اقپاراتتار اعىنى

● قازاقستاندا اۋقىمدى مال بورداقىلاۋ الاڭدارىن سالۋ باعدارلاماسى جۇزەگە اسىرىلا باستادى. «قازاگرو» ۇلتتىق باسقارۋ حولدينگىنىڭ مالىمەتىنە سۇيەنسەك, ەلىمىزدىڭ بىرنەشە وبلىستارىندا 3 مىڭ باس ءىرى قارا مالىن بورداقىلاۋ الاڭىنىڭ قۇرىلىسى جۇرگىزىلمەك. ● بيىلعى شىلدە ايىندا ەلىمىزدەگى ينفلياتسيا 0,1 پايىزدى قۇرادى. ال ازىق-ت ۇلىك تاۋارلارىنىڭ باعاسى 0,3 پايىزعا تومەندەسە, اقىلى قىزمەتتەر 0,5 پايىزعا وسكەن. سونداي-اق, تۇرعىن ءۇي-كوممۋنالدىق قىزمەتتەر سالاسىندا تاريفتەر 7 پايىزدىڭ شاماسىندا قىمباتتاعان. ● قازاقستان رەسپۋبليكاسى ۇلتتىق ۇلانىنا قاراستى 5573-اسكەري بولىمىندەگى جاۋىنگەرلەر جاڭا كيىم ۇلگىسىنە كوشتى. اسكەريلەردىڭ جاڭا فورماسى ەكسپو-2017 حالىقارالىق كورمەسىن وتكىزۋ قارساڭىندا جۇزەگە اسىرىلدى. ايتا كەتەيىك, ەلىمىز بويىنشا 5 مىڭ سارباز پاترۋلدىك پوليتسەيلەرمەن بىرلەسىپ قوعامدىق ءتارتىپتى قاداعالاپ كەلەدى. ● استانادا 2015-2016 وقۋ جىلىنا وراي جاڭادان ءۇش مەكتەپ بوي كوتەردى. ولار – ەسىل اۋدانىنىڭ ورىنبور كوشەسىندە ورنالاسقان №77 مەكتەپ-گيمنازياسى, كومسومول تۇرعىن الابىنداعى №79 مەكتەپ-گيمنازياسى جانە باتىعاي تۇرعىن الابىندا قونىس تەپكەن دارىندى بالالارعا ارنالعان «Astana English school» مەكتەبى. ءار مەكتەپ 1200 ورىنعا لايىقتالعان. ● الماتىدا «سامال» شاعىن اۋدانىن اباتتاندىرۋ بارىسىندا 3 شاقىرىمدىق ۆەلوجول سالىنادى. ول – دوستىق داڭعىلى, ساتباەۆ, فۋرمانوۆ جانە جولداسبەكوۆ كوشەلەرى ارقىلى ۇزىندىعى 3 مىڭ مەترلىك جول. سونداي-اق, قالا اكىمىنىڭ تاپسىرماسى بويىنشا دانيالىق ساۋلەتكەر يان گەيلدىڭ تۇجىرىمداماسى اياسىندا اۋداندى اباتتاندىرۋ جۇمىستارى ءجۇرىپ جاتىر. ● وڭتۇستىك قازاقستان وب­لىسىنىڭ تۇركىستان قالاسىنا جىلىنا 1 ميلليونعا جۋىق تۋريست كەلەدى. قالا اكىمى الىپبەك وسەرباەۆتىڭ ايتۋىنشا, مۇندا تۋريزم قارقىندى دامىعان. 2013 جىلى ق.ا.ياساۋي كەسەنەسىنە 700 مىڭنان استام تۋريست كەلسە, 2014 جىلى بۇل تسيفر 1 ملن.-عا ارتقان. ال بيىلعى ءبىرىنشى جارتىجىلدىقتا 600 مىڭعا جۋىق ادام قالاعا ساياحات جاساعان ەكەن. ● قىزىلوردا وبلىسىندا ءبىرىنشى جارتىجىلدىقتا 5 مىڭنان استام جاڭا جۇمىس ورنى اشىلدى. مۇنىڭ باسىم بولىگى قۇرىلىس سالاسىنا تيەسىلى. وبلىس اكىمدىگى تاراتقان اقپاراتقا سۇيەنسەك, ايماقتا جۇمىسسىزدىق دەڭگەيى 5 پايىزدى قۇراعان. حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە «24kz» تەلەارناسىنىڭ دەرەكتەرى بويىنشا دايىندالدى.