قۇرىلىس اياقتالعان سوڭ مەكەمەدە جىل سايىن 1500-1800 ادامعا مەديتسينالىق قىزمەت كورسەتىلەدى. كەشەن تاۋلىك بويى ەم-دوم الۋعا جانە وڭالتۋدىڭ بارلىق قاجەتتى تۇرىنە قول جەتكىزۋگە مۇمكىندىك بەرەدى. الايدا جوبانى قايتا پىسىقتاۋ مەن قارجىلاندىرۋدىڭ جەتكىلىكسىزدىگىنە بايلانىستى ورتالىق 2027 جىلى عانا پايدالانۋعا بەرىلەدى دەپ جوسپارلانىپ وتىر.
«وسىنداي وڭالتۋ ورتالىقتارىنىڭ بوي كوتەرۋى – وڭىرلەردەگى مۇمكىندىگى شەكتەۋلى ازاماتتاردىڭ قىزمەتتەرگە قولجەتىمدىلىگىن كەڭەيتۋ جولىنداعى ۇلكەن قادام. مۇنداي مەكەمەلەر ەرەكشە قاجەتتىلىكتەرى بار جانداردىڭ دەنساۋلىعىن قالپىنا كەلتىرىپ, ءومىر ساپاسىن جاقسارتۋعا مۇمكىندىك بەرەدى. ءبىز پرەزيدەنت تاپسىرمالارىنىڭ مەرزىمىندە ورىندالۋىن, مىڭداعان وتباسى ءۇمىتىنىڭ اقتالۋىن قاداعالايمىز. وبلىس ورتالىعىندا ومىرلىك ماڭىزى بار نىساننىڭ جىلدار بويى ىسكە قوسىلماۋى اقتاۋعا كەلمەيدى. «AMANAT» پارتياسى جاعدايدى تۇزەۋ ءۇشىن ناقتى شارالار قابىلدانۋىن, ال تاپسىرمانىڭ مەرزىمىندە ورىندالماۋىنا جاۋاپتى تۇلعالاردىڭ انىقتالىپ, جاۋاپقا تارتىلۋىن تالاپ ەتەتىن بولادى. مۇنداي نىساندار بوس تۇرماي, حالىق يگىلىگىنە قىزمەت ەتۋى ءتيىس», دەدى دەپۋتات ن.دەمەنتەۆا.
ءماجىلىستىڭ ءباسپاسوز قىزمەتىنىڭ مالىمدەۋىنشە كوكشەتاۋداعى جوبا پارتيانىڭ «كەدەرگىسىز كەلەشەك» باعدارلاماسى شەڭبەرىندە جۇزەگە اسىرىلىپ جاتىر. باعدارلاما نىساندار سالۋمەن عانا شەكتەلمەي, قالالىق ورتانى جان-جاقتى بەيىمدەۋدى دە قامتيدى. تەك اقمولا وبلىسىنىڭ وزىندە 1037 نىسان, سونىڭ ىشىندە مەكتەپتەر, اۋرۋحانالار, مۇراجايلار, سپورت زالدارى زاماناۋي تالاپتارعا ساي جاڭارتىلعان. الداعى ءبىر جارىم جىلدا بۇل تىزىمگە تاعى 176 عيمارات قوسىلادى. 2027 جىلعا دەيىن وبلىس بويىنشا 958 نىساندى بەيىمدەۋ جوسپارلانعان. ولارعا پاندۋستار ورناتۋ, تاكتيلدى كورسەتكىشتەر, ارنايى ليفتىلەر قويۋ سياقتى جۇمىستار جۇرگىزىلەدى.
وڭىردە ينكليۋزيۆتى ءبىلىم مەن سپورتقا دا ايرىقشا كوڭىل بولىنگەن. مەكتەپتەردە ەرەكشە ءبىلىم بەرۋ قاجەتتىلىكتەرى بار بالالارعا جاعداي جاسالىپ, ولاردىڭ وتباسىلارىنا ناقتى كومەك كورسەتىلىپ كەلەدى. سونىمەن قاتار ينۆاتاكسي قىزمەتىن دامىتۋ, زەينەتكەرلەر مەن مۇگەدەكتىگى بار ازاماتتارعا تەگىن جول ءجۇرۋ مۇمكىندىگىن ۇسىنۋ قولعا الىنعان. قازىرگى ۋاقىتتا مۇنداي شارالار كوكشەتاۋ مەن بۋرابايدا جۇزەگە اسىپ جاتىر.
