فوتو: almaty_police_department
الماتى قالالىق پد اكىمشىلىك پوليتسيا باسقارماسىنىڭ پروتسەسسينگ ورتالىعىنىڭ باستىعى ايدىن مەركىمباەۆتىڭ تۇسىندىرۋىنشە, قر-نىڭ «ىشكى ىستەر ورگاندارى تۋرالى» زاڭىنىڭ 6-بابىنا سايكەس, جۇرگىزۋشى كۋالىكتەرىن, ونىڭ ىشىندە حالىقارالىق كۋالىكتەردى بەرۋ ىشكى ىستەر ورگاندارىنىڭ ايرىقشا قۇزىرەتىنە جاتادى. بۇگىندە قازاقستان رەسپۋبليكاسىندا حالىقارالىق جۇرگىزۋشى كۋالىكتەرى بەرىلمەيدى.
حجك ۇلتتىق جۇرگىزۋشى كۋالىگىنىڭ ورنىن باسپايدى, تەك ونىڭ رەسمي اۋدارماسى بولىپ تابىلادى. اتالعان قۇجات – شەتەلدە اۆتوكولىكتى جالعا الۋ, جەكە كولىكپەن شەكارادان ءوتۋ, جولداعى تەكسەرۋ بارىسىندا قۇجاتتاردى كورسەتۋ, شەتەلدە ساقتاندىرۋ راسىمدەۋ سەكىلدى كەزدەردە قاجەت بولۋى مۇمكىن.
حالىقارالىق جۇرگىزۋشى كۋالىگىن الۋ ءۇشىن ەمتيحان تاپسىرۋ نەمەسە وقۋدان ءوتۋ تالاپ ەتىلمەيدى.
ازاماتتاردىڭ كۇماندى ونلاين-سايتتار نەمەسە جەكە فيرمالار ارقىلى كۋالىك راسىمدەۋگە بەرگەن وتىنىشتەرى زاڭدى كۇشكە يە ەمەس.
«الماتى قالالىق پوليتسيا دەپارتامەنتى, ازاماتتارعا حالىقارالىق جۇرگىزۋشى كۋالىگىن بەرۋگە قۇقىعى جوق جەكە ۇيىمدارعا, تۋريستىك اگەنتتىكتەرگە جانە باسقا دا قۇرىلىمدارعا جۇگىنۋگە بولمايتىنىن ەسكەرتەدى جانە ازاماتتاردى ساق بولۋعا جانە الاياق دەلدالداردىڭ ارباۋىنا تۇسپەۋگە شاقىرادى. كۇمان تۋىنداعان جاعدايدا ازاماتتارعا اۋماقتىق ىشكى ىستەر ورگاندارىنا جۇگىنىپ, تولىق اقپارات الۋعا كەڭەس بەرىلەدى», دەلىنگەن حابارلامادا.
