۇلدەمەن تولىقتى. ال بيىلعى ناتيجەگە كەلەر بولساق, استاناداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 12-سىنىپ وقۋشىلارى ابىلاي قابدۋلحادىر مەن كيريلل كيم التىن مەدال يەگەرى اتانسا, كۇمىس مەدالدى اقتوبە وبلىسىنداعى ء«بىلىم-يننوۆاتسيا» ليتسەيىنىڭ 10-سىنىپ وقۋشىسى اڭسار جاقسىلىقوۆ پەن الماتى قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ەڭلىك باقىتبەكوۆا يەلەندى. ايتا كەتەرلىگى, كيريلل IChO-دا وسىمەن ەكىنشى رەت التىننان القا تاعىپ وتىر, ال ابىلاي وتكەن جىلى ءدال وسى حالىقارالىق دودادا كۇمىس مەدال يەلەنسە, بيىل ناتيجەسىن جاقسارتىپ, ءبىرىنشى ورىننىڭ تۇعىرىنان كورىندى.
قازاقستان قۇراما كومانداسىنىڭ جەتەكشىسى سانجار بەگدايىر مەن رينات ەلەۋسىزوۆتىڭ ايتۋىنشا, بيىلعى ناتيجە – رەكوردتىق كورسەتكىش.
«ەكى كەزەڭنەن تۇراتىن وليمپيادانىڭ العاشقى تەوريالىق سىناعىندا ءبىزدىڭ وقۋشىلار ەش مۇدىرمەدى. ال پراكتيكالىق كەزەڭنىڭ ەسەپتەرى ءبىرشاما كۇردەلى بولعان. بىراق بالالار وسىلاي شىڭدالادى, ناتيجەلەرى دە جىلدان جىلعا جاقسارىپ كەلەدى. جالپى, سايىس وتە تارتىستى ءوتتى. ويتكەنى بيىل جارىسقا قاتىسۋشى مەملەكەتتەر سانى ءبىرشاما ارتقان. ايتا كەتەرلىگى, ەلىمىز ءدال وسى حيميا وليمپياداسىنان ءتورتىنشى جىل قاتارىنان التىن مەدال الىپ كەلەدى. «چەمپيون بولۋ قيىن. چەمپيوندىقتى ساقتاپ قالۋ ودان دا قيىن» دەگەندەي, بيىل دا وقۋشىلارىمىز ەل ءۇمىتىن اقتاپ, بۇعان دەيىنگى رەكوردتىق كورسەتكىشتى جاڭارتتى», دەيدى س.بەگدايىر.
قۇراما كوماندا مۇشەلەرى وليمپيادانىڭ الدىندا وقۋ-اعارتۋ مينيسترلىگىنىڭ, «دارىن» رەسپۋبليكالىق عىلىمي-پراكتيكالىق ورتالىعىنىڭ قولداۋىمەن بىرنەشە رەسپۋبليكالىق جانە حالىقارالىق وقۋ-جاتتىعۋ جيىنىنا قاتىسىپ, بىلىمدەرىن شىڭداعان. سودان كەيىن جۇزدەگەن وقۋشىدان ۇزدىك تورتەۋى ىرىكتەلىپ, الەمدىك دودادا باق سىنادى.
ايتا كەتەيىك, حالىقارالىق ءىرى وليمپيادالاردا جەڭىسكە جەتكەن وقۋشىلارعا ەلىمىزدىڭ جوعارى وقۋ ورىندارىنا كونكۋرستان تىس گرانتپەن وقۋعا تۇسۋگە مۇمكىندىك بەرىلەدى. سونداي-اق اقشالاي سىياقى تولەنەدى ءارى وقۋشىلاردى دايىنداعان تالىمگەرلەرىنە دە ماراپات قاراستىرىلعان.
