جاڭا ساياباق اشىلدى

اۋماعى 7 مىڭ شارشى مەتر بولا­تىن ساياباقتا 170 كولىككە ارنالعان اۆتوتۇ­راق تا سالىنعان. سونداي-اق وسى كەڭىس­تىك جانىنداعى №5 مەكتەپتىڭ كىرە­بە­رىسى كەڭەيتىلىپ, بالالاردىڭ كىرىپ-شىعۋى­نا قولايلى جاعداي جاسالىپتى. اكىم­شى­لىك تاعى ءدال وسىنداي بىرنەشە دەمالىس اۋماعىن اشۋدى جوسپارلاپ وتىر.

– بۇل جەردە شامامەن 40 مىڭ ادام تۇرادى. اۋدان بويىنشا 450 تۇرعىن ءۇي بولسا, سونىڭ باسىم بولىگى وسى ورتالىقتا ورنالاسقان. ەسكى ۇيلەرمەن قاتار جاڭا تۇرعىن ۇيلەر دە بوي كوتەرىپ كەلەدى. مۇندا ۋنيۆەرسيتەتتەر مەن بالاباقشالار بار. سوندىقتان بۇل اۋماقتىڭ جاڭارۋى – 40 مىڭ تۇرعىننىڭ قۋانىشى. بايقوڭىر اۋدانى بويىنشا بيىل وسىنداي 8 قوعامدىق كەڭىستىك اشۋ جوسپارلانىپ وتىر. بۇعان قوسا, 88 اۋلا اباتتاندىرىلادى. ونىڭ ىشىندە 18-ءى جاڭادان سالىناتىن اۋلالار, ال قالعان 70 اۋلاعا كۇردەلى جوندەۋ جۇمىستارى جۇرگىزىلەدى, – دەدى بايقوڭىر اۋدانىنىڭ اكىمى تالعات راحمانبەردى.

ۇلتتىق دومبىرا كۇنى قارساڭىندا وتكەن بۇل ءىس-شارادا رەسپۋبليكالىق «كۇي اناسى» قوعامدىق قورىنىڭ جەتەك­شىسى تولەگەن قۋانىشەۆ پەن «ەسىل» ۋنيۆەرسيتەتىنىڭ رەكتورى, پروفەسسور اياپ­بەرگەن تاۋباەۆ ارنايى دايىندالعان دومبىرالاردى ەلوردا جاستارىنا تابىستادى.

– بۇل – ءبىزدىڭ قوعامدىق قورىمىزدىڭ جاقسى ءداستۇرى. ءاربىر تاعىلىمدى جيىندا ۇلتتىق اسپاپتى ناسيحاتتاپ, جاس ۇرپاققا دومبىرا سىيلايمىز. ماسەلەن, بۇگىن وسى اۋماقتى اباتتاندىرۋعا اتسالىسقان جۇمىسشىنىڭ بالاسىنا 243-دومبىرامىزدى تارتۋ ەتتىك. وسىدان التى اي بۇرىن بۇل جەر بوس جاتقان اۋماق ەدى. قوعامدىق جۇمىس جۇرگىزگەن كەزىمىزدە جەرگىلىكتى تۇرعىندار وسى ماڭايدى اباتتاندىرىپ, زەينەتكەرلەر مەن كوپ بالالى اتا-انالار دەمالاتىن ورىنعا اينالدىرۋ تۋرالى ۇسىنىس ايتتى. ءبىز بۇل ويدى قولداپ, استانا قالاسىنىڭ اكىمى جەڭىس قاسىمبەك مىرزاعا حات جولدادىق. ول باستامانى قابىل الىپ, بايقوڭىر اۋدانى اكىمدىگىنە ءتيىستى تاپسىرما بەردى. مىنەكەي, ەكى ايدىڭ ىشىندە بۇل اۋماق كورىكتى ساياباققا اينالدى, – دەيدى تولەگەن قۋانىشەۆ.