كوكشەتاۋدا «نۇرلى جول» باعدارلاماسىمەن 337 پاتەر كىلتى تاپسىرىلدى

كوكشەتاۋ. 19 ناۋرىز. شاپاعاتى مول ناۋرىز مەرەكەسى قارساڭىندا اقمولا وبلىسىنىڭ اكىمى س.كۋلاگين مەن «قازاقستاننىڭ يپوتەكالىق كومپانياسى» اق باسقارۋشى ديرەكتورى ا.اقچۋريننىڭ قاتىسۋىمەن الەۋمەتتىك تۇرعىن ءۇيدى جالعا بەرۋ باعدارلاماسى اياسىندا سالىنعان «جانسايا» تۇرعىن ءۇي كەشەنىندە جاڭا پاتەرلەردىڭ كىلتتەرىن تاپسىرۋ سالتاناتى وتكىزىلدى. ءوڭىر باسشىسى سەرگەي كۋلاگين, «بايتەرەك» ۇلتتىق باسقارۋشى حولدينگى» اق دەپارتامەنت باسشىسى قانات ىبىراەۆ قۋانىش يەلەرىن قۇتتىقتاۋ سوزىندە پرەزيدەنت نۇرسۇلتان نازارباەۆتىڭ قازاقستان حالقىنا ارناعان «نۇرلى جول – بولاشاققا باستار جول» جولداۋىندا الەۋمەتتىك تۇرعىن ۇيلەردى جالعا بەرۋ قۇرىلىسىنا كوزقاراستى وزگەرتۋ, ونىڭ قولجەتىمدىلىگى مەن اشىقتىعىن قامتاماسىز ەتۋ, تۇرعىندارعا ساتىپ الۋ قۇقىعىن بەرە وتىرىپ, ۇزاق مەرزىمدى تومەنگى پايىزدىق جۇيەنى ەنگىزۋدى تاپسىرعانىن اتاپ كورسەتتى. وڭىرلەردى دامىتۋدىڭ 2020 جىلعا دەيىنگى باعدارلاماسىنىڭ شاراپاتى رەتىندە بۇگىن اسەم تۇرعىن ءۇي كەشەنىندە 19,5 مىڭ شارشى مەترلىك 337 پاتەردىڭ كىلتى تاپسىرىلادى. مۇنىڭ ءوزى يگى باستامانىڭ جالعاسىن تابا بەرەتىنىن دالەلدەيدى. كوكشەتاۋ تاريحىندا ءبىر مەزەتتە 337 وتباسىنىڭ قونىس قۋانىشى بولىپ كورمەگەن. ءبىز №264 پاتەردىڭ كىلتىن يەلەنگەن كاكىمبەكوۆتەردىڭ وتاۋىنا قۇتتى بولسىن ايتتىق. الىبەك پەن جانسايا ەكى بالا ءوسىرىپ وتىرعان جاس وتباسى. «ءبىز وسى كۇنگە دەيىن 8 جىل بويى پاتەر جالداپ تۇردىق. ءوزىم مەديتسينا قىزمەتكەرىمىن. كۇيەۋىم مەملەكەتتىك كىرىس دەپارتامەنتىندە جۇمىس ىستەيدى. مەملەكەتىمىزدىڭ قوعام مۇشەلەرىنە جاساپ جاتقان قامقورلىعىنا ريزامىز. بالالارىمنىڭ دا قۋانىشىندا شەك جوق. مەنىڭ ەسىمىممەن اتتاس «جانسايا» تۇرعىن ءۇي كەشەنىن سالۋعا ۇلەس قوسقان بارشا ازاماتتارعا العىسىمىز شەكسىز. سوڭعى جىلدارى كوكشەتاۋدا تۇرعىن ۇيلەر كوپتەپ سالىنىپ جاتىر. ءبىز سياقتى كەزەكتە تۇرعان جەرلەستەرىم دە كوپ ۇزاماي قونىس تويلارىن جاسايتىندىعىنا سەنەمىن», دەيدى جانسايا. باقبەرگەن امالبەك. دەرەك: egemen.kz سۋرەت: egemen.kz