«Amanat» پارتياسى فراكتسياسىنىڭ مۇشەسى نۇرتاي سابيليانوۆ اباي وبلىسى جارما اۋدانىنا قاراستى قوڭىربيىك, كىشى قاراسۋ جانە سالقىنتوبە اۋىلدارىنىڭ تۇرعىندارىمەن كەزدەستى. قوڭىربيىك اۋىلىندا اقساقالدار جايىلىم جەرلەردىڭ جەتىسپەۋشىلىگى ماسەلەسىن كوتەردى. جەرگىلىكتى تۇرعىنداردىڭ ايتۋىنشا, مال بار, الايدا ونى جاياتىن جەر تار. سونىمەن قاتار قونىربيىك اۋىلىندا ينتەرنەت جەلىسىنە قوسىلۋ, مەديتسينالىق پۋنكت اشۋ, جەدەل جاردەم كولىگىن ءبولۋ, مەكتەپكە سپورتزال سالۋ جانە اۋىزسۋعا قولجەتىمدىلىكتى ارتتىرۋ ماسەلەلەرى دە كوتەرىلدى. كىشى قاراسۋ اۋىلىنىڭ تۇرعىندارى ايەلدەردىڭ زەينەت جاسىنىڭ تومەندەتىلۋىن ۇسىندى جانە اۋىلعا جوعارى جىلدامدىقتى ينتەرنەت تارتۋدى سۇرادى. سالقىنتوبە اۋىلىندا باستى ماسەلەلەر رەتىندە جولدىڭ جوقتىعى, ەسكىرگەن ەلەكتر جەلىلەرى جانە اباتتاندىرۋعا ارنالعان بيۋدجەتتىڭ جەتكىلىكسىزدىگى اتالدى.
ءماجىلىس دەپۋتاتى, وسدپ فراكتسياسىنىڭ وكىلى اجار ساعاندىقوۆا پاۆلودار قالاسىنداعى جۇمىسپەن قامتۋ جانە الەۋمەتتىك باعدارلامالار ءبولىمىنىڭ «داعدارىس ورتالىعى» كمم جۇمىسىمەن تانىستى. ورتالىق قيىن ومىرلىك جاعدايعا تاپ بولعان ايەلدەر مەن بالالارعا كەشەندى كومەك كورسەتەدى. كەزدەسۋ بارىسىندا اجار ساعاندىقوۆا ورتالىقتاعى تۇرمىستىق جاعدايمەن تانىسىپ, قىزمەتكەرلەرمەن جانە ورتالىق تۇرعىندارىمەن پىكىر الىستى. دەپۋتات مامانداردىڭ كاسىبيلىگىن جانە جۇمىسىنا جان-تانىمەن بەرىلگەندىگىن ەرەكشە اتاپ ءوتتى.
پەتروپاۆلدا مەملەكەتكە قايتارىلعان اكتيۆتەر ەسەبىنەن 280 ورىندىق بالاباقشا سالىنىپ جاتىر. قۇنى 1,9 ملرد تەڭگە بولاتىن جوبا جىل سوڭىنا دەيىن پايدالانۋعا بەرىلۋگە ءتيىس. قازىر قۇرىلىس جۇمىستارىنىڭ تەك 40 پايىزى ورىندالعان. وسىعان وراي وڭىرگە ارنايى كەلگەن ءماجىلىس دەپۋتاتتارى, «Amanat» پارتياسى فراكتسياسىنىڭ مۇشەلەرى قۇرىلىس قارقىنىن ارتتىرۋدى تالاپ ەتتى. سەبەبى سولتۇستىك وڭىردە جاز قىسقا, ال ءار كۇن – ەسەپتەۋلى. ءماجىلىس دەپۋتاتتارى ەركەبۇلان مامبەتوۆ پەن دميتري كولودا ساپار بارىسىندا قاراجاتتىڭ ءتيىمدى جۇمسالۋىن, نىساننىڭ قازىرگى جاعدايىن جانە قۇرىلىس كەستەسىنىڭ ساقتالۋىن باقىلاۋدى ماقسات ەتتى. بالاباقشانى وسى جىلدىڭ جەلتوقسان ايىندا پايدالانۋعا بەرۋ جوسپارلانىپ وتىر.
«قازاقستان حالىق پارتياسى» دەپۋتاتتىق فراكتسياسىنىڭ جەتەكشىسى ماگەررام ماگەرراموۆ پەن ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ توراعاسى سنەجانا يماشەۆا وڭىرلەرگە جاسالعان دەپۋتاتتىق ساپار اياسىندا استانا قالاسى اكىمدىگىنىڭ «ارنايى الەۋمەتتىك قىزمەتتەرگە مۇقتاج بالالاردى قولداۋ ورتالىعى» كمم-نە باردى.
ساپار بارىسىندا دەپۋتاتتار قيىن ومىرلىك جاعدايعا تاپ بولعان بالالارعا ارنالعان الەۋمەتتىك كومەك كورسەتۋ, تاربيەلىك جۇمىس ۇيىمداستىرۋ جانە تۇرمىس جاعدايلارىمەن تانىستى. قازىرگى تاڭدا بۇل ورتالىقتا بەس ءتۇرلى ساناتتاعى بالالار تۇرىپ جاتىر.
ورتالىق ديرەكتورى ينديرا نۇرمۇحامبەتوۆانىڭ ايتۋىنشا, مەكەمەنىڭ باستى ماقساتى – بالالارعا قاۋىپسىز تۇرمىستىق جاعداي جاساۋمەن قاتار, مورالدىق جانە پسيحولوگيالىق قولداۋ كورسەتۋ. ساپار قورىتىندىسىندا ماگەررام ماگەرراموۆ مەكەمە ۇجىمىنىڭ كاسىبيلىگى مەن جان-تانىمەن بەرىلىپ ىستەيتىن ەڭبەگىن جوعارى باعالادى.
