– فەستيۆال اياسىندا قويدىڭ كۇزەم جۇنىنەن الدىن الا ساباپ, نەگىزىن جانە تالدىرمالاردى دايىنداپ الدىق. سودان سوڭ بارلىق تۇركى جۇرتىنىڭ قولونەر شەبەرلەرىمەن بىرلەسىپ, ونەر تۋىندىسىنا ءار ەلدىڭ ۇلتتىق ورنەگىن كومكەردىك. وسى ورنەكتەردىڭ ورتاسىنا «اقتاۋ – تۇركى الەمىنىڭ مادەني استاناسى» جوباسىنىڭ لوگوتيپىن ورنالاستىردىق. بىرەۋىمىز ءبىر جاعىنان ورنەگىن سالساق, ەندى ءبىرىمىز لوگوتيپتىڭ دەتالدارىن تولىقتىردىق. قولدان جاساعان ۇلتتىق ماتەريال تۇركى حالىقتارى بىرلىگىنىڭ نىشانى ىسپەتتەس, – دەدى تۇرىكمەنستان رەسپۋبليكاسىنىڭ ديزاينەرى اينا دۋردىلىيەۆا.
ءىس-شاراعا جالپى 15 شەتەلدىك جانە 30 جەرگىلىكتى شەبەر قاتىستى.
– تەكەمەت, كيىز – تەك تۇرمىس بۇيىمى ەمەس, ول – ءار ۇلتتىڭ بولمىسىن, سالتىن, رۋحىن بويىنا سىڭىرگەن ماڭگىلىك ونەر تۋىندىسى. ءار ورنەك – جۇرەكتەن شىققان مۇرا, ءار ءيىرىم – ۇرپاققا ارنالعان امانات. بۇگىن باستالاتىن بۇل جۇمىس – تۇركى حالىقتارىنىڭ بىرلىگىن, باۋىرلاستىعىن, تاعىلىمدى تاريحىن بەدەرلەيتىن رامىزدىك كورىنىس, – دەدى ۇيىمداستىرۋشىلار.
سونداي-اق ءوڭىر تۇرعىندارى ءار ۇلتتىڭ ءداستۇرلى قولونەرىن تاماشالاپ قانا قويماي, تۋىندىلاردىڭ شىعۋ تاريحىمەن تانىستى. فەستيۆالدىڭ جابىلۋ سالتاناتىندا وتاندىق جانە شەتەلدىك ديزاينەرلەردىڭ تۋىندىلارىنان ءسان كورسەتىلىمى ۇيىمداستىرىلدى. اتاپ ايتقاندا, تۇرىكمەنستان ديزاينەرى اينا دۋردىلىيەۆا, قىرعىزستان ديزاينەرى اسىلجان قامباروۆا, وزبەكستان ديزاينەرى نارگيزا مۋساجانوۆا, موڭعوليالىق سۋۆد بانزراگچتىڭ تۋىندىلارى جانە جەرگىلىكتى «جاداعاي», «ماساكوۆا», «نۇرشاح», ء«تاربيا» ءسان ۇيلەرىنىڭ توپتامالارى كورسەتىلدى. سالتاناتتى شاراعا تۇركسوي حالىقارالىق ۇيىمىنىڭ باس حاتشىسى سۇلتان راەۆ قاتىسىپ, مۇنداي يگى شارالار تىعىز ىنتىماقتاستىقتىڭ ارقاسىندا جۇزەگە اسىپ جاتقاندىعىن ايتتى.
– كاسپي تەڭىزىنىڭ جاعاسىندا ەكى كۇن بويى ەرەكشە مادەني كەزدەسۋدىڭ كۋاسى بولدىق. دالا رۋحىن زاماناۋي ۇلگىمەن ۇشتاستىرعان بۇل ءسان توپتامالارى تەك كيىم نەمەسە قولونەر بۇيىمى عانا ەمەس, ورتاق بولمىسىمىزدىڭ, وتكەنىمىز بەن كەلەشەگىمىزدىڭ رامىزىنە اينالدى. ءبىز ولاردىڭ ارقايسىسىمەن ماقتانامىز. تۇركسوي ۇيىمى رەتىندە ءبىز ورتاق مادەني مۇرامىزدى دارىپتەۋدى ءارى وسىنداي جوبالارعا قولداۋ كورسەتۋدى جالعاستىرا بەرەمىز. ارينە, مۇنداي يگى شارالار بەكەم بىرلىكتىڭ ارقاسىندا جۇزەگە اسۋدا. بارشاڭىزعا شىعارماشىلىق تابىس تىلەيمىن, الداعى جوبالاردا دا بىرلەسە جۇمىس ىستەۋدى جالعاستىرا بەرۋگە نيەتتىمىز, – دەدى سۇلتان راەۆ.
كەش بارىسىندا ونەر يەلەرىنە تۇركسوي حالىقارالىق ۇيىمىنىڭ باس حاتشىسى سۇلتان راەۆ پەن ماڭعىستاۋ وبلىسى اكىمىنىڭ ورىنباسارى اببات ورىسباەۆ ارنايى ماراپاتتار تابىستادى.
سونىمەن قاتار سالتاناتتى شاراعا ارنايى شاقىرىلعان قوناق, ءداستۇرلى ءانشى ايگۇل ەلشىباەۆا ونەر كورسەتىپ, كورەرمەندى اۋەزدى انمەن ءتانتى ەتتى.
