پاۆلوداردا جىلۋ جەلىلەرى جوندەلىپ جاتىر

ەڭ الدىمەن – ەكىباستۇز

قىس سايىن قالىڭ قار مەن ايازعا توتەپ بەرەتىن جىلۋ جۇيەلەرى ءۇشىن تەحنيكالىق دايىندىق – باستى باسىمدىق. سوڭعى جىلدارى ءجيى سىنعا ۇشىراعان ەكىباستۇزداعى جەلىلەردى جوندەۋ ءبىرىنشى كەزەككە قويىلعان. بولىنگەن قاراجاتتىڭ نەگىزگى بولىگى – 3 ملرد تەڭگە شاماسىندا – ءدال وسى قالادا جۇزەگە اسىرىلاتىن ەكى جوباعا باعىتتالادى. اتاپ ايتقاندا, ورتالىق جىلۋ تاراتۋ پۋنكتىنەن ەلدى مەكەندەرگە دەيىنگى 1,4 شاقىرىمدىق تم-I جانە تم-III ماگيسترالدارى جوندەلمەك.

جالپى, بىلتىر ەكىباستۇزدا 9 شاقىرىم جىلۋ جەلىسى جوندەلىپ, جەو-داعى قازاندىقتار جاڭارتىلدى. تازارتىلعان سۋ قۇبىرى تارتىلىپ, اپات قاۋپىن ازايتۋعا باعىتتالعان جۇمىستار قولعا الىندى.

پاۆلودارداعى باستامالار

وبلىس ورتالىعىندا دا ناقتى جوبالار ىسكە اسىپ جاتىر. پاۆلوۆ – شەۆچەنكو – كاتاەۆ كوشەلەرىندەگى تۇرعىن شاعىن اۋدانداردى جىلۋمەن قامتۋ ءۇشىن كامزين كوشەسىنىڭ بويىندا تم-13 ماگيسترالى سالىنۋدا. بۇل جوباعا 802 ملن تەڭگە ءبولىندى.

سونداي-اق, 2024 جىلدىڭ جەلتوقسانىندا قابىلدانعان «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا پاۆلودار قالاسىنىڭ جەو ماڭىنداعى 1-نو-52 ۋچاسكەسىندە جاڭا تم-20ا ماگيسترالىن سالۋ جوسپارلانىپ وتىر. 9,8 ملرد تەڭگەلىك بۇل نىسان قالا اۋماعىنىڭ 30%-ىن جىلۋمەن قامتاماسىز ەتۋگە مۇمكىندىك بەرەدى.

توزعان جەلىنى توقتاتىپ ۇلگەرۋ كەرەك

مامانداردىڭ ايتۋىنشا, سوڭعى دەرەكتەرگە سايكەس وڭىردەگى جىلۋ جەلىلەرىنىڭ توزۋى 79,7%-عا دەيىن تومەندەگەن. بىراق بۇل كورسەتكىش قاۋىپ سەيىلدى دەگەن ءسوز ەمەس. الداعى ماۋسىمدا ۇزدىكسىز جىلۋ بەرۋدى قامتاماسىز ەتۋ ءۇشىن جوسپارلانعان جوندەۋ جۇمىستارىن مەرزىمىنەن كەشىكتىرمەي اياقتاۋ ماڭىزدى بولىپ وتىر.

جالپى شىعىن كولەمى 5,8 ملرد تەڭگەنى قۇرايدى. ونىڭ 3,8 ميللياردى – رەسپۋبليكالىق, 2 ميللياردى – وبلىستىق بيۋدجەت ەسەبىنەن. بۇل – ايماقتىق ينفراقۇرىلىمدى جاڭارتۋدا ورتالىق پەن جەرگىلىكتى بيلىك اراسىنداعى بىرلەسكەن ارەكەتتىڭ كورىنىسى.