فوتو: استانا اكىمدىگى
قالا اكىمدىگىنىڭ سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ باسشىسىنىڭ ورىنباسارى ەرجىگىت وسەربايدىڭ ايتۋىنشا ەلورداداعى ءار اۋداندا «بەلسەندى ءومىر ءسۇرۋ ورتالىعى» بار. جوسپارعا سايكەس, ءار سپورت تۇرىنەن تۇراقتى تۇردە جارىستار ۇيىمداستىرىلىپ تۇرادى. زەينەتكەرلەر ءبىر ەمەس, بىرنەشە سپورتتى دا قاتار الىپ ءجۇرىپ, ءبىرشاما جەتىستىكتەرگە قول جەتكىزىپ ءجۇر.
«بۇگىن شاحماتتى تاڭدادىق. ورتالىقتىڭ مۇشەلەرى رەسپۋبليكالىق دەڭگەيدەگى Senate Open ءتۋرنيرىنىڭ فينالدىق كەزەڭىنە دەيىن جەتىپ جاتادى. سوندىقتان باس جۇلدەگە دەگەن تالاس وتە جوعارى. بۇدان بولەك, ۆەلوشەرۋ, جۇگىرۋ, سكانديناۆيالىق ءجۇرۋ جانە ت.ب. سپورتتاردى دا ۇيىمداستىرامىز. جالپى استانا تۇرعىندارى سالاۋاتتى ءومىر سالتىن قاتتى ۇستانادى», دەدى ەرجىگىت وسەرباي.
قالا اكىمدىگىنىڭ رەسمي سايتىنىڭ مالىمدەۋىنشە ءتۋرنيردىڭ ماقساتى – ارداگەرلەر اراسىندا سالاۋاتتى ءومىر سالتىن ناسيحاتتاۋ جانە زياتكەرلىك سپورت تۇرلەرىنە دەگەن قىزىعۋشىلىقتى ارتتىرۋ.
ء«وزىم 81 جاستامىن. ايتسە دە 2013 جىلدان بەرى «اقساقالدار كەڭەسىن» قۇرۋعا اتسالىسىپ, شاحمات, دويبى, توعىزقۇمالاق جارىستارىن مۇلدەم قالدىرماي, بەلسەندى تۇردە قاتىسىپ كەلەمىن. تەك قاتىسۋشى رەتىندە عانا ەمەس, ۇيىمداستىرۋشىلاردىڭ اراسىندا دا جۇرەمىن. زەينەتكەرلەرگە نازار اۋداراتىن, ۇدايى كوڭىل بولەتىن قالا اكىمدىگىنە العىسىمدى ايتامىن», – دەپ جارىس قاتىسۋشىسى ءماجيت بەكەجانوۆ ويىن ءبولىستى.
سايىس سوڭىندا, جەڭىمپازدارعا «العىس حاتتار» مەن ارنايى سىيلىقتار تابىستالدى.
