پاۆلودار وبلىسىنىڭ اكىمى اسايىن بايحانوۆ اقسۋ قالاسىنا بارىپ, داۋىلدان زارداپ شەككەن عيماراتتاردى قالپىنا كەلتىرۋ جۇمىستارىمەن تانىستى. عيماراتتاردى قالپىنا كەلتىرۋ ءۇشىن 814,2 ملن تەڭگە قاجەت. بۇگىنگى تاڭدا 18 نىسان قالپىنا كەلتىرىلىپ, 30 نىساندا جۇمىستار جالعاسۋدا. ءوڭىر باسشىسى قاجەتتى قاراجاتتى ءبولۋ پروتسەسىن جىلدامداتۋدى جانە وسى اپتادا ءماسليحاتتىڭ كەزەكتەن تىس سەسسياسىن وتكىزۋدى تاپسىردى.
ءوڭىر باسشىسى اقسۋ قالاسىنىڭ اكىمى بولاتبەك ءشارىپوۆتىڭ جۇمىسىن سىنعا الدى. سەبەبى - توتەنشە جاعدايدان كەيىنگى العاشقى كۇندەردە حالىققا اقپاراتتىڭ جەدەل تاراتىلماۋى. اسايىن بايحانوۆتىڭ ايتۋىنشا, تۇرعىندار قالپىنا كەلتىرۋ جۇمىستارىنىڭ بارىسىنان حاباردار بولعان جوق, ولارمەن ەشكىم ءتۇسىندىرۋ جۇمىستارىن جۇرگىزگەن جوق.
- مۇنداي ساتتە ۋاقتىلى اقپارات, سونداي-اق ناقتى ءارى ۇيلەسىمدى جۇمىس جانە حالىقپەن كەرى بايلانىس وتە ماڭىزدى. تۇرعىندار اتقارىلىپ جاتقان جۇمىستار مەن قابىلدانىپ جاتقان شارالار تۋرالى ءبىلۋ قاجەت. ولار تۋىنداعان ماسەلەلەرمەن جالعىز قالمايتىندارىن ءتۇسىنۋى كەرەك. سوندىقتان مەن اقسۋ قالاسىنىڭ اكىمى بولاتبەك شارىپوۆكە, ونىڭ ورىنباسارى ەرجان سالحانوۆقا, سونداي-اق اقسۋ اكىمدىگى اپپاراتىنىڭ باسشىسىنا سوگىس جاريالايمىن. سىزدەر قويىلعان مىندەتتەردى ورىنداي المادىڭىزدار جانە سىزدەرگە سەنىپ تاپسىرىلعان قالانىڭ تۇرعىندارىمەن بايلانىس ورناتا المادىڭىزدار,-دەدى وبلىس باسشىسى.
وبلىس اكىمىنىڭ ءباسپاسوز قىزمەتىنەن حابارلاعانداي, وبلىستىق بيۋدجەتتە توتەنشە جاعداي سالدارىن جويۋعا 1 ملرد 824,9 ملن تەڭگە, پاۆلودار, اقسۋ, ەكىباستۇز قالالارىنىڭ, سونداي-اق باياناۋىل مەن پاۆلودار اۋداندارىنىڭ بيۋدجەتتەرىندە 752,9 ملن تەڭگە قاراستىرىلعان.
