وبلىستىق ءبىلىم بەرۋ باسقارماسىنىڭ تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى قارلىعاش اسايىموۆانىڭ ايتۋىنشا, بيىل ءوڭىر كوللەدجەرىنە 6250 گرانت بولىنگەن. 2023 جىلى مۇنداي گرانتتار سانى 5705 بولسا, بىلتىر 6200 گرانت ۇلەستىرىلگەن.
- مەكتەپ تۇلەكتەرى 71 ءتۇرلى ماماندىق بويىنشا تاڭداۋ جاساپ, تەگىن ءبىلىم الا الادى. ولاردىڭ باسىم بولىگى سۇرانىسقا يە جۇمىسشى ماماندىقتار ەكەنىن اتاپ وتكەن ءجون. قازىرگى ۋاقىتتا 22 كوللەدج الەۋمەتتىك سەرىكتەستەرمەن بىرلەسىپ 48 جاڭا ماماندىق بويىنشا ءبىلىم بەرۋ باعدارلامالارىن ازىرلەدى. اتاپ ايتار بولساق, «توتەنشە جاعدايلاردا قورعاۋ», «جاڭارتىلاتىن ەنەرگەتيكا», «جىلجىمايتىن م ۇلىكتى باسقارۋ», «ناۋبايحانا, ماكارون جانە كونديتەرلىك ءوندىرىس», «پايدالى قازبالاردى بايىتۋ», باسقا دا ماماندىقتار بار,-دەيدى ول.
مەملەكەت باسشىسىنىڭ تاپسىرماسى بويىنشا مىندەتتى جۇمىسپەن قامتىلعان كاسىپورىنداردىڭ وتىنىمدەرى نەگىزىندە كادرلاردى ماقساتتى دايارلاۋ جۇيەسى ەنگىزىلدى. سول بويىنشا بۇگىندە ارنايى تاپسىرىس اياسىندا ايماق كوللەدجدەرىندە 1770 جاس وقىسا, الداعى جاڭا وقۋ جىلىندا بۇل كورسەتكىشتى 2500 ستۋدەنتكە دەيىن ارتتىرۋ جوسپارلانۋدا.
تەگىن وقۋعا تۇسكىسى كەلەتىن 9-سىنىپ تۇلەكتەرى 18 تامىزعا دەيىن, ال 11-سىنىپ بىتىرگەندەر 20 تامىزعا دەيىن قۇجاتتارىن تاپسىرۋى قاجەت. كوللەدج ستۋدەنتتەرىنە اي سايىن 41 مىڭ تەڭگە شاكىرتاقى تولەنەدى. اۋىل-اۋدانداردان كەلەتىندەرگە تەگىن جاتاقحانا بەرىلەدى. جۇمىسشى ماماندىقتارى مەن الەۋمەتتىك وسال توپتاردىڭ ستۋدەنتتەرى تەگىن تاماقپەن قامتىلادى. سونداي-اق, جول ءجۇرۋ اقىسى ءۇشىن 4 ايلىق ەسەپتىك كورسەتكىش كولەمىندە (15 728 تەڭگە) وتەماقى تولەنەدى.
پاۆلودار وبلىسى
