«استانا ارلاندارى» vs «باكۋ وتتارى». قارسىلاستار بەلگىلى بولدى

استانا. 19 ناۋرىز. بۇكىلالەمدىك بوكس سەرياسى (WSB) اياسىندا «استانا ارلاندارى» 21 ناۋرىزدا «باكۋ وتتارى» كومانداسىمەن كەزدەسەدى. شىمكەنتتە وتەتىن سول دودادا شارشى الاڭعا شىعاتىن بوكسشىلار بەلگىلى بولدى. بۇل تۋرالى «ەگەمەن قازاقستان» حابارلادى. سونىمەن الداعى سەنبىدە مىنا بوكسشىلاردىڭ ايقاسىن كورە الامىز: ولجاس ساتتىباەۆ – مۋراد رابادانوۆ (52 كگ); زاكير سافيۋللين – البەرت سەليموۆ (60 كگ); قاناعات مارالوۆ – پارۆيز باگيروۆ (69 كگ); حرۆوە سەپ – ميحايل دولگولەۆەتس (81 كگ); فيليپ حرگوۆيچ – گادجي مۋرتۋزاليەۆ (+91 كگ). قوس كوماندا اراسىنداعى كەزدەسۋ 21 ناۋرىزدا شىمكەنتتەگى جەڭىل اتلەتيكا كەشەنىندە وتەدى. باستالۋ ۋاقىتى 17:30-عا جوسپارلانعان. «ارلانداردىڭ» ايقاسىن «حابار» تەلەارناسى تىكەلەي ەفيردە كورسەتەدى. العاشقى اينالىمدا قارسىلاستار ازەربايجاندا كۇش سىناسقانى بەلگىلى. سول سىندا ءبىزدىڭ كوماندا 3:2 ەسەبىمەن جەڭگەن ەدى. بۇگىنگە دەيىن 9 كەزدەسۋ وتكىزىپ بارلىعىندا جەڭىسكە جەتكەن «ارلاندار» WSB جوباسىنىڭ «ۆ» توبىندا كوش باستاپ كەلەدى (27 ۇپاي). ال «باكۋ وتتارى» 20 ۇپايمەن بىزدەن كەيىنگى ساتىعا جايعاسقان. ەلامان قوڭىر. دەرەك: «ەگەمەن قازاقستان». سۋرەت: worldseriesboxing.com.