1996 جىلدان بەرى جۇمىس ىستەيتىن كاسىپورىن 2001 جىلى كاسىپورىن «تسەلينگورماش» سەرىكتەستىگى اتاندى. 2022 جىلدان الەكسەي ەروفەەنكو يەلىك ەتەدى. كومپانياعا 6 ملرد تەڭگە ينۆەستيتسيا قۇيىلعان. وسى قاراجات ەسەبىنەن جاڭا تسەحتار سالىنىپ, زاماناۋي قۇرىلعىلار ساتىپ الىندى. ديرەكتوردىڭ ايتۋىنشا, كاسىپورىن ءونىمى سۇرانىسقا يە. مۇندا تەمىرجولعا قاجەتتى قۇرىلعىلارعا دا تاپسىرىس بەرىلىپ, ۆاگوندار مەن لوكوموتيۆتەردىڭ دە قوسالقى بولشەكتەرى وندىرىلەدى.
وسىدان بىرەر جىل بۇرىن كاسىپورىن قىزمەتى ەكى باعىتقا بولىنگەن. ءبىرىنشىسى – ماشينا جاساۋ باعىتىندا ستاندارتقا ساي ەمەس قۇرىلعىلاردى دايارلاۋ بولسا, ەكىنشىسى – جاڭا قوسىمشا جابدىقتاۋ ءوندىرۋ. كەيىنگى ەكى جىلدا تاپسىرىس بەرۋشىلەر سانى وسكەن. كاسىپورىن جوعارى قىسىمدى قازاندىقتار مەن راديواكتيۆتى ماتەريالداردىڭ كونتەينەرلەرىن دە دايىندايدى. جۇمىس ۋچاسكەسىندە 230 ءتۇرلى ستانوك تۇر. ول ستانوكتاردا جوعارى بىلىكتى 40 ادام ەڭبەك ەتەدى. ايىنا 800 تونناعا جۋىق مەتالل قۇرىلعىلارى ەكى اۋىسىمدا دايىندالادى. ەگەر تاپسىرىس بەرۋشىگە شۇعىل قاجەت بولسا قوسىمشا كۇش جۇمىلدىرىلادى.
كوپتەگەن ءوندىرىس وشاعىنداعى ءتارىزدى بۇل جەردە دە كادر جەتىسپەيدى. اسىرەسە توكار, فرەزەروۆششيك ءتارىزدى ماماندىق يەلەرى قاسقالداقتىڭ قانىنداي قات. ورتاشا ەڭبەكاقى – 480 مىڭ تەڭگە. شاعىن قالا تۇرعىندارى ءۇشىن ءتاپ-ءتاۋىر تابىس. مىنە, وسى ارادا ءوندىرىس سالاسىنىڭ ماماندارىن دايارلاۋ ماسەلەسى وتكىر كۇيىندە ەكەنىن ەكپىن ءتۇسىرىپ ايتا كەتۋگە بولادى.
كاسىپورىنداعى ءۇش تسەحتىڭ جاڭعىرۋى جايىندا بولە-جارا ايتا كەتۋ كەرەك. ءبىرىنشى كاسىپورىن نەمىس قۇرىلعىلارىمەن تولىق جابدىقتالعان. دانەكەرلەۋ جەلىسى ادام كۇشىن كوپ قاجەت ەتپەيتىن قۇرىلعىلار ارقىلى جۇمىس ىستەيدى. ۇيرەنشىكتى دانەكەرلەۋشى ءبىر جۇمىس اۋقىمىن تاۋلىك بويى ىستەسە, روبوت 22 مينۋتتا تاپ-تۇيناقتاي ەتىپ مۇلتىكسىز دانەكەرلەپ شىعادى. مەتالدى كەسۋ, وڭدەۋ ءىسى دە جاڭا قۇرىلعىلار ارقىلى اتقارىلادى. كاسىپورىنعا نەگىزىنەن «التىن الماس», «RG Gold», «نورد مينەرالس كازاحستان», «اي ينجينيرينگ» كومپانيالارى تاپسىرىس بەرەدى. تاعى ءبىر جاڭا تسەحتا پلاستيكالىق تەرەزەلەر دە وندىرىلەدى. بۇل بۇيىمدارعا دا سۇرانىس كوپ.
وسىدان ەكى جارىم اي بۇرىن كاسىپورىن تاعى ءبىر جاڭا جوبانى جۇزەگە اسىرۋعا كىرىسىپتى. التىن وندىرەتىن فابريكالاردىڭ سۇرانىسىنا وراي شاعىن تۇرعىن ۇيلەر دايىنداي باستاعان. شاعىن ۇيدە تۇرمىسقا قاجەتتى بارلىق جاعداي قاراستىرىلعان. ۋاقىتشا جاي بولعانىمەن, كەز كەلگەن ماۋسىمدا پايدالانۋعا ابدەن بولادى. ەڭ باستى ەرەكشەلىگى, ءبىر ورىننان ەكىنشى ورىنعا كوشىرۋ وڭاي.
كاسىپورىن جۇمىسشىلاردىڭ الەۋمەتتىك-تۇرمىستىق جاعدايىنا دا كوڭىل بولەدى. 27 جىل بويى جۇمىس ىستەمەگەن اسحانا جوندەۋدەن وتكىزىلىپ, ەل يگىلىگىنە جاراتىلعان. كاسىپورىن جۇمىسشىلارى تەگىن تاماقتانادى.
وندىرىلگەن بۇيىمدار اشىق ۇلگىدەگى كەدەن قويماسىندا ساقتالادى. زاماناۋي جاڭا جابدىقتارمەن تولىق قامتاماسىز ەتىلگەن كاسىپورىن الداعى ۋاقىتتا تۇتىنۋشى تىلەگىنە ساي ستاندارتتى ەمەس قۇرال-جابدىقتاردى شىعارۋدى مولايتا بەرمەك. ءوندىرىس ورگە باسقان سايىن ەل ەكونوميكاسى دا نىعايىپ, تىرشىلىك تىنىسى كەڭەيە بەرەدى ەمەس پە؟
اقمولا وبلىسى,
ستەپنوگورسك قالاسى
