«ۇزدىك اكتەر» اتالىمى قازاق اكتەرى باقىت قاجىباەۆقا «نابات وپەراتسياسى» فيلمىندەگى باستى ءرولى ءۇشىن بەرىلدى.
اكتەردىڭ ايتۋىنشا, بۇل – تەك ءوزىنىڭ عانا ەمەس, فيلمگە جان-تانىمەن ەڭبەك سىڭىرگەن بۇكىل شىعارماشىلىق توپتىڭ جەڭىسى. ول شىنايى وقيعاعا نەگىزدەلگەن بۇل حيكايانى جۇزەگە اسىرۋدىڭ ماڭىزىن اتاپ ءوتىپ, كورەرمەنگە العىس ءبىلدىردى.
ايتا كەتەيىك, «نابات وپەراتسياسى» ءفيلمى 1992 جىلى ەلىمىزدە بولعان شىنايى وقيعاعا نەگىزدەلگەن. اۆتوبۋستاعى 30 ادامدى كەپىلگە العان لاڭكەستەرگە قارسى قۇقىق قورعاۋ ورگاندارىنىڭ ارنايى وپەراتسياسى ادام شىعىنىنسىز اياقتالادى.
فيلم ش.ايمانوۆ اتىنداعى «قازاقفيلم» كينوستۋدياسىندا مادەنيەت جانە اقپارات مينيسترلىگى مەن ۇلتتىق كينونى قولداۋ ورتالىعىنىڭ قولداۋىمەن تۇسىرىلگەن.
بايقاۋعا ۇسىنىلعان ەكىنشى قازاق تۋىندىسى – رەجيسسەر دارحان تولەگەنوۆتىڭ «اعايىندىلار» دراماسى. بۇل فيلم بۇعان دەيىن 15-تەن استام حالىقارالىق ماراپاتقا يە بولعان, ونىڭ ىشىندە «Oldenburg» حالىقارالىق كينوفەستيۆالىندە «Spirit of Cinema Award» ۇلدەسى بار.
بيىل قازاق كينوسى فەستيۆالدىڭ فوكۋس-سەكتسياسىنا ۇسىنىلىپ, «اعايىندىلار» ءفيلمى ارنايى باعدارلاما اياسىندا كورسەتىلدى. بايقاۋ باعدارلاماسىن شىۇ ەلدەرىنىڭ تانىمال كينەماتوگرافتارى, توعىز ادامنان قۇرالعان حالىقارالىق قازىلار القاسى باعالادى.
فەستيۆال اياسىندا كينونارىق ۇيىمداستىرىلدى. قازاقستاننىڭ ۇلتتىق ستەندىندە ۇلتتىق كينونى قولداۋ ورتالىعى مەن ش.ايمانوۆ اتىنداعى «قازاقفيلم» كينوستۋدياسىنىڭ نەگىزگى كينوجوبالارى ۇسىنىلدى. وندا 25-تەن استام كوركەم, دەرەكتى جانە انيماتسيالىق ءفيلمنىڭ ترەيلەرلەرى كورسەتىلدى.
چۋنتسيندەگى شىۇ حالىقارالىق كينوفەستيۆالى گۋمانيتارلىق بايلانىستى نىعايتۋعا, تاجىريبە الماسۋعا, ۇلتتىق كينووندىرىستى دامىتۋعا ارنالعان ماڭىزدى مادەني الاڭعا اينالدى.
