فوتو: سۋ رەسۋرستارى جانە يرريگاتسيا مينيسترلىگى
وبلىس اكىمدىكتەرى قازىرگى ۋاقىتتا 19 گيدروتەحنيكالىق نىسانعا كوپفاكتورلى زەرتتەۋ جۇمىستارىن جۇرگىزىپ جاتىر. بۇگىندە اقمولا, ماڭعىستاۋ, پاۆلودار وبلىستارىنداعى ءۇش نىساندا جۇمىستار اياقتالسا, شقو, بقو, سقو اۋماقتارىندا زەرتتەۋ جالعاسىپ جاتىر.
سۋ سالاسىن دامىتۋدىڭ كەشەندى جوسپارى شەڭبەرىندە بيىل اكىمدىكتەر اقمولا, اقتوبە, الماتى, جامبىل, شىعىس قازاقستان, باتىس قازاقستان, قوستاناي, ماڭعىستاۋ, پاۆلودار, سولتۇستىك قازاقستان, ياعني 10 وبلىستا 105 گيدروتەحنيكالىق نىساندى زەرتتەۋدى جوسپارلاپ وتىر.
سۋ رەسۋرستارى جانە يرريگاتسيا ۆيتسە-ءمينيسترى ەربولات يبرايحانوۆتىڭ ايتۋىنشا جالپى 2028 جىلدىڭ سوڭىنا دەيىن 557 گيدروتەحنيكالىق نىسانعا زەرتتەۋ جۇرگىزۋ جوسپارلانعان.
«كوپفاكتورلى زەرتتەۋ وبەكتىنىڭ جانە ونىڭ جابدىقتارىنىڭ تەحنيكالىق جاعدايىن, سونداي-اق قاجەت بولاتىن جوندەۋ جۇمىستارىنىڭ كولەمى مەن تۇرلەرىن ناقتىلاۋعا مۇمكىندىك بەرەدى. بىلتىر سالا مينيسترلىگى 14 وبلىستا 84 نىساندا كوپفاكتورلى زەرتتەۋ جۇرگىزدى. بۇل جوسپارلانعاننان دا ارتىق», دەدى ە.يبرايحانوۆ.
