ىرىكتەۋ سايىستارىنا ەلىمىزدىڭ ءتورت ويىنشىسى قاتىسقان ەدى. وكىنىشكە قاراي, دميتري پوپكو, ميحايل كۋكۋشكين, تيموفەي سكاتوۆ سىندى تانىمال ويىنشىلار بۇل سىناقتان وتە المادى. بۇل رەتتە تەك بەيبىت جۇقاەۆتىڭ جولى بولدى. بىراق ول دا الىسقا شابا المادى. نەگىزگى جارىستىڭ تۇساۋكەسەر كەزدەسۋىندە قازاق تەننيسشىسى يتاليالىق فلاۆيو كوبولليگە (3:6, 6:7, 1:6) ەسە جىبەردى. سونداي-اق الەكساندر بۋبليك يسپانيالىق حايمە مۋناردان (4:6, 6:3, 6:4, 6:7, 2:6), الەكساندر شەۆچەنكو امەريكالىق رايلي وپەلكادان (3:6, 5:7, 6:7) ايلاسىن اسىرا المادى. يۋليا پۋتينتسەۆا اقش-تىڭ وكىلى اماندا انيسيموۆامەن بولعان باسەكەدە بىردە-ءبىر گەيمدە جەڭىسكە جەتە الماي, تازا ۇتىلدى, ەسەپ – 0:6, 0:6.
ەلىمىزدىڭ ەڭ ۇزدىك تەننيسشىسى ەلەنا رىباكينا باستاپقى باسەكەدە ارمەنيالىق ەلينا اۆانەسياندى (6:2, 6:1) تىرپ ەتكىزبەي تىزە بۇكتىردى. ەكىنشى كەزەڭدە گرەكيالىق ماريا ساككاريمەن شەبەرلىك بايقاستى. ەكى سەتتىك باسەكە جەرلەسىمىزدىڭ ايقىن جەڭىسىمەن اياقتالدى (6:3, 6:1). الايدا ءۇشىنشى اينالىمدا ەلەنا بىلگەنىنەن جاڭىلدى. WTA رەيتينگىندە وزىنەن
10 ساتى تومەن تۇرعان 22 جاستاعى دانيالىق كلارا تاۋسوننان ويدا جوقتا جەڭىلدى – 6:7, 3:6. سونىمەن, «ۋيمبلدون-2022» جارىسىنىڭ جەڭىمپازى, بىلتىر جارتىلاي فينالعا دەيىن جەتكەن ە.رىباكينا بيىل سول كورسەتكىشتەرىنە جاقىنداي دا العان جوق.
جۇپتىق سايىستاردا دا جولىمىز بولمادى. چەحيالىق ماريا بوۋزكوۆامەن يىق تىرەسە ويناعان اننا دانيلينا ەكىنشى كەزەڭدە ۆەرونيكا كۋدەرمەتوۆا (رەسەي) مەن ەليزە مەرتەنسكە (بەلگيا) جول بەردى. ميكستە دە دانيلينا تۇساۋكەسەر كەزدەسۋدە جەڭىلىستىڭ كەرمەك ءدامىن تاتتى. سول سەكىلدى سايىستىڭ وسى تۇرلەرىنەن باق سىناعان باسقا تەننيسشىلەرىمىز دە وسالدىق تانىتتى.
كاسىپقوي تەننيسشىلەرىمىز ءوز جانكۇيەرلەرىنە قۋانتا الماعانىمەن, «ۋيمبلدوندا» جاستار بۋىنى وكىلدەرى ءتاۋىر ونەر كورسەتتى. اسىرەسە ءامىر ومارحانوۆقا ريزا بولدىق. رەسەيلىك ەگور پليشيۆتسەۆپەن جۇپ قۇرعان ول جارتىلاي فينالعا دەيىن جەتتى. بۇل مەجەدە ولار وسكار پالانديۋس (فينليانديا)/الان ۆاجنىعا (پولشا) جول بەردى, ەسەپ – 4:6, 6:4, 5:10. سول سەكىلدى شيرەك فينالعا دەيىن جەتكەن زاڭعار نۇرلان ۇلى مەن دامير جالعاسبايدىڭ دا ونەرى جاقسى اسەر قالدىردى.
