«2025 جىلعى 1 شىلدەدە بالانىڭ جاعدايى تۇراقتانعان سوڭ, 2014 جىلى تۋعان ناۋقاس قاراساي اۋدانىنىڭ ورتالىق اۋداندىق اۋرۋحاناسىنان وبلىستىق بالالار كلينيكالىق اۋرۋحاناسىنا اۋىستىرىلدى. ول جانساقتاۋ بولىمىنە جاتقىزىلدى. ناۋقاستىڭ جاعدايى – اۋىر, بىراق تۇراقتى, ناشارلاۋ بەلگىلەرى جوق. ەسىن بىلەدى. ناۋقاسپەن جانە ونىڭ اناسىمەن كلينيكالىق پسيحولوگ جۇمىس ىستەپ جاتىر», دەدى الماتى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
ناۋقاستى قازاق مەديتسينالىق ۋنيۆەرسيتەتىنىڭ نەيروحيرۋرگى مەن قازاق ۇلتتىق مەديتسينا ۋنيۆەرسيتەتىنىڭ پروفەسسورى قاراعان. وبلىستىق دەنساۋلىق ساقتاۋ باسقارماسى ەمنىڭ تولىق كولەمدە, كلينيكالىق حاتتامالارعا سايكەس جۇرگىزىلىپ جاتقانىن اتاپ ءوتتى.
ايتا كەتەيىك, وقيعا 30 ماۋسىم كۇنى ءتۇس مەزگىلىندە قاراساي اۋدانىنا قاراستى جالپاقساي اۋىلىندا بولعان. ءۇش بىردەي اگرەسسيۆتى يت جەكە اۋماقتان شىعىپ كەتىپ, ادامداردىڭ كوزىنشە فۋتبول الاڭىندا ويناپ جۇرگەن 10 جاستاعى بالاعا شابۋىل جاساعان. بالا جانساقتاۋ بولىمىنە ءتۇستى.
