الەكسەي پولتورانين الەم كۋبوگىن 8-ورىنمەن اياقتادى

استانا. 19 ناۋرىز. قازاقستاندىق شاڭعىشى الەكسەي پولتورانين 2014-2015 جىلعى ماۋسىمدا الەم كۋبوگى جارىسىن 8-ورىنمەن اياقتادى. الەكسەي وسىمەن ەكىنشى مارتە جارىستىڭ جالپى ناتيجەسىندە ۇزدىك وندىقتان كورىنىپ وتىر. بۇل تۋرالى «ەگەمەن قازاقستان» حابارلادى. 2014 جىلدىڭ قاراشا ايىندا باستالعان الەم كۋبوگى سايىسى 14 كەزەڭنەن تۇردى. سوڭعىسى 15 ناۋرىزدا نورۆەگيانىڭ استاناسى وسلودا ءوتتى. بارلىق كەزەڭدە جيعان ۇپايلارىنىڭ ناتيجەسىندە پولتورانين ۇزدىك وندىقتىڭ قاتارىنا قوسىلدى. ول وسى ماۋسىمدا ءبىر مارتە توپ جارسا (توبلاح, يتاليا, 10 كم, جەكەلەي سىن, كلاسسيكالىق ستيل), ءۇش رەت كۇمىس جۇلدەگەر اتاندى (ليللەحاممەر, نورۆەگيا, 15 كم, ءىز قۋ, كلاسسيكالىق ستيل, ۆال-دي-فەممە, يتاليا, 15 كم, ماسس-سارت, كلاسسيكالىق ستيل, لاحتي, فينليانديا, 15 كم, جەكەلەي سىن, كلاسسيكالىق ستيل). سوعان وراي بارلىعى 537 ۇپاي جيناپ, جالپى ەسەپتە 8-ساتىعا تابان تىرەدى. ال سايىس بارىسىندا 1364 ۇپاي جيعان مارتين سۋننبيۋ (نورۆەگيا) جەڭىمپاز اتاندى. ەكىنشى ورىن داريو كولونياعا (1059 ۇپاي, دانيا) بۇيىرسا, ۇزدىك ۇشتىكتى پەتتەر نورتۋگ (961 ۇپاي, نورۆەگيا) تۇيىندەدى. وسىعان دەيىن دە الەكسەي پولتورانين الەم كۋبوگى جارىسىنىڭ جالپى قورىتىندىسىندا ۇزدىك وندىقتان كورىنگەنىن ايتىق. ول 2012-2013 جىلعى ماۋسىمدا تىركەلدى. ءتىپتى ول كەزدە 995 ۇپاي جيناعان شاڭعىشىمىز جارىستى 4-ورىنمەن اياقتاعان ەدى. الەم كۋبوگىنىڭ ايەلدەر اراسىنداعى باسەكەسىندە جالپى قورىتىندى بويىنشا العاشقى التى ورىندى نورۆەگيالىقتار يەمدەندى. سونىڭ ىشىنەن الدىڭعى ۇشتىككە ەنگەن سپورتشىلار مىنالار: 1) ماريت بەرگەن (2172 ۇپاي); 2) تەرەزا يوحاۋگ (1388 ۇپاي); 3) حەيدي ۆەنگ (1332 ۇپاي). ەلامان قوڭىر. دەرەك: «ەگەمەن قازاقستان». سۋرەت: fis-ski.com.