جالپى, بيىلعى «ۋيمبلدوندا» كوپتەگەن سەنساتسيالىق ناتيجەلەر تىركەلدى. ماسەلەن, ەرلەر مەن ايەلدەردىڭ رەيتينگىندە توپ-10-دىققا ەنگەن سەگىز بىردەي ساقا سپورتشى العاشقى اينالىمنان اسا المادى. اتاپ ايتساق, دانيل مەدۆەدەۆ (رەسەي, اتر №9) بەنجامەن بونزيدەن (فرانتسيا), الەكساندر زۆەرەۆ (گەرمانيا, №3) ارتۋر ريندەركنەشنەن (فرانتسيا), لورەنتسو مۋزەتتي (يتاليا, №7) نيكولوز باسيلاشۆيليدەن (گرۋزيا), حولگەر رۋنە (دانيا, №8) نيكولاس حارريدەن (چيلي), كوري گاۋفف (اقش, WTA №2) دايانا ياسترەمسكايادان (ۋكراينا), دجەسسيكا پەگۋلا (اقش, №3) ەليزابەتتا كوچچارەتتودان (يتاليا), چجەن تسينۆەن (قىتاي, №5) كاتەرجينا سينياكوۆادان (چەحيا), پاۋلا بادوسا (يسپانيا, №9) كەتي بۋلتەردەن ( ۇلىبريتانيا) ۇتىلدى. بۇرىن-سوڭدى «ۇلكەن دۋلىعا» ساناتىنداعى باسەكەلەردە ءدال مۇنداي جاعداي تىركەلمەگەن.
ەرلەر باسەكەسىندە اتر رەيتينگىندە العاشقى التى ورىندى يەلەنىپ وتىرعان تەننيسشىلەر جارتىلاي فينالعا ەش كەدەرگىسىز جەتتى. بۇل مەجەدە يتاليالىق ياننيك سيننەر (اتر №1) سەربيالىق نوۆاك دجوكوۆيچتى (اتر №6) جەڭدى. داڭقى جەر جارعان 38 جاستاعى دجوكوۆيچ 23 جاستاعى سيننەرگە جارىتىپ قارسىلىق كورسەتە المادى – 6:3, 6:3, 6:4. يسپانيالىق كارلوس الكاراس (اتر №2) پەن امەريكالىق تەيلور فريتس (اتر №5) اراسىنداعى باسەكە العاشقىسىنىڭ پايداسىنا شەشىلدى – 6:4, 5:7, 6:3, 7:6. فينالدا الەمنىڭ ءبىرىنشى, ەكىنشى راكەتكالارى ءوزارا كۇش سىناستى. بۇل باسەكەدە ياننيك سيننەر 4:6, 6:4, 6:4, 6:4 ەسەبىمەن جەڭىسكە جەتتى.
ايەلدەر اراسىنداعى فينالدا امەريكالىق اماندا انيسيموۆا مەن پولشالىق يگا شۆەنتەك شەبەرلىك بايقاستى. سونىڭ الدىندا عانا اقش-تىڭ وكىلى الەمنىڭ بىرىنشە راكەتكاسى بەلارۋستىك ارينا سوبولەنكوعا سان سوقتىرسا, قارت قۇرلىقتىڭ وكىلى وليمپيادا چەمپيونى, شۆەيتساريالىق بەليندا بەنچيچتەن باسىم ءتۇستى. شەشۋشى سىندا شۆەنتەك انيسيموۆاعا ادىم اشتىرماي, 6:0, 6:0 ەسەبىمەن تاس-تالقانىن شىعاردى. ماتچ نەبارى 57 مينۋتكە سوزىلدى. ءدال وسىنداي ناتيجە «ۇلكەن دۋلىعا» دودالارىندا 1988 جىلى تىركەلگەن. سول كەزدە «رولان گارروستا» شتەففي گراف ناتاليا زۆەرەۆانى تازا ۇتقان ەدى. ال «ۋيمبلدوندا» وسىنداي جاعداي وسىدان 114 جىل بۇرىن بولعان. ءسويتىپ, يگا شۆەنتەك تۇڭعىش رەت «ۋيمبلدوننىڭ» جەڭىمپازى اتاندى.
جارىستىڭ جەكەلەي سايىستارىنىڭ جەڭىمپازدارى وسى جولى 3 ميلليون فۋنت-ستەرلينگى ($4 ملن) ولجالادى. فينالدا ۇتىلعاندارعا جوعارىداعى سومانىڭ تەڭ جارتىسى بۇيىردى. جارتىلاي فينالعا جەتكەندەر 775 000-نان ($1 ملن) يەلەنسە, شيرەك فينالعا شىققاندار 400 000-نان ($540 000) ەنشىلەدى. تىپتەن تۇساۋكەسەر كەزدەسۋلەرىندە ۇتىلعان ويىنشىلاردىڭ وزدەرى سىياقىسىز قالمايدى. ولارعا 66 000 فۋنت-ستەرلينگ ($89 000) تيەسىلى.
