فوتو: gov.kz
رەسپۋبليكالىق بيۋدجەتتىڭ 50%-دان استامى جىل سايىن الەۋمەتتىك سالانى قارجىلاندىرۋعا باعىتتالادى. قاراجات زەينەتاقىعا, بيۋدجەت قىزمەتكەرلەرىنىڭ جالاقىسىنا, كوپ بالالى وتباسىلارعا, از قامتىلعان ازاماتتارعا, مۇگەدەكتىگى بار ادامدارعا ارنالعان جاردەماقىلارعا, سونداي-اق مەكتەپ, اۋرۋحانا سالۋعا جانە ينفراقۇرىلىمدى دامىتۋعا جۇمسالادى. بۇل باعىتتا ۇكىمەت جۇيەلى جۇمىس جۇرگىزىپ جاتىر.
سونىمەن قاتار قازىرگى ۋاقىتتا بولىنەتىن رەسۋرستاردى پايدالانۋ تيىمدىلىگىنە باقىلاۋ كۇشەيتىلگەن. بىرقاتار پارامەتر مەن تاسىلدەردى قايتا باعالاۋ جۇرگىزىلەدى.
پرەمەر-مينيستر جۇرگىزىلگەن تالداۋ شەڭبەرىندە الەۋمەتتىك ادىلەتتىلىك قاعيداتىنا قايشى كەلەتىن قولداۋ شارالارىن تەرىس پايدالانۋ فاكتىلەرى انىقتالعانىن اتاپ ءوتتى.
ء«بىز قازىر ەلىمىزدىڭ بارلىق حالقىن التى ساناتقا بولگەن جولمەن ءجۇرىپ جاتىرمىز. وتباسىنىڭ تسيفرلىق كارتاسى جۇمىس ىستەيدى, دەرەكتەر تسيفرلانعان, بارلىعى ءال-اۋقات دەڭگەيى بويىنشا بولىنەدى. التىنشى سانات – تابىس دەڭگەيى جەتكىلىكتى جوعارى وتباسىلار مەن ادامدار. التىنشى ساناتتى ءبىز الەۋمەتتىك كومەك الۋشىلار قاتارىنان الىپ تاستايمىز, ءوزىن قامتاماسىز ەتە المايتىندارعا, جۇمىس ىستەي المايتىندارعا كوبىرەك كوڭىل بولەمىز. مىسالى, بالالارمەن اينالىساتىندىقتان كوپ بالالى انالار, دەنساۋلىعىنا بايلانىستى مۇمكىندىگى شەكتەۋلى ازاماتتار جۇمىس ىستەي المايدى. ءبىز ولارعا كوپ كوڭىل بولەتىن بولامىز. وكىنىشكە وراي, بىزدە الەۋمەتتىك تاۋەلدىلىك پەن الەۋمەتتىك الاياقتىق فاكتىلەرى بار. ءبىز قازىر ءار ءىستى جەكە-جەكە شەشىپ, بارلىق باسقا سحەمالاردىڭ جولىن كەسەمىز. الەۋمەتتىك كومەك ءوزىن قامتاماسىز ەتە المايتىن ادامدارعا كورسەتىلۋى ءتيىس», دەدى ولجاس بەكتەنوۆ.
