فوتو: azattyq-ruhy.kz/
ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ ايتۋىنشا, ساۋىردە الەۋمەتتىك ونىمدەردىڭ ورتاشا باعا يندەكسى - 1,6% بولسا, مامىردا ءوسۋ قارقىنى - 1%-عا, ال ماۋسىمدا - 0,7%-عا تومەندەگەن.
«كەيىنگى اپتادا ءوسىم 0,1% بولدى. سونىمەن قاتار, ءۇش اپتا قاتارىنان كارتوپ باعاسى 1,3%-عا ارزاندادى. ال وتكەن اپتادا ءسابىز باعاسى 0,9%-عا تومەندەگەن. كۇرىش, قاراقۇمىق, جۇمىرتقا, ۇن مەن ماكورون ونىمدەرىنىڭ باعاسى دا ءتۇسىپ جاتىر. نان مەن ءسۇت باعاسى تۇراقتى بولىپ تۇر», دەدى ايجان بيجانوۆا.
قازاقستاندا وتاندىق ازىق-ت ۇلىك ءوندىرىسى ارتىپ كەلەدى. 2025 جىلدىڭ 5 ايىندا ونىڭ كولەمى 10,5%-عا ءوسىپ, 1,5 ترلن تەڭگەنى قۇراعان. الەۋمەتتىك ازىق-ت ۇلىك تاۋارلارىنىڭ ىشىندە قىزىلشا قانتى (4,6 مىڭ توننادان 64 مىڭ تونناعا دەيىن), وسىمدىك مايى (316,3 مىڭ توننادان 376,8 مىڭ تونناعا دەيىن), سارى ماي (13 مىڭ توننادان 15 مىڭ تونناعا دەيىن), ۇن (1,3 ملن توننادان 1,4 ملن تونناعا دەيىن), اشىتىلعان ءسۇت ونىمدەرى (102 مىڭ توننادان 106 مىڭ تونناعا دەيىن), وڭدەلگەن ءسۇت (264 مىڭ توننادان 274,6 مىڭ تونناعا دەيىن) تاعى باسقالارى ەڭ كوپ ءوسىم كورسەتكەن.
ۇكىمەت قازاقستانداعى الەۋمەتتىك ازىق-ت ۇلىكتەردىڭ باعاسى ەۋرازيالىق ەكونوميكالىق وداق (ەاەو) ەلدەرى اراسىندا ەڭ قولجەتىمدى باعا ەكەنىن مالىمدەدى.
مۇنداي قورىتىندى ەاەو ەلدەرىندەگى الەۋمەتتىك ماڭىزعا يە ازىق-ت ۇلىك تاۋارلارىنىڭ نارىقتىق باعاسىن سالىستىرۋ ناتيجەسىندە بەلگىلى بولعان. ماسەلەن, قازاقستاندا تاۋىق جۇمىرتقاسى, ۇن, نان, كۇنباعىس مايى, تۇز, كۇرىش, كارتوپ, قىرىققابات, پياز, ءسابىزدىڭ ەڭ تومەن باعاسى تىركەلگەن.
ال قاراقۇمىق, قانت, سيىر ەتى جانە ءسۇت بويىنشا قازاقستانداعى باعالار بەلارۋس ەلىندەگى باعاعا جاقىن. سارى ماي بويىنشا ەلىمىز بەلارۋس پەن قىرعىزستاننان كەيىن ءۇشىنشى ورىندا, ال قۇس ەتى بويىنشا بەلارۋس پەن رەسەيدەن كەيىنگى ورىنعا جايعاسقان.
كوممۋنالدىق قىزمەتتەر ءتاريفىنىڭ ءوسۋ قارقىنى رەتتەلەدى
ءبىرىنشى جارتىجىلدىقتا اقىلى قىزمەتتەر ينفلياتسيا ءوسىمىنىڭ نەگىزگى فاكتورى بولعان (16,1%). وسىعان بايلانىستى ۇكىمەت كوممۋنالدىق قىزمەتتەر ءتاريفىنىڭ ءوسۋ قارقىنىن رەتتەۋ تۋرالى شەشىم قابىلدادى. وسىعان بايلانىستى كەي كوممۋنالدىق قىزمەت قۇنىنىڭ باعاسىن كوتەرۋ كەيىنگە قالدىرىلعان. مۇنداي شەشىم ازاماتتاردىڭ قارجىلىق جۇكتەمەسىن ازايتىپ, ينفلياتسيا دەڭگەيىن تۇراقتاندىرۋعا مۇمكىندىك بەرەدى.
