فوتو:
قر ساۋدا جانە ينتەگراتسيا مينيسترلىگىنىڭ حابارلاۋىنشا, بۇل جاڭا تاريفتىك شارالار قازاقستان ەكونوميكاسى ءۇشىن ەلەۋلى قاۋىپ توندىرمەيدى. ويتكەنى, امەريكا قۇراما شتاتتارىنا قازاقستان تاراپىنان جەتكىزىلەتىن نەگىزگى ەكسپورتتىق ونىمدەر — مۇناي, ۋران, كۇمىس, فەرروقورىتپا, تانتال جانە تيتان سەكىلدى ستراتەگيالىق ماڭىزى بار شيكىزات تۇرلەرى جاڭا باج سالىعىنان بوساتىلعان.
«قابىلدانعان شارالار قازاقستان ەكسپورتىنىڭ شامامەن 95 پايىزىنا اسەر ەتپەيدى دەپ كۇتىلەدى. قازاقستاندىق تاۋارلارعا بولجامدى ساۋدا رەجيمىن ساقتاۋ ماقساتىندا قر ۇكىمەتى اقش اكىمشىلىگىنە ءوزارا ساۋدا شارتتارىن جاقسارتۋ جونىندەگى ناقتى شارالار مەن باستامالاردى جولدادى. قازاقستان ماقساتى — نارىققا قول جەتكىزۋ جانە ساۋدا شارتتارى ماسەلەلەرى بويىنشا كەلىسىلگەن شەشىمدەر قابىلداۋ», دەلىنگەن حابارلامادا.
ايتا كەتەيىك, قازىر اقش تاراپى قازاقستاننىڭ ۇسىنىستارىن مۇقيات قاراستىرۋ ۇستىندە. كەلىسسوزدەر وتكىزۋ مەرزىمى قوسىمشا جاريالانادى. قازاقستان جاعى بۇل ۇدەرىستەرگە بەلسەندى قاتىسۋعا جانە ۇلتتىق مۇددەلەردى قورعاۋعا دايىن ەكەنىن رەسمي تۇردە مالىمدەدى.
