ساۋران اۋدانىندا 72 تىك درەناجدى ۇڭعىما قازىلىپ, قولدانىسقا بەرىلدى. ءار ۇڭعىما 45 مەتر تەرەڭدىكتەن سەكۋندىنا 60 ليتر جەراستى سۋىن بەرەدى. بۇل ەگىس القابىنا قوسىمشا سۋ جىبەرۋ ءۇشىن قاجەت.
ورداباسى اۋدانىندا 44 تىك درەناجدى ۇڭعىمانىڭ 17-ءسى جوندەلدى. ونىڭ ىشىندە 10 ۇڭعىما قولدانىسقا بەرىلدى. بۇل ۇڭعىمالار سور شايۋ جۇمىستارى ءۇشىن دە وتە ماڭىزدى. ناتيجەسىندە توپىراقتىڭ قۇنارلىعى ارتىپ, ءار گەكتاردىڭ ونىمدىلىگى ۇلعايادى.
وڭىرگە ساپارى بارىسىندا مينيستر بوگەن سۋ قويماسىنا دا باردى. قويمانىڭ جالپى سىيىمدىلىعى 370 ملن تەكشە مەتر. نىسان 67 مىڭ گەكتار ەگىس القابىن سۋمەن قامتىپ وتىر. بۇگىندە شارۋالارعا سەكۋندىنا 50 تەكشە مەتر سۋ جىبەرىلىپ جاتىر. وسىعان دەيىن سۋ قويماسىنا كوپفاكتورلى زەرتتەۋ جۇرگىزىلدى. سونىڭ ناتيجەسى بويىنشا نىسانعا كۇردەلى جوندەۋ جۇمىستارىن جۇرگىزۋ جوسپارلانىپ وتىر.
؟️«مەملەكەت باسشىسىنىڭ تاپسىرماسى بويىنشا ءبىز العاش رەت استانا سۋ قويماسىندا اۋقىمدى تازالاۋ جۇمىستارىن باستادىق. كەلەسى كەزەكتە شاردارا سۋ قويماسىنىڭ ءتۇبىن تازالاۋ ءۇشىن جەرسناريادتار ساتىپ الۋدى جوسپارلاپ وتىرمىز. سول سەكىلدى بوگەن قويماسىن دا تازارتۋ ماسەلەسىن پىسىقتاۋ كەرەك. بۇل قويماعا جينالاتىن سۋ كولەمىن ارتتىرۋعا مۇمكىندىك بەرەدى», - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
