سۋرەت: senate.parlam.kz
سەنات دەپۋتاتى تالعات ءجۇنىسوۆ اقمولا وبلىسىنىڭ اقكول اۋدانىندا بولدى. ول الەۋمەتتىك مەكەمەلەردىڭ قىزمەتىمەن, ءبىلىم بەرۋ جانە ينفراقۇرىلىمدىق جوبالاردى ىسكە اسىرۋ بارىسىمەن تانىستى. سونداي-اق سەناتور اقكول قالاسىندا ءومىرى قيىن جاعدايعا تاپ بولعان بالالاردى قولداۋ ورتالىعىنا باردى. ونداعى جۇزدەسۋلەردە ينكليۋزيۆتى جانە قاۋىپسىز ورتا قۇرۋ, بالالاردىڭ بارلىق ساناتىنا ءبىلىم بەرۋ جانە الەۋمەتتىك قىزمەتكە تەڭ قولجەتىمدىلىكتى قامتاماسىز ەتۋدىڭ ماڭىزى اتالىپ ءوتتى. ساپار بارىسىندا اگروونەركاسىپ كەشەنىنە مامان دايارلاۋ ماسەلەسى دە نازاردان تىس قالمادى. اقكول قالاسىنداعى اگروتەحنيكالىق كوللەدجدەگى تۇلەكتەردىڭ سۇرانىسى, دۋالدى وقىتۋدى دامىتۋ جانە وقۋ باعدارلامالارىن جاڭعىرتۋ جايى تالقىلاندى.
ال سەنات دەپۋتاتى سەرگەي ەرشوۆ قاراعاندى وبلىسىنا باردى. ول وساكاروۆ اۋدانىنداعى بىرقاتار الەۋمەتتىك ماڭىزدى نىساندى ارالادى. ورتالىقتا بالالار مەن جاسوسپىرىمدەردىڭ جان-جاقتى دامۋىنا ىقپال ەتەتىن ءتۇرلى ۇيىرمەلەر مەن سەكتسيالار بار.
«جاستار» سياقتى ورتالىقتار جاس ۇرپاقتىڭ بويىندا دۇرىس باعدار قالىپتاستىرادى. مۇندا دارىندار دۇنيەگە كەلەدى, بولاشاق كوشباسشىلار تاربيەلەنەدى. مەملەكەت قوسىمشا ءبىلىم بەرۋدى قولداۋعا ەرەكشە نازار اۋدارۋى كەرەك, اسىرەسە اۋىلدىق جەرلەردەگى وسىنداي مەكەمەلەر بالالار مەن جاسوسپىرىمدەر كوپ باراتىن دامۋ ورتالىعىنا اينالۋعا ءتيىس», دەدى س.ەرشوۆ.
سۇيىندىك الداشەۆ پەن بەكبول ورىنباساروۆ ماڭعىستاۋ وبلىسىنىڭ حالقىمەن كەزدەستى. اتاپ ايتقاندا, سەناتورلار مۇنايلى اۋدانىندا اۋدان تۇرعىندارىمەن جانە ءماسليحات دەپۋتاتتارىمەن جۇزدەستى. ولار بيۋدجەتتى ءتيىمدى جوسپارلاۋ, جەكەمەنشىك مەكتەپتەردىڭ مارتەبەسى, اۆتوكولىكتى زاڭداستىرۋ ءراسىمى جانە مەملەكەتتىك ساتىپ الۋ سالاسىنداعى زاڭنامانى جەتىلدىرۋدىڭ وزەكتى ماسەلەلەرىن تالقىلاندى.
دەپۋتاتتار جاڭا نىساندارمەن دە تانىستى. اۋداندا 1 200 ورىندىق زاماناۋي مەكتەپ, مادەني ورتالىق جانە 150 توسەكتىك اۋرۋحانا بوي كوتەردى. دارىگەرلەردىڭ ەڭبەك جاعدايى مەن مەديتسينالىق قىزمەتتەردىڭ ساپاسىن تالقىلاۋعا ەرەكشە ءمان بەرىلدى.
سەناتورلار اقتاۋعا ساپار بارىسىندا كولىك-لوگيستيكالىق ينفراقۇرىلىم نىساندارى – حالىقارالىق اۋەجاي مەن تەڭىز پورتىندا بولدى. وندا پرەزيدەنتتىڭ تاپسىرماسى اياسىندا اۋقىمدى جوبالار ىسكە اسىرىلىپ جاتىر.
سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ تۇركىستان وبلىسىنا ساپارى اياسىندا كەنتاۋ قالاسىندا بولدى. سەناتور تۇرعىندارمەن كەزدەسۋدە سەگىزىنشى سايلانعان پارلامەنتتىڭ ءۇشىنشى سەسسياسى بارىسىندا قابىلدانعان نەگىزگى زاڭنامالىق باستامالار تۋرالى ايتتى. ول پرەزيدەنت قاسىم-جومارت توقاەۆتىڭ ساياسي جانە ەكونوميكالىق رەفورمالارىن ىسكە اسىرۋ اياسىندا سالىق, بيۋدجەت جانە سۋ كودەكستەرىنىڭ جاڭا ماتىندەرىمەن قوسا بىرقاتار جۇيە قۇرايتىن قۇجاتتار قابىلدانعانىن اتاپ ءوتتى. كەزدەسۋدە كەنتاۋ مەن وعان جاقىن ورنالاسقان ەلدى مەكەندەردىڭ كوپتەگەن جىلدار بويى شەشىلمەگەن ەكولوگيالىق مارتەبەسى ماسەلەسى كوتەرىلدى.
تۇرعىندار كاسىپكەرلىكتى دامىتۋ, جاڭا جۇمىس ورىندارىن اشۋ جانە ينفراقۇرىلىمدىق باستامالارعا قاتىستى ماسەلەلەردى كوتەردى. سەناتور كەزدەسۋگە قاتىسۋشىلارعا بەلسەندىلىگى ءۇشىن العىسىن ءبىلدىرىپ, «حالىق ۇنىنە قۇلاق اساتىن مەملەكەت» تۇجىرىمداماسى اياسىندا مۇنداي ديالوگ كەڭىنەن قانات جاياتىنىنا سەنىم ءبىلدىردى.
