اقمولا وبلىسىندا سۋ تاسقىنىنا قارسى شارالار كۇشەيتىلدى

كوكشەتاۋ. 19 ناۋرىز. اقمولا وڭىرىندەگى وزەندەردە كوكتەمگى جاۋىن-شاشىنعا بايلانىستى سۋدىڭ ارنادان اسىپ, جايىلۋى مۇمكىندىگى جوققا شىعارىلمايدى. بۇل تۋرالى egemen.kz ءتىلشىسى حابارلادى. كوكتەمگى سۋ تاسقىنىنا بايلانىستى وبلىستا ارنايى شتابتار قۇرىلىپ, بەلگىلەنگەن ءىس-شارالار جوسپارداعى كەستەگە ساي اتقارىلۋدا. وبلىستىق شتاب تاسقىن سۋدىڭ بولجامدىق كولەمى, سۋ قويمالارى مەن گيدروجۇيەلەردىڭ ناقتى جاعدايى تۋرالى مالىمەت بانكىن قالىپتاستىرىپ, اپاتتى جاعدايعا قارسى قيمىلدار كەشەنىن, تۇرعىنداردى جەدەل اقپاراتتاندىرۋ ماسەلەسىن باقىلاۋدا ۇستاپ وتىر. قازىرگى تاڭدا توتەنشە جاعدايلار دەپارتامەنتى اتقارىلعان ىستەرگە تۇراقتى مونيتورينگ جاساپ, ەلدى-مەكەندەردى قاردان تازارتۋ, سۋاعارلاردىڭ, تەحنيكالاردىڭ دايىندىعىن باقىلاۋدا ۇستاۋدا. ارنايى جاتتىعۋلار دا دۇركىن-دۇركىن وتكىزىلۋدە. اتقارۋشى ورگاندار مەن كوممۋنالدىق قىزمەت, اۋىل شارۋاشىلىعى قۇرىلىمدارى اراسىندا مەموراندۋمدار مەن كەلىسىم شارتتار تۇزىلگەن. قولداعى دەرەكتەر بويىنشا, ەلدى مەكەندەردەن 515 مىڭ تەكشە مەتر قار تازارتىلدى. سونداي-اق, مەتر ارىقتار مەن 7 900 مەتر اعىن سۋلار جۇيەسى قالىپقا كەلتىرىلدى. دەپراتامەنت قازىردىڭ وزىندە 678 دانا ينجەنەرلىك, 160 دانا سۋ تارتقىش تەحنيكا مەن 136 ءجۇزۋ قۇرالدارىنىڭ ىسكە كىرىسكەندىگى تۋرالى اقپار تاراتتى. بۇعان قوسا, 20,9 توننا ينەرتتى زاتتار, جەتى مىڭنان استام قاپ دايىندالىپ, 225,7 توننا جانار-جاعار ماي قورلاندى. اۆاريالىق-قۇتقارۋ جۇمىستارىنا 1 628 ادام مەن 406 دانا تەحنيكا جۇمىلدىرىلاتىن بولادى. بۇل ورايدا ءىىم, تجم, «مەديتسينالىق قۇتقارۋ ورتالىعى» مم جانە «قازاۆياقۇتقارۋ» اق قۇرىلىمدارىنىڭ ۇلكەن كۇشى كومەككە كەلەتىندىگىن اتاپ ءوتۋ لازىم. سۋ تاسقىنىنا قارسى كۇرەس ءبىر مەزەتتىك نەمەسە ناۋقاندىق سيپات المايتىنىن ەسكە سالعىمىز كەلەدى. بۇعان دەيىن ماماندار 89 گيدروقۇرىلىمدى ينسپەكتسيالىق تەكسەرىستەن وتكىزدى. ونىڭ قورىتىندىسىمەن اقكول, استراحان, اتباسار, بۇلاندى, بۋراباي, جارقايىڭ جانە شورتاندى اۋداندارىنداعى 26 نىساننىڭ جوندەۋ جۇمىستارىن قاجەت ەتەتىندىگى انىقتالعان. وسىعان بايلانىستى, اسىرەسە, كەز-كەلگەن ساتتە سىر بەرۋى مۇمكىن 15 بوگەت نىعايتىلدى. وبلىس اكىمى تاراپىنان باسقا دا نىساندارعا قاتىستى قارجىلاندىرۋ كوزدەرى ايقىندالىپ جاتىر. باقبەرگەن امالبەك. دەرەك: egemen.kz. سۋرەت ەرمۇرات دوسىموۆ.