مەملەكەت باسشىسىنىڭ جارلىقتارىمەن:
رومان يۋرەۆيچ ۆاسيلەنكو قازاقستان رەسپۋبليكاسىنىڭ بەلگيا كورولدىگىندەگى توتەنشە جانە وكىلەتتى ەلشىسى, ەۋروپا وداعىنىڭ جانىنداعى جانە سولتۇستىك اتلانت شارتى ۇيىمىنداعى (ناتو) قازاقستان رەسپۋبليكاسى وكىلدىگىنىڭ باسشىسى بولىپ تاعايىندالدى, ول بۇرىنعى اتقارعان لاۋازىمىنان بوساتىلدى;
ەرجان يراك ۇلى ەلەكەەۆ قازاقستان رەسپۋبليكاسىنىڭ كۋۆەيت مەملەكەتىندەگى توتەنشە جانە وكىلەتتى ەلشىسى لاۋازىمىنا تاعايىندالدى.
مەملەكەت باسشىسىنىڭ جارلىقتارىمەن:
مارعۇلان باقىت ۇلى بايمۇحان قازاقستان رەسپۋبليكاسىنىڭ بەلگيا كورولدىگىندەگى توتەنشە جانە وكىلەتتى ەلشىسى, ەۋروپا وداعىنىڭ جانىنداعى جانە سولتۇستىك اتلانت شارتى ۇيىمىنداعى (ناتو) قازاقستان رەسپۋبليكاسى وكىلدىگىنىڭ باسشىسى, قازاقستان رەسپۋبليكاسىنىڭ ليۋكسەمبۋرگ ۇلى گەرتسوگتىگىندەگى توتەنشە جانە وكىلەتتى ەلشىسى قىزمەتىن قوسا اتقارۋشى لاۋازىمدارىنان بوساتىلدى;
ازامات راحمانقۇل ۇلى بەردىباي قازاقستان رەسپۋبليكاسىنىڭ كۋۆەيت مەملەكەتىندەگى توتەنشە جانە وكىلەتتى ەلشىسى لاۋازىمىنان بوساتىلدى;
ارمان اسقار ۇلى يسەتوۆ قازاقستان رەسپۋبليكاسىنىڭ تايلاند كورولدىگىندەگى توتەنشە جانە وكىلەتتى ەلشىسى لاۋازىمىنان بوساتىلدى.
رومان يۋرەۆيچ ۆاسيلەنكو – قازاقستان رەسپۋبليكاسىنىڭ بەلگيا كورولدىگىندەگى ەلشىسى, قازاقستان رەسپۋبليكاسىنىڭ ەۋروپا وداعى جانە سولتۇستىك اتلانت شارتى ۇيىمى جانىنداعى وكىلدىگىنىڭ باسشىسى.
1972 جىلعى 14 تامىزدا شىمكەنت قالاسىندا تۋعان.
1994 جىلى رەسەي فەدەراتسياسى قارۋلى كۇشتەرىنىڭ ەكونوميكا, قارجى جانە قۇقىق اسكەري اكادەمياسىن ۇزدىك بىتىرگەن.
ەڭبەك جولىن قازاقستان رەسپۋبليكاسى پرەزيدەنتى اپپاراتى حالىقارالىق ءبولىمىنىڭ باس مامانى رەتىندە باستادى. سونداي-اق قر پرەمەر-ءمينيسترىنىڭ كەڭسەسىندە, قر مەملەكەتتىك حاتشىسىنىڭ حاتشىلىعىندا جانە باسقا مەكەمەلەردە جۇمىس ىستەدى.
قر سىرتقى ىستەر مينيسترلىگىندە ەرەكشە تاپسىرمالار جونىندەگى ەلشى, حالىقارالىق اقپارات كوميتەتىنىڭ توراعاسى بولدى. ءارتۇرلى جىلدارى قازاقستاننىڭ ۇلىبريتانيا مەن امەريكا قۇراما شتاتتارىنداعى ەلشىلىكتەرىندە ديپلوماتيالىق لاۋازىمداردا قىزمەت اتقاردى. 2016-2019 جىلدارى قر سىرتقى ىستەر ءمينيسترىنىڭ ورىنباسارى قىزمەتىن اتقاردى, ال 2019 جىلدان باستاپ 2022 جىلعا دەيىن قازاقستاننىڭ سلوۆاكياداعى ەلشىسى بولدى. قازاقستاننىڭ بەلگياداعى ەلشىسى, ەو جانە ناتو جانىنداعى قر وكىلدىگىنىڭ باسشىسى بولىپ تاعايىندالعانعا دەيىن 2022 جىلعى قاڭتاردان باستاپ قر سىرتقى ىستەر ءمينيسترىنىڭ ورىنباسارى لاۋازىمىندا بولدى.
توتەنشە جانە وكىلەتتى ەلشى ديپلوماتيالىق دارەجەگە يە.
اعىلشىن, فرانتسۋز, سلوۆاك جانە ۆەتنام تىلدەرىن مەڭگەرگەن.
ەرجان يراك ۇلى ەلەكەەۆ – قازاقستان رەسپۋبليكاسىنىڭ كۋۆەيت مەملەكەتىندەگى ەلشىسى.
1986 جىلعى 2 ساۋىردە اقتاۋ قالاسىندا دۇنيەگە كەلگەن.
2007 جىلى قازاقستان-بريتان تەحنيكالىق ۋنيۆەرسيتەتىن بىتىرگەن.
2011 جىلى گلازگو ۋنيۆەرسيتەتىندە ماگيستر دارەجەسىن الدى.
ەڭبەك جولىن 2007 جىلى «قازمۇنايگاز» بارلاۋ ءوندىرۋ» اق ينۆەستورلارمەن بايلانىس دەپارتامەنتىنىڭ مامانى رەتىندە باستادى. ءارتۇرلى جىلدارى «سامۇرىق-قازىنا» قورى جۇيەسىندە باس مەنەدجەر, بلوك جەتەكشىسى, ترانسفورماتسيا جوبالارى پورتفەلىن باسقارۋ جونىندەگى ديرەكتور لاۋازىمداردا جۇمىس ىستەدى.
2020-2023 جىلدار ارالىعىندا «ەكونوميكالىق زەرتتەۋلەر ينستيتۋتى» اق-نىڭ ساراپتامالىق-تالدامالىق توبى باسشىسىنىڭ ورىنباسارى, «الفا-بانك قازاقستان» اق جوبالىق كەڭسەسىنىڭ ديرەكتورى, سونداي-اق «بايتەرەك» ۇبح» اق-نىڭ اكتيۆتەردى باسقارۋ جانە جوبالارمەن جۇمىس جونىندەگى باسقارۋشى ديرەكتورى قىزمەتتەرىن اتقاردى.
قازاقستاننىڭ كۋۆەيتتەگى ەلشىسى بولىپ تاعايىندالعانعا دەيىن 2024 جىلعى ناۋرىزدان باستاپ «Kazakh Invest» ۇك» اق باسقارما توراعاسى لاۋازىمىن اتقاردى. اعىلشىن ءتىلىن مەڭگەرگەن.
