فوتو: ەكولوگيا جانە تابيعي رەسۋرستار مينيسترلىگى
اتالعان ەكوچەللەندج تابيعاتتى ساقتاۋدا ءار ادامنىڭ ۇلەسىنىڭ ماڭىزدى ەكەنىن ەسكە سالۋعا باعىتتالعان. اعاش وتىرعىزۋ, ءبىر رەتتىك پلاستيكتەن باس تارتۋ, قوقىس جيناۋ, سۋ ايدىندارىنىڭ تازالىعىن ساقتاپ, بالالاردىڭ بويىنا ەكولوگيالىق مادەنيەتتى ءسىڭىرۋ سەكىلدى كۇندەلىكتى قاراپايىم ارەكەتتەردىڭ ءوزى ەكولوگيالىق جاعدايدى جاقسارتۋ مەن قورشاعان ورتاعا جاۋاپكەرشىلىكپەن قاراۋدى قالىپتاستىرۋ جولىندا ماڭىزدى ءرول اتقاراتىنى ءمالىم.
«بارلىق ازاماتتاردى, قوعامدىق ۇيىمداردى, ۆولونتەرلەردى جانە ەكو-اكتيۆيستەردى چەللەندجدى قولداۋعا شاقىرامىز. قاتىسۋ ءۇشىن ەكولوگياعا پايدالى ءىس-ارەكەتتى جاساپ جاتقان ساتىڭىزدە (ماسەلەن قوقىستى سۇرىپتاۋ, ۆەلوسيپەدپەن ءجۇرۋ, سەنبىلىككە قاتىسۋ, اعاش وتىرعىزۋ نەمەسە كۇندەلىكتى ومىردە ەكولوگيالىق سانالى ارەكەتتەر جاساۋ) سۋرەتكە ءتۇسىپ, ونىمەن الەۋمەتتىك جەلىلەردە ءبولىسۋ قاجەت. ەڭ باستىسى – فوتوسۋرەت ءسىزدىڭ جەكە بەلسەندىلىگىڭىز بەن تابيعاتقا دەگەن قامقورلىعىڭىزدى كورسەتۋى كەرەك. چەللەندجدى قولداپ, تابيعاتقا جاساعان يگى ىستەرىڭىزبەن ءبولىسىپ, اينالاڭىزعا ۇلگى بولىڭىز! تابيعي بايلىعىمىزدى وسكەلەڭ ۇرپاققا بىرگە ساقتاپ قالايىق», دەلىنگەن ەكولوگيا جانە تابيعي رەسۋرستار مينيسترلىگىنىڭ حابارلاماسىندا.
