تۇتاستاي العاندا, وڭىردە سپورت نىساندارى كوپتەپ بوي كوتەرىپ جاتىر. 2024 جىلى 17 جاڭا سپورت نىسانى سالىندى. بۇگىندە 10 زاماناۋي سپورت عيماراتتارىنىڭ قۇرىلىسى باستالدى. ءبىر ايتا كەتەرلىگى, جاڭا سپورت مەكتەپتەرى ەلىمىزدىڭ اتىن شىعارعان سپورتشىلار تۋىپ-وسكەن جەرلەرگە سالىنادى. «تۇلپار اۋناعان جەردە تۇك قالادى» دەگەندەي, ەل مەرەيىن وسىرگەن مايتالمان سپورتشىلاردىڭ كىندىك قانى تامعان توپىراقتا الدىڭعى تولقىننىڭ جولىن قۋاتىن جاسوسپىرىمدەر دە از ەمەس. سالتاناتتى راسىمگە قاتىسقان ەلىمىزدىڭ باس پروكۋرورى بەرىك اسىلوۆ ەلگە قايتقان قاراجات كوپتىڭ يگىلىگىنە جاراتىلىپ جاتقاندىعىنا باسا توقتالدى.
«بۇگىن ءبىز ءۇزىلىپ تۇسكەن مونشاقتاي, سايىن سارىارقانىڭ توسىندە ورىن تەپكەن اۋىلدا تاعىلىمدى وقيعانىڭ كۋاسى بولىپ وتىرمىز. 2022 جىلدان باستاپ ەلىمىزدە شەتكە شىعارىلعان اكتيۆتەر قايتارىلىپ جاتىر. زاڭ قابىلداندى, ارنايى ورگان قۇرىلدى. مەملەكەت باسشىسى قاسىم-جومارت توقاەۆ اتاپ وتكەندەي, بۇل قاراجات ەل يگىلىگىنە جاراتىلۋى كەرەك. 2024 جىلى 707 ميلليارد تەڭگە قايتارىلعان بولسا, 240 ميلليارد تەڭگەگە 333 الەۋمەتتىك جانە كوممۋنالدىق نىساندار سالىنىپ جاتىر, – دەدى بەرىك اسىلوۆ. – قوماقتى قارجىنىڭ ءار تيىنى بولاشاققا جۇمىس ىستەۋى قاجەت».
وبلىستىق دەنە تاربيەسى جانە سپورت باسقارماسىنىڭ اقپاراتىنا قاراعاندا, زەرەندى اۋىلىنداعى سپورت مەكتەبىنىڭ قۇرىلىس جۇمىستارى جىلدام جۇرگىزىلىپ, قىسقا مەرزىمدە جۇزەگە اسىرىلدى. 2025 جىلدىڭ قاڭتار ايىندا قۇرىلىس جۇمىسىن ءبىر جىلدا اياقتاۋ تۋرالى كەلىسىمشارتقا قول قويىلعان. ەندى, مىنە, مەكتەپ العاشقى تاربيەلەنۋشىلەرىن قابىلداۋعا تاپ-تۇيناقتاي دايىن. سپورت مەكتەبىندە كۇرەس, بوكس, اۋىر اتلەتيكا, جالپى دەنە تاربيەسى, سونداي-اق شاڭعى سپورتىمەن اينالىسۋعا مول مۇمكىندىك بار. جاتتىعۋ الاڭدارى زاماناۋي جابدىقتارمەن قامتاماسىز ەتىلگەن. مەديتسينا كابينەتى جۇمىس ىستەيدى.
ءوڭىر تۇرعىندارى ەڭسەسى بيىك, اسەم, جايلى سپورت مەكتەبىنە جوعارى باعا بەردى. ءبىر ايتا كەتەرلىگى, بۇل – جالعىز زەرەندىلىكتەردىڭ عانا ەمەس, تۇتاس ءوڭىر تۇرعىندارىنىڭ يگىلىگى ءۇشىن اتقارىلعان شارۋا. مۇندا وبلىستىڭ بارلىق جاس سپورتشىسى جاتتىعا الادى. قىسقاسى, بۋىرقانعان بۇلا كۇشپەن, سپورتپەن اينالىسۋعا دەگەن ىنتا-ىقىلاستىڭ شىمىرلاپ قايناپ, شيرىعاتىن ورتالىعى.
عيمارات 6 000 شارشى مەتر جەردى الىپ جاتىر. ءبىر مەزگىلدە 90 ادامدى قابىلداي الادى. وزگە اۋدانداردان كەلىپ سپورت مەكتەبىندە وقۋ-جاتتىعۋ جيىندارىن وتكىزەتىن جاس سپورتشىلارعا ارنالعان 48 ادامدىق جاتىن كورپۋسى بار.
سپورت مەكتەبىندە 42 ادام جۇمىس ىستەيدى. تولىق قۋاتىنا كوشكەن كەزدە 73 ادام جۇمىسپەن قامتىلىپ, جاڭا سپورت كەشەنى وڭىردەگى سپورتتى دامىتۋدىڭ قۋاتتى تەتىگى بولماق.
اقمولا وبلىسى,
زەرەندى اۋدانى
