بيىل الماتىدا 1989 جىلدان بەرى العاش رەت ەسەپتەگىشتەرمەن جابدىقتالماعان پاتەرلەر مەن ۇيلەر ءۇشىن سۋ تۇتىنۋدى ەسەپتەۋ نورمالارى وزگەردى. ەندى مۇنداي تۇتىنۋشىلار ءۇشىن قۇنى ءاربىر تىركەلگەن ادامعا ايىنا 15 تەكشە مەتر سۋ ءنورماتيۆى نەگىزىندە ەسەپتەلەدى. سۋمەن جابدىقتاۋدىڭ قولدانىستاعى ءتاريفى بويىنشا بۇل 2217,60 تەڭگە. ورتالىقتاندىرىلعان سۋ بۇرۋ جاعدايىندا كارىز ءۇشىن ءبىر ادامعا 687,96 تەڭگە مولشەرىندە قوسىمشا اقى الىنادى. وسىلايشا, ەسەپتەگىشى جوق ءتورت ادامنان تۇراتىن وتباسى ەندى اي سايىن 12 000 تەڭگەگە جۋىق شوت الادى.
شاھار حالقىن ەسەپتەگىش قۇرىلعىلار ورناتۋعا ىنتالاندىراتىن شارا الدىمەن تۇرعىنداردىڭ وزىنە ءتيىمدى. ويتكەنى تەك ناقتى تۇتىنىلعان مولشەر ءۇشىن تولەم الدەقايدا ارزان.
«تۇتىنۋ نورمالارىنىڭ وزگەرۋى بۇگىنگى تاڭدا اسپاپتارمەن جابدىقتالۋ دەڭگەيىنىڭ 78%-عا جەتۋىنە اكەلدى. جىل سوڭىنا دەيىن بارلىق پاتەرلەر مەن ۇيلەردىڭ 90%-ى ەسەپكە الۋ قۇرالدارىمەن قامتاماسىز ەتىلەتىن بولادى. بۇل سۋ رەسۋرستارىن ۇنەمدەۋگە كومەكتەسەدى», دەيدى «الماتى سۋ» مكك دەپارتامەنت ديرەكتورى سەرىك شاعىروۆ.
سۋدىڭ نەگىزگى تاريفتەرى قىستا بەس جىل مەرزىمگە بەكىتىلگەن. جىل سايىنعى جوسپارلى ازداعان وسىمنەن باسقا, ەسەپتەگىشتەرى بار تۇتىنۋشىلار ءۇشىن باعا كۇرت قىمباتتامايدى, دەپ سەندىرەدى مامان.
