ابىلعازى قۇسايىنوۆ پرەزيدەنتتىككە كانديدات بولىپ تىركەلدى

استانا. 19 ناۋرىز. كەشە پرەزيدەنتتىككە ءوزىن-ءوزى ۇسىنۋشى ابىلعازى قۇسايىنوۆ كانديدات رەتىندە تىركەلدى. بۇل تۋرالى ورتالىق سايلاۋ كوميسسياسىنىڭ دەرەگىنە سىلتەمە جاساعان ras.kz حابارلادى. «ورتالىق سايلاۋ كوميسسياسى 18 ناۋرىز كۇنى ابىلعازى قۇسايىنوۆتى الداعى سايلاۋدا قازاقستان پرەزيدەنتتىگىنە كانديدات رەتىندە تىركەۋ تۋرالى قاۋلى قابىلدادى», - دەلىنگەن حابارلامادا. سايلاۋ تۋرالى كونستيتۋتسيالىق زاڭعا سايكەس, تىلەك ءبىلدىرۋشى سايلاۋشىلاردىڭ جالپى سانىنىڭ كەمىندە 1 پايىزى كولەمىندە قولداۋشىلار قولىن جيناۋى كەرەك جانە ولار وبلىستاردىڭ, رەسپۋبليكالىق ءمانى بار قالالار مەن استانا قالاسى تۇرعىندارىنىڭ ۇشتەن ەكى بولىگىنىڭ وكىلدەرى بولۋى ءتيىس. ناقتى ايتقاندا, قولدىڭ سانى 93 مىڭ 12-دەن كەم بولمۋى كەرەك. ال قۇسايىنوۆتى جاقتاعان راس قولداردىڭ سانى 132 152 بولدى. بۇدان باسقا, ورتالىق سايلاۋ كوميسسياسى ءوزىن-ءوزى ۇسىنۋشى حاسەن قوجا-احمەتتى كونستيتۋتسيا تالاپتارىنا سايكەس كەلەدى دەپ تانۋ تۋرالى دا شەشىم شىعارىپ, وعان قول قويۋ پاراقتارىن بەردى. ەسكە سالا كەتەيىك, ۇستىمىزدەگى جىلدىڭ 15 ناۋرىزى كۇنى ورتالىق سايلاۋ كوميسسياسى سايلاۋعا قاتىسۋعا نيەت بىلدىرگەندەردەن ءوتىنىش قابىلداۋدى اياقتادى. وسى مەرزىمگە دەيىن بارلىعى 27 ءوتىنىش كەلىپ ءتۇستى. مۇنىڭ الدىندا پرەزيدەنتتىككە كانديدات رەتىندە تەك ەكى ادامنىڭ عانا تىركەلگەنى حابارلان بولاتىن. ولار – قازىرگى ءىس باسىنداعى پرەزيدەنت نۇرسۇلتان نازارباەۆ جانە قازاقستان كوممۋنيستىك پارتياسىنىڭ وكىلى تۇرعىن سىزدىقوۆ. پرەزيدەنتتىككە كەزەكتەن تىس سايلاۋ بيىلعى جىلدىڭ 26 ءساۋىرى كۇنى وتەدى. مۇرات ايتقوجا.