كەڭەس بارىسىندا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا ءسوز سويلەپ, كەزدەسۋدىڭ جوعارى دەڭگەيدە ۇيىمداستىرىلعانى ءۇشىن العىس ءبىلدىردى. سونىمەن قاتار شىۇ-نىڭ مادەني ديالوگتى دامىتۋعا جانە گۋمانيتارلىق ىنتىماقتاستىقتى كەڭەيتۋگە ارنالعان حالىقارالىق الاڭعا اينالعانىن دا اتاپ ءوتتى.
«مادەنيەت – بۇل تەك يگى ءداستۇر ەمەس, بولاشاقتى جالعايتىن رۋحاني كوپىر. ءبىز ورتاق باستامالاردى نەعۇرلىم بەلسەندى دامىتساق, شىۇ مەملەكەتتەرىنىڭ رۋحاني بىرلىگى سوعۇرلىم نىعايا تۇسەدى», دەدى ا.بالاەۆا.
مينيستر اتاپ وتكەن ماڭىزدى مادەني باستامالاردىڭ قاتارىندا شىۇ جاستار فەستيۆالى, شىۇ جاس كوشباسشىلار فورۋمى سىندى بىرقاتار جوبا بار. سونىمەن قاتار «شىۇ ەلدەرىنىڭ رۋحاني كيەلى ورىندارى» جوباسى مەن 2024 جىلى الماتى قالاسىندا شىۇ-عا مۇشە ەلدەردىڭ مۋزىكالىق ۇجىمدارى قاتىسقان «شىۇ جىبەك جولى» اتتى العاشقى حالىقارالىق مۋزىكالىق فەستيۆال ۇيىمداستىرىلدى.
الداعى پەرسپەكتيۆالار بويىنشا مينيستر كرەاتيۆتى يندۋستريانى قولداۋ, ءتۋريزمدى دامىتۋ جانە مادەنيەتارالىق بايلانىستى كەڭەيتۋ باعىتىندا ىنتىماقتاستىقتى جانداندىرۋدى ۇسىندى. اتاپ ايتساق, شىۇ ەلدەرىندە وتكىزىلەتىن, ۇلتتىق قولونەر شەبەرلەرى, كىلەم توقۋ, قىش شەبەرلەرى مەن ويۋ-ورنەك ونەرىنىڭ ۇستالارى قاتىساتىن كوشپەلى قولونەر جانە ساندىك-قولدانبالى ونەر جارمەڭكەسىن ۇيىمداستىرۋدى ۇسىندى.
سونىمەن قاتار ايدا بالاەۆا «شىۇ مادەني مۇراسىنىڭ تسيفرلىق پلاتفورماسىن» قۇرۋ باستاماسىن كوتەردى. بۇل پلاتفورما شىۇ-عا مۇشە ەلدەردىڭ ۆيرتۋالدى مۋزەيلەرىن, ونەر تۋىندىلارىن, مادەني نىساندار كاتالوگتارىن جانە سالا شەبەرلەرىنىڭ بەينەساباقتارىن قامتيدى.
مينيستر قازاقستان بۇل باستامالاردى ىسكە اسىرۋعا, ساراپتامالىق جانە ۇيىمداستىرۋشىلىق قولداۋ كورسەتۋگە دايىن ەكەنىن جەتكىزدى. تۇجىرىمداما ازىرلەپ, العاشقى ءىس-شارانى 2026 جىلى الماتى نەمەسە ۇلى دالانىڭ رۋحاني استاناسى – تۇركىستان قالاسىندا وتكىزۋ تۋرالى ءسوز قوزعادى.
كەڭەس اياسىندا شىۇ-عا مۇشە مەملەكەتتەردىڭ مادەنيەت مينيسترلەرى مەن قىتاي كوممۋنيستىك پارتياسى ورتالىق كوميتەتىنىڭ ۇگىت-ناسيحات ءبولىمىنىڭ مەڭگەرۋشىسى, قكپ ورتالىق كوميتەتى ساياسي بيۋروسىنىڭ مۇشەسى لي شۋلەيدىڭ ۇجىمدىق كەزدەسۋى ءوتتى.
ءىس-شارا بارىسىندا ايدا بالاەۆا قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى سۋن ەليمەن ەكىجاقتى كەزدەسۋ وتكىزدى. كەزدەسۋدە قازاقستان مەن قىتاي اراسىنداعى مادەني ىنتىماقتاستىقتىڭ وزەكتى ماسەلەلەرى تالقىلاندى. تاراپتار ىنتىماقتاستىقتىڭ جەمىستى جالعاسىپ كەلە جاتقانىن اتاپ ءوتىپ, ودان ءارى دامۋىنا مۇددەلى ەكەنىن ءبىلدىردى.
سونداي-اق مينيستر ايدا بالاەۆا شىۇ باس حاتشىسى نۇرلان ەرمەكباەۆپەن ەكىجاقتى كەزدەسۋ وتكىزدى.
بۇدان بولەك, شىۇ-عا مۇشە مەملەكەتتەردىڭ ونەر جانە جاستار ءانى فەستيۆالىنىڭ اشىلۋ سالتاناتى ءوتتى. ءىس-شارانىڭ ماقساتى – شىعىس پەن باتىس اراسىنداعى مادەني بايلانىستاردى دامىتۋ, ۇلتتىق داستۇرلەردى ناسيحاتتاۋ جانە شىۇ-عا مۇشە ەلدەردىڭ دوستىعىن نىعايتۋ. اتالعان فەستيۆالگە قازاقستان اتىنان مەملەكەتتىك «دارىن» جاستار سىيلىعىنىڭ لاۋرەاتتارى سادراددين بولات پەن رۋحيا بايدۇكەنوۆا قاتىسىپ, ونەر كورسەتتى. فەستيۆالدىڭ اشىلۋ سالتاناتى جاستار ءان كەشى فورماتىندا ءوتىپ, شىۇ ەلدەرى مادەنيەتتەرىنىڭ ارالۋاندىعىن كورسەتۋگە ارنالدى.
