ريو-دە-جانەيروداعى جيىندا قاتىسۋشى ەلدەر قارۋلى قاقتىعىستاردىڭ كۇشەيۋى, حالىقارالىق ساۋداداعى پروتەكتسيونيزمنىڭ ءوسۋى جانە گەوساياسي قايشىلىقتاردىڭ ۋشىعۋىنا الاڭداۋشىلىق ءبىلدىردى. سونداي-اق قورشاعان ورتا, سور30, جاھاندىق دەنساۋلىق ساقتاۋ ماسەلەلەرى تالقىلاندى. جيىندا وسى تاقىرىپتار بويىنشا ءسوز العان سىرتقى ىستەر ءمينيسترى مۇرات نۇرتىلەۋ ەكوجۇيەلەردى ساقتاۋ, ورمانداردى قورعاۋ, ارال تەڭىزىن قالپىنا كەلتىرۋ جانە مۇزدىقتاردىڭ ەرۋ ۇدەرىستەرىن تەجەۋگە بىرلەسكەن كۇش-جىگەردى قاجەت ەتەتىنىن اتاپ ءوتتى. ءمينيستردىڭ ايتۋىنشا, دەكلاراتسيا قابىلداۋدان بۇرىن ناقتى ارەكەتكە كوشەتىن كەز كەلدى. وسى ورايدا ول قازاقستان برازيليانىڭ COP30 كونفەرەنتسياسىن وتكىزۋىن قولدايتىنىن جەتكىزدى. سونداي-اق م.نۇرتىلەۋ قازاقستان پاريج بويىنشا كليماتتىڭ وزگەرۋىمەن كۇرەس بويىنشا ءىس-شارالاردى ودان ءارى جۇزەگە اسىرۋعا كۇش سالاتىنىن اتاپ ءوتتى.
ءسىم ءباسپاسوزى قىزمەتىنىڭ مالىمەتىنشە, مينيستر دەنساۋلىق ساقتاۋ ماسەلەلەرىنە دە ەرەكشە نازار اۋداردى. ول مەملەكەتتەردى العاشقى مەديتسينالىق-سانيتارلىق كومەكتى دامىتۋ جونىندەگى جاھاندىق كواليتسياعا قوسىلۋعا شاقىردى. ونىڭ نەگىزى دەنساۋلىق ساقتاۋ سالاسىنداعى ماڭىزدى حالىقارالىق قۇجات – 1978 جىلعى الماتى دەكلاراتسياسىنان باستاۋ الادى.
«ەلدەرىمىز تابيعي رەسۋرستارعا, بىلىمگە جانە الەۋەتكە باي. بىراق ەڭ باستىسى ءبىزدى ورتاق مۇددەلەر بىرىكتىرەدى. قازاقستان ادامزات پەن پلانەتا يگىلىگى ءۇشىن بريكس-پەن سەرىكتەستىكتى نىعايتۋعا دايىن. بىرلەسە جانە الدىن الا ارەكەت ەتەيىك. وسى ورايدا بارلىق ەلدى 2026 جىلى قازاقستان بۇۇ-مەن سەرىكتەستىكتە وتكىزەتىن وڭىرلىك ەكولوگيالىق سامميتكە قاتىسۋعا شاقىرامىن», دەدى ءسىم باسشىسى.
سونىمەن قاتار مينيستر ازيا, افريكا مەن لاتىن امەريكاسىنداعى ورتا دەرجاۆالارىنىڭ جاھاندىق شەشىم قابىلداۋ ۇدەرىسىندەگى ءرولىن ارتتىرۋدى قولدايتىنىن جەتكىزدى. وسى تۇرعىدا ول ەلىمىزدىڭ بىرقاتار حالىقارالىق باستامالارى, ونىڭ ىشىندە الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى بۇۇ وڭىرلىك ورتالىعىنىڭ قۇرىلۋىمەن الەمدىك جانە ءداستۇرلى دىندەر ليدەرلەرىنىڭ سەزىن وتكىزۋدى ۇسىندى. بۇعان قوسا مينيستر قازاقستاننىڭ بريكس ەلدەرىمەن ەكونوميكالىق ىنتىماقتاستىقتى كەڭەيتۋگە, تسيفرلىق تەحنولوگيالاردى دامىتۋعا مۇددەلى ەكەنىن ايتتى.
«قازاقستان ادامعا باعىتتالعان, ينكليۋزيۆتى جانە ورنىقتى ءتاسىلدى ىلگەرىلەتۋ جولىندا ىنتىماقتاسۋعا دايىن. بۇل – ادامزات ءۇشىن ادىلەتتى تسيفرلىق بولاشاقتى قامتاماسىز ەتۋ جولى», دەدى ول.
