ءىس-شاراعا مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ توراعاسى قايرات قامباروۆ, «اسسامبلەيا جاستارى» رەسپۋبليكالىق جاستار ۇيىمىنىڭ توراعاسى, «دارىن» مەملەكەتتىك سىيلىعىنىڭ لاۋرەاتى تيمۋر جۇمىرباەۆ, سونداي-اق «Talapai» جوباسىنىڭ اۆتورى, 2023 جىلعى «تاۋەلسىزدىك ۇرپاقتارى» گرانتىنىڭ يەگەرى اينۇر پولاتوۆا قاتىستى.
قايرات قامباروۆتىڭ ايتۋىنشا, جاستاردى قولداۋ – مەملەكەتتىك ساياساتتىڭ باستى باسىمدىقتارىنىڭ ءبىرى. وسى ماقساتتا دارىندى جاستاردى قولداۋعا ارنالعان بىرقاتار باعدارلامالار مەن جوبالار جۇزەگە اسىرىلىپ كەلەدى.
سولاردىڭ ءبىرى – 1992 جىلى تاعايىندالعان «دارىن» مەملەكەتتىك جاستار سىيلىعى. سىيلىق «ادەبيەت», «عىلىم», «ديزاين جانە بەينەلەۋ ونەرى», «جۋرناليستيكا», «كلاسسيكالىق مۋزىكا», «قوعامدىق قىزمەت», «سپورت», «تەاتر جانە كينو», «ەسترادا», «حالىق شىعارماشىلىعى» سياقتى ون اتالىم بويىنشا تابىستالادى.
وسى ۋاقىتقا دەيىن بۇل ماراپاتتى ەلىمىزدەن بولەك شەتەلدەردە جەتىستىككە جەتكەن 360-تان استام جاس يەلەندى.
ءار جىلدارى ەلىمىزدىڭ تۋىن الەمگە تانىتقان سپورتشىلارىمىز ولگا شيشيگينا, سەرىك ساپيەۆ, دانيار ەلەۋسىنوۆ, دينارا سادۋاقاسوۆا, دەنيس تەن, ونەر سالاسىندا وزىندىك ورنى بار امانجول التاەۆ, ايگۇل يمانباەۆا, دوسىمجان تاڭاتاروۆ, ماريا مۋدرياك, ديماش قۇدايبەرگەن, «مۋز ارت», «جىگىتتەر» جانە « ۇلىتاۋ» توپتارى, عىلىم سالاسىندا ماكسيم زدوروۆەتس, ماقسات جاباگين, جۋرناليستيكا سالاسىندا گۇلناز الىمگەرەي, ماقپال جۇماباي, يرينا تەن سىندى ونەرلى, تالانتتى قوعام قايراتكەرلەرى «دارىن» مەملەكەتتىك جاستار سىيلىعىنىڭ لاۋرەاتتارى اتانعان.
بيىل «دارىن» سىيلىعىنا قۇجات قابىلداۋ 26 ماۋسىمنان 27 تامىزعا دەيىن جالعاسادى. سىيلىق يەگەرىنە «دارىن» مەملەكەتتىك جاستار سىيلىعىنىڭ لاۋرەاتى» اتاعى, ديپلوم, توسبەلگى مەن اقشالاي سىياقى تابىستالادى.
2024 جىلدان باستاپ سىيلىقتىڭ مولشەرى ءار نوميناتسيا بويىنشا 600 مىڭ تەڭگەدەن 1 ميلليون تەڭگەگە كوبەيدى.
سونداي-اق 2021 جىلدان بەرى مەملەكەت باسشىسىنىڭ باستاماسىمەن شىعارماشىل جاستاردى قولداۋ ماقساتىندا جىل سايىن «تاۋەلسىزدىك ۇرپاقتارى» گرانتى ءبولىنىپ كەلەدى. ونىڭ كولەمى – 3 ملن تەڭگە.
گرانت كونكۋرستىق نەگىزدە التى باعىت بويىنشا – «عىلىم», «مادەنيەت», «اقپاراتتىق تەحنولوگيالار», «بيزنەس», «مەديا» جانە «ۆولونتەرلىك» جوبالاردى ىسكە اسىرۋ ءۇشىن بەرىلەدى. بۇعان دەيىن 123 جاس ماماننىڭ يننوۆاتسيالىق جوباسى قولداۋ تاپتى. گرانتقا 14 جاستان 35 جاسقا دەيىنگى ەل ازاماتتارى ۇمىتكەر بولا الادى. بيىل وتىنىمدەر 16 ماۋسىم مەن 18 تامىز ارالىعىندا قابىلدانادى.
بۇدان بولەك, 2023–2029 جىلدارعا ارنالعان قازاقستان رەسپۋبليكاسىنىڭ مەملەكەتتىك جاستار ساياساتى تۇجىرىمداماسى اياسىندا وڭىرلىك «تاۋەلسىزدىك ۇرپاقتارى» گرانتى دا بولىنەدى.
2025 جىلى جەرگىلىكتى اتقارۋشى ورگانداردىڭ مالىمەتىنە سايكەس, جەرگىلىكتى بيۋدجەت ەسەبىنەن 277 وڭىرلىك گرانت بەرۋ جوسپارلانعان. ايتا كەتۋ كەرەك, گرانت سانى, كولەمى مەن باعىتى جەرگىلىكتى اكىمدىكتەر تاراپىنان ايقىندالادى.
