پەتروپاۆل تۇرعىندارى تۇرعىن ءۇي اقىسىن تولەۋدەن باس تارتتى

پەتروپاۆل. 19 ناۋرىز. وبلىس ورتالىعىنداعى «يۋبيلەينىي» كوشەسىندە ورنالاسقان كوپ قاباتتى 9 «ب» ءۇيىنىڭ تۇرعىندارى سانالى تۇردە باس تارتتى. بۇل تۋرالى egemen ءتىلشىسى حابارلادى. 90  وتباسى تۇراتىن 10 قاباتتى ءۇي 2012 جىلى  پايدالانۋعا بەرىلگەن. سودان  بەرى  ايعاي-شۋدان كوز اشپاي كەلەدى.  باستى سەبەپ–ساپاسىز تۇرعىزىلعانى. تۇرعىندار كوشىپ كەلە بەستاعاننان-اق باسپانانىڭ كەم-كەتىكتەرىن بايقاپ, دابىل قاققان.  الايدا,  قالالىق اكىمدىكتەگىلەر  قۇرىلىس جۇمىستارىنا  باس مەردىگەر جاۋاپ بەرەتىنىن كولدەنەڭ تارتىپ, وزدەرىنە شاڭ جۋىتپاعان. ونىڭ اقىرى تۇرعىنداردىڭ  پاتەرلەردىڭ جالعا الۋ جانە كوممۋنالدىق قىزمەت اقىلارىن تولەۋدەن باس تارتۋعا سوقتىرعان. مەردىگەرلەردىڭ ايتۋىنشا, جارتى ميلليارد تەڭگەگە جوسپارلانعان كوپ قاباتتى ءۇيدىڭ 100  ميلليون تەڭگەگە جۋىعى ەسەپشوتقا  تۇسپەگەندىكتەن,  ساپاسىز ماتەريالدارمەن قۇراستىرۋعا ءماجبۇر بولعان. «عيماراتتىڭ قابىرعالارى ۇگىتىلىپ تۇسە باستاعان سوڭ  قۇقىق قورعاۋ  ورگاندارىنا ارىزدانۋعا تۋرا كەلدى.  سوسىن قاراعاندىلىق  ساراپشى ماماندار شاقىرتىلىپ,  ولار  ءۇيدىڭ  ىرگەتاسى مەن قابىرعالارىنداعى, دالىزدەردەگى جارىق-تەسىكتەردى قالپىنا كەلتىرۋ جونىندە شەشىم شىعارعان. بۇگىنگە دەيىن ەسكەرتۋلەردىڭ ءبىرى دە ورىندالعان جوق. جانىمىزدى شۇبەرەككە ءتۇيىپ وتىرمىز.  شەنەۋنىكتەردەن ەش قايران جوق. 2-3  ايدان بەرى كوممۋنالدىق اقىلاردى تولەمەي وتىرمىز»,–دەيدى تۇرعىندار. شىعارىپسالما  ۋادەدەن اۋىزدارى ابدەن  كۇيگەن جۇرتشىلىق  قالالىق تۇرعىن ءۇي قىزمەتى مەكەمەسىنىڭ باسشىسى ۆيتالي بەسپالوۆتىڭ «بۇل ۇيگە قاتىستى اتقارىلاتىن جۇمىستاردىڭ كولەمى بەلگىلەنگەن, قارجى دا قاراستىرىلعان. جاز كەلىسىمەن عيماراتتىڭ شاتىرىنان باستاپ جەرتولەسىنە دەيىن جوندەيمىز. جىلۋ, سۋ, كارىز جۇيەلەرىن دە تەكسەرەمىز», دەگەن  ۋاجىنە سەنگىلەرى جوق. تۇرعىنداردىڭ سوزدەرىنە قاراعاندا قالا اكىمىنىڭ كەلۋىن كۇتىپ وتىرعان سىڭايلارى بار. ونىڭ ناقتى ۋادەسىن المايىنشا  كوممۋنالدىق قىزمەت پەن جالدامالى تۇرعىن ۇيلەردىڭ اقىسىن تولەمەيمىز دەگەن تاس-ءتۇيىن پىكىردەن اينيتىن تۇرلەرى بايقالمايدى. ءومىر ەسقالي.  دەرەك: egemen.kz سۋرەت: egemen.kz