قىزداردىڭ قارقىنى باسەڭ

سپورتتىڭ بۇل تۇرىندە ايەلدەر اراسىندا دا قىتايعا تەڭ كەلەر كوماندا جوق. ITTF رەيتينگىنىڭ توپ-10-دىعىنا قىتاي ەلىنىڭ بەس بىردەي بۇرىمدىسى ەنىپ وتىر. ءبىر كەرەمەتى سۋن ينشا, ۆان مانيۋي, چەن سينتۋن, ۆان يدي, كۋاي مان ءبىرىنشى-بەسىنشى ورىنداردى ءوزارا ءبولىسىپ تۇر. بۇل سپورتشىلار­دىڭ بارلىعىنىڭ اتاقتارى الىسقا جايىلعان. اتاپ ايت­ساق, سۋن ينشا وليم­پيا ويىندارىندا 5 (3 التىن+2 كۇمىس), الەم چەمپيوناتىندا 11(9+1+1) رەت جەڭىس تۇعىرىنا كوتەرىلدى. پاريج وليمپياداسىنىڭ جەكەلەگەن سا­يىسىندا كۇمىس الدى. فينالدا چەن مەنگە ەسە جىبەردى. ەسەسىنە سۋن كەيىنگى دۇنيەجۇزىلىك دودادا دارا شىقتى. ۆان ءمانيۋي­دىڭ وليمپيادانىڭ 2, الەم­نىڭ
7 دۇركىن چەمپيونى دەگەن اتا­عى بار. قالعاندارى دا ءبىراز ۋاقىتتان بەرى تالاي ءدۇبىرلى ­دودالاردا دارالانىپ ءجۇر.

جاپونيا قۇراماسىنىڭ دا قارقىنى قۋانتارلىق. كۇن شى­عىس ەلىنىڭ ميۆا حاريموتو, حينا حاياتا, ساتسۋكي ودو, ميما يتو سىندى ارۋلارى ال­تىن­شى-توعىزىنشى ورىنداردى ەنشىلەگەن. ۇزدىك وندىقتى وڭ­تۇستىك كورەيانىڭ وكىلى سين يۋيبين تۇيىندەپ تۇر. ولار­دان بولەك, تاي­پەي, رۋمىنيا, اۋستريا, برازيليا, پۋەرتو-ريكو, ماكاو, مىسىر, فران­تسيا, اقش, ءۇندىستان, اۋسترا­ليا, گونكونگ, نيدەرلاند, كانادا, گەر­­مانيا­نىڭ وكىلدەرىن توپ-50 ويىن­­­شىنىڭ قاتارىنان كەزىك­تىرۋگە بولادى.

وكىنىشكە قاراي, قازىرگى كەزدە ەلىمىزدىڭ ايەلدەر قۇ­را­ماسىنىڭ كورسەتكىشى كو­ڭىل كونشىتەرلىك ەمەس. قىز­دارى­مىزدىڭ اراسىنان ەڭ ءتاۋىر نا­تيجە سارۆينوز مىرقادىروۆا مەن زاۋرەش اقاشەۆاعا تيە­سىلى. ولار ITTF رەيتينگىندە 193, 198-ورىنداردا تۇر. جان­ەركە كوشكىمباەۆا – 238, انگە­لينا رومانوۆسكايا – 348, اراي اقاشەۆا – 437, انەل باقىت – 459, اناستاسيا لاۆروۆا 490-سا­تى­عا تۇراقتاعان.