Facebook تەگىن اقشا اۋدارىمدارى قىزمەتىن ۇسىندى (ۆيدەو)

استانا. 19 ناۋرىز. الەمدەگى ەڭ ءىرى الەۋمەتتىك جەلىلەردىڭ ءبىرى facebook تۇتىنۋشىلارىنا جاڭا قىزمەت ءتۇرىن ۇسىندى. بۇدان بىلاي اتالعان جەلى ارقىلى اقشا اۋدارىمدارىن جۇزەگە اسىرۋعا بولادى. بۇل تۋرالى hitech.vesti.ru حابارلادى. الەۋمەتتىك جەلى بۇل قىزمەتتى ءوزىنىڭ facebook messenger قوسىمشاسى ارقىلى ىسكە قوسپاق. جەلى وكىلدەرى قىزمەتتىڭ تەگىن كورسەتىلەتىنىن ايتىپ وتىر. ياعني قانشا اقشا اۋدارساڭىز دا ەشقانداي ۇستەماقى تولەمەيسىز. بۇل فۋنكتسيا جاقىن ايلاردا messenger-ءدىڭ iOS جانە Android وپەراتسيالىق جۇيەلەرىنە ارنالعان جاڭا نۇسقالارىندا ىسكە قوسىلادى دەپ كۇتىلۋدە. اقشا اۋدارىمدارى Visa جانە MasterCard كارتالارىن جەكە اككاۋنتتارعا تىركەۋ ارقىلى جۇزەگە اسادى. تۇتىنۋشىنىڭ جەكە مالىمەتتەرىنىڭ قاۋىپسىزدىگى ارنايى قۇپيا سوزدەر ارقىلى قامتاماسىز ەتىلەدى. ماسەلەن iOS جۇيەسىن قولدانۋشىلارعا قۇپيا ءسوز رەتىندە Touch ID ارقىلى ءوز قولتاڭبالارىن پايدالانۋعا مۇمكىندىك بار. باستاپقى كەزدە بۇل قىزمەت تەك اقش-تا ىسكە قوسىلادى. از ۋاقىتتان كەيىن جاڭا اقشا اۋدارىم جۇيەسى باسقا ەلدەردە دە قىزمەت كورسەتە باستايدى. ەلامان قوڭىر. دەرەك: hitech.vesti.ru. سۋرەت: sravni.ru.