ەلوردا مارتەبەلى مەيمانداردى 2000 جىلدان قارسى الا باستادى. ماسەلەن, 2001 جىلى تاۋەلسىزدىكتىڭ 10 جىلدىعىنا وراي ريم پاپاسى II يوانن پاۆەل استاناعا كەلدى. ال 2003 جىلى الەمدىك جانە ءداستۇرلى دىندەر كوشباسشىلارىنىڭ ءبىرىنشى سەزى ءوتتى. ايتا كەتسەك, بۇعان دەيىن ءتۇرلى ءدىن باسشىلارى بىرىگىپ وتىرىپ وسى سالاداعى ماسەلەلەر توڭىرەگىندەگى ويلارىن ورتاعا سالماعان. وسىلايشا, ءدىن سەكىلدى نازىك تاقىرىپ العاش رەت استانادا تالقىلاندى.
2010 جىلى ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىعى باستالدى. وسىعان وراي جەلتوقسان ايىندا استانادا ۇيىمنىڭ جەتىنشى ءسامميتى ءوتتى. 2017 جىلى ەكسپو كورمەسى ۇيىمداستىرىلدى. الەمنىڭ تۇكپىر-تۇكپىرىنەن 3 ميلليون ادام استاناعا اعىلدى. كورمەگە 115 مەملەكەت, 22 حالىقارالىق ۇيىم قاتىستى.
سونداي-اق ون جىلدان اسا ۋاقىت بويى قاقتىعىستان كوز اشپاعان سيرياعا قاتىستى كەلىسسوزدەر وتكىزۋدە استانا الاڭى ماڭىزدى ءرول اتقاردى. 2023 جىلى سىرتقى ىستەر مينيسترلىگى سيريا بويىنشا استانا پروتسەسىنىڭ حح راۋندى اياقتالعانىن مالىمدەگەن ەدى. التى جىل ىشىندە 20 كەزدەسۋدىڭ 18-ءى ەلىمىزدە ءوتتى. ساراپشىلاردىڭ ايتۋىنشا, وسى كەزدەسۋلەردىڭ ناتيجەسىندە سيرياداعى جاعداي ايتارلىقتاي تۇزەلگەن. سىرتقى ىستەر مينيسترلىگىنىڭ رەسمي وكىلى ايبەك سمادياروۆ 2024 جىلدىڭ 24–25 قاڭتارىندا استانا پروتسەسى اياسىندا سيريا بويىنشا 21 حالىقارالىق كەزدەسۋ وتكەنىن ايتتى.
سونىمەن بىرگە استانا ەكونوميكالىق كۇرمەۋلى ماسەلەلەردىڭ ءتۇيىنىن تارقاتاتىن بىرەگەي ورتالىققا دا اينالىپ كەلە جاتىر. جىل سايىن ەكونوميكالىق, قارجىلىق فورۋمداردا سالا ماماندارى ءتۇرلى دەڭگەيدەگى تالقىلاۋلار ۇيىمداستىرىپ, سونى پىكىرلەرىن ورتاعا سالىپ جاتادى. جاقىندا وتكەن استانا حالىقارالىق فورۋمىندا مەملەكەت باسشىسى: «قازاقستان ورتالىق ازيادا ەكونوميكالىق لوكوموتيۆ قىزمەتىن اتقارىپ وتىر. ەلىمىز بۇرىننان شىعىس پەن باتىستىڭ, سولتۇستىك پەن وڭتۇستىك اراسىنداعى التىن كوپىر سانالادى. ءبىز شەتەلدەن كەڭ كولەمدە ينۆەستيتسيا تارتۋدى جالعاستىرامىز جانە قازاقستاندا بيزنەس جۇرگىزۋ ءۇشىن بارىنشا جاعداي جاسايمىز», دەپ مالىمدەدى.
كەيىنگى جىلدارداعى ىرگەلى باستامالار ناتيجەسىندە ترانسكاسپي حالىقارالىق كولىك ءدالىزىنىڭ ماڭىزى ارتىپ, قۇزىرەتى كەڭەيدى. ورتا ءدالىز دەيتىن ورتاق اتاۋعا يە بۇل مارشرۋت بۇگىندە قىتاي مەن ەۋروپالىق وداقتى جالعاپ جاتقان كەڭ كولەمدى باعىت سانالادى. ايرىقشا ماڭىز بەرىلگەن كەيىنگى جىلداردا تاۋار اعىنى ەسەلەپ ارتتى, بۇل ءوز كەزەگىندە ەلىمىزدى وڭىردەگى نەگىزگى ترانزيتتىك حابقا اينالدىرا باستادى.
استانا جاھاندىق كليماتتىڭ وزگەرۋىنە بايلانىستى ماسەلەنى دە كۇن تارتىبىنە شىعارىپ, الەمدىك كوشباسشىلارعا ديالوگ الاڭىن ۇسىندى. پرەزيدەنت قاسىم-جومارت توقاەۆتىڭ 2026 جىلى قازاقستاندا ايماقتىق كليماتتىق سامميت وتكىزۋ تۋرالى ۇسىنىسى – وسىنىڭ ءبىر دالەلى. ەلىمىز, اسىرەسە, سۋ رەسۋرستارىنىڭ جەتىسپەۋشىلىگىنە الاڭداۋشىلىق ءبىلدىرىپ, ايماقتاعى قۋاڭشىلىق پەن سۋ تاسقىنىنىڭ الدىن الۋعا باعىتتالعان شەشىمدەردى ۇسىنىپ وتىر.
بۇعان قوسا, قازاقستان – ايماق ەلدەرىن قىتايمەن بايلانىستىرىپ وتىرعان كوپىر. وتكەن ايدا استانادا وتكەن ءىى «ورتالىق ازيا – قىتاي» سامميتىندە ايماق ەلدەرى ەكونوميكانى دامىتۋعا باعىتتالعان بىرقاتار كەلىسىمگە كەلدى. سونىڭ ىشىندە ەلىمىز قىتايمەن يادرولىق ەنەرگەتيكا سالاسىندا ىنتىماقتاستىق ورناتاتىن قۇجاتقا قول قويدى.
جالپى, استانا الاڭى الەمدەگى جاعدايدى اشىق تالقىلاۋعا, جاھان الدىندا تۇرعان نەگىزگى سىن-قاتەرلەر مەن داعدارىستىڭ سالدارىن ايقىنداپ, ءوزارا ىنتىماقتاستىق ديالوگى ارقىلى اتالعان تاۋەكەلدەرگە قارسى تۇرۋعا, ماسەلەلەردى شەشۋگە ىقپال ەتىپ كەلەدى. بۇگىندە استانا – كوپجاقتى قاتىناستاردىڭ ورتاق مادەنيەتىن جاڭارتۋ مەن قالپىنا كەلتىرۋدە, سونداي-اق بەيبىتشىلىك پەن ىنتىماققا باستايتىن جيىندارعا باستاماشىلىق ەتۋدە ۇلكەن ەڭبەك ءسىڭىرىپ جاتىر.
